މޯދީއަށް ރައީސް މަރުހަބާ ވިދާޅުވެއްޖެ، ގުޅިގެން މަސައްކަތް ކުރަން ތައްޔާރު!
އިންޑިއާގެ ބޮޑުވަޒީރު ކަން ތިންވަނަ ދައުރަކަށް ދިފާއުކުރެއްވި ނަރެންދުރަ މޯދީއަށް މަރުހަބާ ވިދާޅުވެ، ގުޅިގެން މަސައްކަތް ކުރައްވަން ތައްޔާރަށް ހުންނެވި ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެ އެވެ.
ބޯދީގެ ބަރަތިޔަ ޖަނަތާ ޕާޓީ (ބީޖޭޕީ)އަށް މަޖިލީހުގެ ސާފު އަގުލަބިއްޔަތު ނުލިބުނު ނަމަވެސް އެ ޕާޓީއާ ގުޅިފައިވާ ޕާޓީތަކާއެކު އުފައްދާފައިވާ ނެޝަނަލް ޑިމޮކްރެޓިކް އެލަޔަންސް (އެންޑީއޭ)އަށް ވަނީ ލޮކް ޝަބާގެ 280 އަށް ވުރެ ގިނަ ގޮނޑި ޔަގީންވެ، ސަރުކާރު އެކުލަވާލާ ވަރަށް އަގުލަބިއްޔަތު ލިބިފަ އެވެ.
މޯދީއަށް މަރުހަބާ ވިދާޅުވެ ރައީސް މުއިއްޒު ކުރެއްވި ޓްވީޓުގައި ވިދާޅުވީ ދެ ގައުމުގެ ދެމެދު ހިއްސާކުރެވި، އެއްބަސްވެފައިވާ ލަނޑުދަނޑިތަކާއި ހަމަޖެހުމާއި ދެ ގައުމުގެ ވެސް މަސްލަހަތުތައް ކުރިއެރުވުމަށް ޓަކައި އެކުގައި މަސައްކަތް ކުރެއްވުމަށް ތައްޔާރަށް ހުންނެވި ކަމަށެވެ
"އަޅުގަނޑު ކުރިއަށް މި އޮތް ތަނުގައި ވެސް ތައްޔާރަށް މި ހުރީ، ދެ ގައުމުގެ ދެމެދުގައި ހިއްސާކުރެވިފައިވާ ލަނޑުދަނޑިތަކާއި، ދެ ގައުމުގެ މަސްލަހަތުތައް ކުރިއެރުވުމަށް ޓަކައި، ހަމަޖެހުން ގާއިމުވެ އޮތުމަށް، ގުޅިގެން މަސައްކަތް ކުރުމަށް،" ރައީސް މުއިއްޒު ވިދާޅުވި އެވެ.
އިންޑިއާ އަކީ ޒަމާނުއްސުރެން ރާއްޖެއާ އެންމެ ގާތް ސިޔާސީ ގުުޅުން ބާއްވާ ގައުމެވެ. މީގެ ކުރީގެ ސަރުކާރުތަކުގައި، އެ ރައީސެއްގެ ފުރަތަމަ ފުރަމާނަ ދަތުރުފުޅު ކުރައްވަނީ ވެސް އިންޑިއާއަށެވެ. ނަމަވެސް ރައީސް މުއިއްޒު ވަޑައިގަތީ ޗައިނާއަށެވެ. އިންޑިއާއަށް އަދި އެމަނިކުފާނު ވެރިކަމާ ހަވާލުވެވަޑައިގެންނެވި ފަހުން ދަތުރުފުޅެއް ނުކުރައްވަ އެވެ.
ކުރީގެ ރައީސް އިބްރާހިމް މުހައްމަދު ސޯލިހުގެ ސަރުކާރުގައި އިންޑިއާގެ ސިފައިން ގާއިމުވެ ތިބުން ނިމުމަކަށް ނުގެނެސް އިތުރު ސިފައިން ގެނައި މައްސަލާގައި ރައީސް މުއިއްޒު ލީޑުކުރައްވާ ޕީއެންސީ/ޕީޕީއެމްގެ އިއްތިހާދުގެ ފާޑުކިޔުންތައް އަމާޒުކުރި އެވެ. މި ވެރިކަމުގައި އިންޑިއާގެ ސިފައިން ފޮނުވާލުމަށް ފަހު، އެ ގައުމުން ހަދިޔާކުރި އުޅަނދުތަކުގެ އޮޕަރޭޝަނަށް މަދަނީ ހިދުމަތްތެރީން ވަނީ ގެނެސްފަ އެވެ.
