އޮޔާދިޔަ އަންހެން މީހާ އެންމެ ފަހުން ފެނިފައި ވަނީ ބުރިޖްމަތިން، އުޅުނީ ލޯބިވެރިޔާއާ އެކު

މިދިޔަ މެއި މަހުގެ 25 ވަނަ ދުވަހު ސިނަމާލެ ބްރިޖު ކައިރިން މަރުވެ އޮޔައި ދިޔަ, 25 އަހަރުގެ ނޭޕާލުގެ އަންހެން މީހާ އެންމެ ފަހުން ފެނުނީ ބްރިޖު މަތިން ހިނގާފައި ދަނިކޮށް ކަމަށާއި، އޭނާ އުޅުނީ އޭނާގެ ލޯބިވެރިޔާ އެކު ކަމަށް ފުލުހުން މިއަދު ބުނެފި އެވެ.

Ads by STELCO

ފުލުހުން ކިޔައިދިން ގޮތުން އޭނާގެ ލޯބިވެރިޔާ އަކީ ވެސް ބިދޭސީއެކެވެ.

ބްރިޖާ 50 ފޫޓު ހިސާބުން ކަނޑު މަތިން މީހަކު އޮޔާދާ ކަމުގެ މައުލޫމާތު ފުލުހުންނަށް ރިޕޯޓްކުރީ އެ ދުވަހު 12:35 ހާއިރެވެ. ހޮސްޕިޓަލަށް ގެންދިޔައިރު ވެސް އެ މީހާ މަރުވެފައިވާ ކަމަށް އައިޖީއެމްއެޗާ ހަވާލާދީ ފުލުހުން ބުނެފައިވެ އެވެ.

މަރުވެފައި އޮތް އެ އަންހެން މީހާ ފެނުނީ ބްރިޖު ސަރަހައްދުން ދަތުރުކުރި ލޯންޗަކަށެވެ.

ފުލުހުން ތަހުގީގުކުރާ ބައެއް މައްސަލަތަކުގެ މައުލޫމާތު މީޑިއާއާ ހިއްސާކުރުމަށް މިއަދު އިސްކަންދަރު ކޮށީގައި ބޭއްވި ޕްރެސް ބްރީފިންއެއްގައި ސީރިއަސް އެންޑް އޯގަނައިޒް ކްރައިމް ޑިޕާޓްމެންޓުގެ ފަރާތުން ޗީފް އިންސްޕެކްޓާ މުހައްމަދު ސާމިހު ވިދާޅުވީ ނޭޕާލުގެ އަންހެން މީހާ އަކީ މޭ މަހުގެ އެއްވަނަ ދުވަހު ރާއްޖެ އައި މީހެއް ކަމަށެވެ. އޭނާ މަސައްކަތް ކުރަމުން ދިޔައީ މާލޭ ގެސްޓު ހައުސްއެއްގައި ކަމަށާއި އެ ތަނުގައި އޭނާ ދިރިއުޅެމުން ދިޔައީ އެ ލޯބިވެރިޔާއެކު ކަމަށް ވިދާޅުވި އެވެ.

އޭނާ ލޯބީގެ ގޮތުން ގުޅިގެން އުޅޭ ބިދޭސީ މީހާއާ އެކު މާލޭ މަގުމަތީގައި އުޅޭ މަންޒަރު ސީސީޓީވީ ފުޓޭޖުން ފުލުހުންނަށް ފެނިފައިވެ އެވެ.

މޭ 25 ވަނަ ހެނދުނު 11:19 ހާއިރު ނިޔާވި ފަރާތާއި އެ ފަރާތް ލޯބީގެ ގޮތުން ގުޅިގެން އުޅޭ ބިދޭސީއަކާއި އެކު، މި ދެންނެވި އަންހެން މީހާ މާލޭގެ މަގުތަކުގައި ހަރަކާތްތެރިވެފައިވާތަން ސީސީޓީވީ ފުޓޭޖްގެ އެހީގައި އަޅުގަނޑުމެން ވަނީ ދެނެގަނެވިފައި

އޭނާ ވިދާޅުވީ އެ އަންހެން މީހާ އެރޭ އެކަނި ސިނަމާލެ ބްރިޖު މަތީގައި އުޅޭ މަންޒަރުވެސް ސީސީޓީވީ ފޫޓެޖްއަށް އަރާފައިވާ ކަމަށެވެ. އެހެން ނަމަވެސް އޭގެ ފަހުން ކަން ހިނގައި ދިޔަ ގޮތެއް ފުލުހުން ހިއްސާއެއް ނުކުރެ އެވެ.

މި ދެންނެވި ފަރާތް (އަންހެން މީހާ) ދިރިހުއްޓާ އެންމެ ފަހުން ފެނިފައިވަނީ މި ދެންނެވި ދުވަސް (25، މޭ) 11:27 ހާއިރު ސިނަމާލެ ބްރިޖުމަތިން

ފުލުހުން ބުނީ، މިހާތަނަށް ބެލިބެލުމުން އެ މަރަކީ އިތުރު މީހެއްގެ ބައިވެރިވުމެއް އޮތް މަރެއްކަމަކަށް ނުބެލެވޭ ކަމަށެވެ. ނަމަވެސް މައްސަލައިގެ މުޅި ތަހުގީގު ފުރިހަމަ ކުރުމަށް އިތުރު މަސައްކަތްތަކެއް ކުރަމުންދާ ކަމަށް ފުލުހުން ބުންޏެވެ.