އަބްދުއްރަހީމް ދެއްވީ ރައީސްގެ ތަސައްވުރު ފުރިހަމަކޮށްދޭނެކަމުގެ ޔަގީންކަން
މިއަދު ފެށި މަޖިލީހަކީ ސަރުކާރުން ގެންނަން ބޭނުންވާ އިންގިލާބީ ބަދަލުތަކަށް މަސައްކަތް ކޮށް ފައިހަމަކުރާނޭ މަޖިލީހަކަށް ވެގެންދާނެ ކަމަށް މަޖިލީހުގެ އާ ރައީސް, ފޮނަދޫ ދާއިރާގެ މެންބަރު އަބްދުއްރަހީމް އަބްދުالله ވިދާޅުވެއްޖެ އެވެ.
މަގާމަށް އިންތިހާބުވެވަޑައިގެންނެވުމަށް ރިޔާސަތާ ހަވާލުވެވަޑައިގަތުމަށް ފަހު ވާހަކަދައްކަވަމުން އަބްދުއްރަހީމް ވިދާޅުވީ, އެ މަގާމަށް ނަން ހުށަހަޅުއްވައި ކުރެއްވި އިތުބާރަށް ރައީސް ޑރ. މުހައްމަދު މުއިއްޒަށް ޝުކުރު އަދާކުރައްވާ ކަމަށެވެ.
އަބްދުއްރަހީމް ވިދާޅުވީ 20 ވަނަ މަޖިލިސް އެކުލަވާލެވިގެން ދަނީ މުހިންމު ވަގުތެއް ކަމަށާއި ގާނުނުތަކަށް މުހިންމު ގިނަ ބަދަލުތަކެއް ގެނެސް އިންގިލާބީ ބަދަލެއް ގެނައުމަށް ރައީސް މަސައްކަތް ފައްޓަވާފައިވާ ދަނޑިވަޅެއްގައި ކަމަށެވެ.
"މި މަޖިލިސް ވެގެންދާނީ އެމަނިކުފާނުގެ މަސައްކަތަށް ފިޔަވަޅު ހަމަކޮށް ކަންކަން ކުރައްވާނެ މަޖިލީހަކަށް. މި ދަނޑިވަޅަކީ ގައުމެއްގެ ގޮތުގައި މުހިންމު ނިންމުންތަކެއް ނިންމަންޖެހިފައިވާ ދަނޑިވަޅެއް," އަބްދުއްރަހީމް ވިދާޅުވި އެވެ.
އެމަނިކުފާނު ވިދާޅުވީ އިގްތިސޯދުގެ އަސާސްތައް ފުޅާކޮށް އާ ފަންނުތަކާއި ވިޔަފާރިތައް ފުޅާކޮށް ފައިސާ ލިބޭނެ ގޮތްތަކާއި އުމްރާނީ އާ މަސައްކަތްތަކެއް ހޯދުމާއި އިޖުތިމާއީ ކަންކަން ރަނގަޅުކުރުމާއި ޝަރުއީ ދާއިރާ އިސްލާހުކުރުން ފަދަ ގިނަ ކަންކަމަށް ގޮތް ނިންމޭނެ މަޖިލީހަކަށް މި މަޖިލިސް ވާނެ ކަމަށެވެ.
ގިނަ ގާނޫނުތަކެއްގެ އިތުރުން ގާނޫނު ތެރެއަށް ފެތޭ ގަވައިދުތަކެއް ހަދާ ނުފެތޭ ގަވައިދުތައް އުވާލަން ޖެހޭ ކަމަށް އަބްދުއްރަހީމް ވިދާޅުވި އެވެ.
މަޖިލިސް މެންބަރުން ހަވާލުވަނީ ބޮޑު ޒިންމާއަކާ ކަން ފާހަގަކުރައްވައި އަބްދުއްރަހީމް ވިދާޅުވީ, އެ ޒިންމާ އަދާކުރުމުގައި މެންބަރުން ތިބޭނެ ކަމަށް ޝައްކު ނުކުރައްވާ ކަމަށެވެ.
"މި މަޖިލީހުގައި ޖޯޝާއި ފޮރިއާއެކު ގައުމުގެ ހައްގުގައި ވަކާލާތު ކުރެއްވުމަށް ހިތާއި ރޫހުން އަޒުމް ކަނޑައަޅުއްވައިގެން, މި މަޖިލީހަކީ ރައްޔިތުންގެ މަޖިލިސް. މި މަޖިލީހަކީ ދިވެހިރާއްޖޭގެ ވެރިކަން ތަރުތީބުކުރެވޭ ދައުލަތުގެ އެއް ބާރު," އަބްދުއްރަހީމް ވިދާޅުވި އެވެ.
މަޖިލީހުގައި ކުރެވޭ ބަހުސްތަކުގައި އެކި ހިޔާލުތަކާއި ބަހުސްތަކަށް ޖާގަ ދެވޭނެ ކަމަށް ވެސް އަބްދުއްރަހީމް ވިދާޅުވިއެވެ. ނަމަވެސް އެކަންކަން ހިނގަންވާނީ ހަމަތަކާއި ސުލޫކުގެ ތެރެއިން ކަން ފާހަގަކުރެއްވި އެވެ.
އަބްދުއްރަހީމް ވަނީ ރައްޔިތުން ފަހުރުވެރިވާނޭ ގޮތަކަށް މެންބަރުންގެ މަސައްކަތްތައް ބައްޓަންކޮށްދެއްވުމަށް އެދިވަޑައިގެންފަ އެވެ.
