އިޒްރޭލް ޕާސްޕޯޓު މަނާކުރަން ހުށަހެޅި ބިލުގެ ފުރަތަމަ ކިޔުން އިއްވުން މާދަމާ
އިޒްރޭލު ޕާސްޕޯޓުގައި ރާއްޖެއަށް އެތެރެ ނުވެވޭނެ ގޮތަށް ގާނޫނު އިސްލާހު ކުރަން އިދިކޮޅު އެމްޑީޕީގެ ފަރާތުން ގަލޮޅު ދެކުނު ދާއިރާގެ މެމްބަރު މީކާއިލް ނަސީމް ހުށަހެޅުއްވި ބިލުގެ ފުރަތަމަ ކިޔުން، މާދަމާގެ ރައްޔިތުން މަޖިލީހުގެ ޖަލްސާގައި ބާއްވަން އެޖެންޑާ ކޮށްފިއެވެ.
މި ބިލް މަޖިލީހަށް ހުށަހަޅާފައިވަނީ ގަލޮޅު ދެކުނު ދާއިރާގެ އެމްޑީޕީ މެންބަރު މީކާއީލް އަހުމަދު ނަސީމެވެ.
މަޖިލީހުގައި އާންމުކޮށް އަމަލުކުރާ އުސޫލަކީ ބިލުގެ ފުރަތަމަ ކިޔުން އިއްވާ ދުވަހު ބިލުގެ ދެލިކޮޕީއަށް މަޖިލީހުގެ މެންބަރުންނަށް ފޮނުވުމަށް ފަހު، އޭގެ ތިން ދުވަސް ފަހުން މަޖިލީހުގައި ބިލުގެ އިބްތިދާއީ ބަހުސް ފެށުމެވެ.
މީކާއިލްގެ ހުށަހެޅި މި މައްސަލަ އެޖެންޑާކޮށްފައިވާއިރު، އިޒްރޭލު ޕާސްޕޯޓް ރާއްޖޭގައި މަނާ ކުރަން ގާނޫނުތަކަށް ބަދަލު ގެންނަން ވަޒީރުންގެ މަޖިލީހުން ނިންމެވީ އިއްޔެއެވެ. ބަންޑާރަ ނައިބު އަހުމަދު އުޝާމް ކެބިނެޓަށް ލަފާ ދެއްވީ އެ ކަން ކުރެވޭނީ އިމިގްރޭޝަން ގާނޫނަށް ގެންނަން ޖެހޭ ބަދަލުތަކެއް ގެނެސްގެން ކަމަށެވެ.
އިމިގްރޭޝަން ގާނޫނަށް ރާއްޖެ އެތެރެވުން މަނާ މީހުން ފާހަގަކޮށް އަކުރެއް އިތުރު ކުރާ ގޮތަށް މީކައީލް ހުށަހެޅުއްވި ބިލުގައި ބަޔާންކޮށްފައިވަނީ އިޒްރޭގެ ޕާސްޕޯޓު ގެންގުޅޭ މީހުން ކަމަށެވެ. އޭގެތެރޭގައި އިޒްރޭލްގެ ޕާސްޕޯޓުގެ އިތުރުން އެހެން ގައުމެއްގެ ޕާސްޕޯޓް ގެންގުޅޭ މީހަކަށް ވިޔަސް، އެ މީހަކު ވެސް މީގައި ހިމެނެއެވެ.
