ހައުސިން ކޮމިޓީން އަނީސާ އިސްތިއުފާ ދެއްވައިފި
ކުރީގެ ރައީސް އިބްރާހީމް މުހައްމަދު ސޯލިހްގެ ސަރުކާރުން ފަށާފައިވާ ގެދޮރުވެރިޔާ އަދި ބިންވެރިޔާ ސްކީމާއި ގުޅިގެން ހުށަހަޅާ މައްސަލަތަކާއި ގުޅިގެން ރައީސް ޑރ. މުހައްމަދު މުއިއްޒުގެ ލަފާފުޅުގެ ދަށުން އުފެއްދި ހައުސިން ކޮމެޓީ ޗެއާމަނަކަށް ހަމަޖެއްސި އަނީސާ އަހުމަދު އެ މަގާމުން މިއަދު އިސްތިއުފާ ދެއްވައިފިއެވެ.
އަނީސާ، އެ ކޮމިޓީން އިސްތިއުފާ ދެއްވިކަން ހައުސިން މިނިސްޓަރު އަލީ ހައިދަރު ވަނީ މި ނޫހަށް ޔަގީންކޮށްދެއްވާފައެވެ.
ހައިދަރު ވިދާޅުވީ އަނީސާ އިސްތިއުފާ ދެއްވީ ސިއްހީ ސަބަބުތަކަށްޓަކައި ކަމަށެވެ.
ސަރުކާރަށް 35 އަހަރަށްވުރެ ގިނަ ދުވަސް ހިދުމަތް ކޮށްދެއްވާފައިވާ އަނީސާ ވަނީ ބައެއް ވުޒާރާތަކުގެ ވަޒީރުކަންވެސް ކުރައްވާފައެވެ.
އޭގެ ތެރޭގައި ވިމެންސް އެފެއާޒް އެންޑް ސޯޝަލް ސެކިއުރިޓީގެ މިނިސްޓަރުކަމާއި ޖެންޑާ މިނިސްޓަރުގެ މަގާމުގެ އިތުރުން ހެލްތް މިނިސްޓަރުގެ މަގާމުންވެސް އަނީސާ ފުރުއްވާފައިވެއެވެ. ރައީސް އޮފީހުގެ މިނިސްޓަރު ކަމުގެ މަގާމުވެސް އަނިސާ އަދާކުރެއްވިއެވެ.
އަނީސާ، އެންމެ ދިގު މުއްދަތެއްގައި ހިދުމަތް ކުރައްވާފައިވަނީ ރައީސް އޮފީހުގައެވެ. އެ އޮފީހުގައި 17 އަހަރަށްވުރެ ދިގު މުއްދަތެއްގައި ހިދުމަތް ކުރެއްވިއިރު، އެ އޮފީހުގެ ފޮރިން ރިލޭޝަންސް ސެކްޝަން ހިންގެވުމުގެ މަސްއޫލިއްޔަތު އަދާކުރެއްވިއެވެ. ރާއްޖޭގެ ފަރާތުން އދގެ ޖެނެރަލް އެސެމްބްލީގައި ބައިވެރިވެވަޑައިގެންނެވި ފުރަތަމަ އަންހެން ބޭފުޅެއްގެ ޝަރަފުވެސް އަނީސާ ވަނީ ހޯއްދަވާފައެވެ.
ރައްޔިތުންގެ މަޖިލީހަށް ރައީސް އައްޔަން ކުރައްވާ މެންބަރުގެ މަގާމާއި މަޖިލީހުގެ މުލަކަތޮޅު މެންބަރެއްގެ މަގާމުވެސް އޭނާ އަދާކުރައްވާފައިވެއެވެ.
