ބިންވެރިޔާ ސްކީމްގެ ދަށުން ހުޅުމާލެއިން 594 ގޯތި ހަވާލުކޮށްފި
ނިމިދިޔަ ސަރުކާރުން ފެށި ބިންވެރިޔާ ސްކީމްގެ ދަށުން މިހާތަނަށް ޖުމްލަ 594 ގޯތި ކަނޑައި, ހަވާލުކުރެވިފައިވާ ކަމަށް ސަރުކާރުން ބުނެފިއެވެ.
ގެދޮރުވެރިކަމާ ބެހޭ ވުޒާރާއިން އިއްޔެ ބުނީ އިއްޔެ ހުޅުމާލެ ދެވަނަ ފިޔަވަހިން އިތުރު 45 ގޯތި ހަވާލުކުރެވިފައިވާ ކަމަށެވެ. އެއާއެކު ޖުމްލަ 583 ގޯތި ދެ ވަނަ ފިޔަވަހިން ހަވާލު ކުރެވިފައިވާ ކަމަށް އެ ވުޒާރާއިން ބުންޏެވެ.
އެ ވުޒާރާއިން ބުނީ މި އަހަރުގެ ޖެނުއަރީ މަހުން ފެށިގެން މިހާތަނަށް 119 ގޯތި ހަވާލުކުރެވިފައިވާ ކަމަށެވެ. ހަވާލުކުރެވުނު 594 ގޯތީގެ ތެރޭގައި ކުރީ ސަރުކާރުން ގުޅިފަޅުން ހަވާލުކޮށްފައިވާ 11 ގޯއްޗެއް ވެސް ހިމެނެ އެވެ.
ކުރީގެ ސަރުކާރުގެ އެ ސްކީމްގެ ދަށުން ހުޅުމާލެ ދެކާއި ތިނެއް އާއި ގުޅިފަޅު އަދި ގިރާވަރުފަޅުން ފުރަތަމަ ބުރުގައި 9،001 ގޯތި ދޫކުރުމަށް ނިންމައި، ގޯތި ލިބުނު މީހުންނަށް ރަޖިސްޓްރީ ވެސް ދޫކޮށްފައިވެއެވެ.
އަދި މިހާރު ހިއްކާ ނިމިފައި ހުރި ބިންތަކުން ބިން ކަނޑާ ބިން ހަވާލު ވެސް ކުރި އެވެ. ހުޅުމާލެ 3 އާއި ގުޅިފަޅު އަދި ގިރާވަރުފަޅުގެ ބިން ހިއްކާ ނުނިމުނަސް ވަނީ ގަވާއިދަށް ބަދަލު ގެނެސްގެން ބިމުގެ ރަޖިސްޓްރީ ވެސް އޭރު ހަވާލުކޮށްފަ އެވެ.
ރައީސް ޑރ. މުހައްމަދު މުއިއްޒުގެ ސަރުކާރުން ވަނީ ގުޅީފަޅުން އިތުރަށް ބިން ހިއްކުމަށް ނިންމައި އިތުރުކުރާ ބިމުން ވެސް ގޯތި ދިނުމަށް ނިންމައިފަ އެވެ. އެ ސަރަހައްދުން 1347 ގޯތި ކަނޑަން ނިންމައި، ކުރީގެ ސަރުކާރުގައި ގިރާވަރުން ގޯތި ލިބުނު މީހުންގެ ތެރެއިން ގުޅީފަޅަށް ބަދަލުކުރަން ބޭނުންވާ މީހުންނަށް އެ ފުރުސަތު ވެސް ހުޅުވާލައިފަ އެވެ.
Ads by STO
