ރަސްމާލެ މަޝްރޫ ހުއްޓިފައި އޮތްކަަމަށް ދައްކާ ވާހަކަ ދޮގުކޮށްފި
މި ސަރުކާރުން މިހާތަނަށް ފެށި އެންމެ ބިޔަ އެއް މަޝްރުއޫކަމަށްވާ ރަސްމާލެ ހިއްކުން ހުއްޓިފައި އޮތްކަމަށް ބުނެ ދައްކާ ވާހަކަތައް ކޮންސްޓްރަކްޝަން މިނިސްޓަރު ޑރ. އަބްދުﷲ މުއްތަލިބު ދޮގުކޮށްފި އެވެ.
މިއަދު އެ މިނިސްޓްރީން ބޭއްވި ނޫސްވެރިންގެ ބައްދަލުވުމެއްގައި ވާހަކަ ދައްކަވަމުން މިނިސްޓަރު މުއްތަލިބު ވިދާޅުވީ، ރަސްމާލެ މަޝްރޫގެ ދަށުން ވެލި ނަގައި ހިއްކުމުގެ މަސައްކަތް ކުރިއަށް ނުދިޔަ ނަމަވެސް އެ މަޝްރޫ ނުހުއްޓޭ ކަމަށެވެ.
އެތަން ހިއްކުމުގެ މަސައްކަތް ކުރިއަށް ނުދަނީ ހަރަދު ކުޑަކުރުމަށް ބޮސްކާލިސް އިން ގުޅީފަޅު ހިއްކަން ބޭނުންކުރާ ޑްރެޖަރުން ރަސްމާލެވެސް ހިއްކުމުގެ ވިސްނުން ގެންގުޅޭތީކަމަށް މިނިސްޓަރު ވިދާޅުވި އެވެ. މިނިސްޓަރު ވިދާޅުވީ، ގުޅީފަޅު ހިއްކުމުގެ މަސައްކަތް ވަރަށް އަވަހަށް ނިމޭނެ ކަމަށެވެ.
"ބޮސްކާލިސްއިން މިވަގުތު ގުޅީފަޅު ހިއްކަން ބޭނުންކުރާ ޑްރެޖަރު, އެއީ އެންމެ ޑްރެޖަރެއް. އެ ޑްރެޖަރުން ގުޅީފަޅު ހިއްކާފައި އެ މޫވް ކުރުމުގެ ވިސްނުމެއް އެބޭފުޅުން ގެންގުޅުއްވަނީ. އެއީ ދައުލަތުން ހަރަދު ކުރާ ޕްރޮޖެކްޓަކަށް ނުވެފައި އާ ޑްރެޖަރެއް ގެނައުމަކީ ހަރަދު ބޮޑުވާނެ ކަމަކަށް ވާތީ," މުއްތަލިބު ވިދާޅުވި އެވެ.
މުއްތަލިބު ވިދާޅުވީ، އެތަން ހިއްކުމުގެ މަސައްކަތް ފެށީ ވެލިނެގުމަށް މާ ބޮޑު ސަރަހައްދެއް ނުބަލާ ކަމަށާއި، ޕްލޭން އޮތީ ހިއްކަން ފަށާއިފައި ވެލި ހޯދުން ކަމަށެވެ.
މިހާރު ވެލި އޮތްވަރުން މަޝްރޫ ނިމޭވަރަށް ނުހިއްކޭނެ ކަމަށް ކޮންޓްރެކްޓަރު ބުނި ކަމަށާއި، އިތުރު ވެލި ހޯދުމުގެ މަސައްކަތް ކުރިއަށް ގެންދަން ނިންމާފައި އޮތް ކަމަށް އޭނާ ވިދާޅުވި އެވެ.
ރަސްމާލެ މަޝްރޫގެ ދަށުން 1153 ހެކްޓަރުގެ ބިން އަށް މަސް ދުވަހުގެ ތެރޭގައި ހިއްކަން ހަމަޖެހިފައި ވެއެވެ.
ރަސްމާލެ ހިއްކަނީ ސްރީލަންކާގެ ކެޕިޓަލް މެރިން އެންޑް ސިވިލް ކޮންސްޓްރަކްޝަން ކޮމްޕެނީ (ސީއެމްސީސީ) އާ ހަވާލުކޮށްގެން 70 ހެކްޓަރުގެ ބިން ދިގު މުއްދަތަކަށް އެ ކުންފުންޏަށް ދީގެންނެވެ.
