އަބްދުއްރަހީމް މުރައިދޫގެއަށް ބަދަލުވުމާއިމެދު އަދި ގޮތެއް ނުނިންމާ
ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުالله މުރައިދޫގެއަށް ބަދަލުވެވަޑައިގެންނެވުމާއިމެދު ވަކި ގޮތެއް އަދި ނުނިންމަވާކަމަށް ރައްޔިތުންގެ މަޖިލީހުގެ އިދާރާއިން ބުނެފި އެވެ.
މުރައިދޫގެއަކީ ރައްޔިތުންގެ މަޖިލީހުގެ ރައީސުންގެ ގޮތުގައި ތިއްބަވާ ބޭފުޅުން ދިރިއުޅުއްވަން ކަނޑައަޅުއްވާފައިވާ ގެކޮޅެވެ. ދައުލަތުން މިގޮތަށް ކަނޑައެޅުއްވީ 2021 ވަނަ އަހަރުގެ މެއި މަހުގެ 6 ގައި އޭރު މަޖިލިސް ރައީސްކަމުގައި ހުންނެވި ކުރީގެ ރައީސް މުހައްމަދު ނަޝީދަށް އަމާޒުކޮށް ދިން ބޮމުގެ ހަމަލާއަށްފަހު ސަލާމަތީ ފިޔަވަޅެއްގެ ގޮތުންނެވެ.
ރައީސް ނަޝީދު މުރައިދޫގޭގައި ދިރިއުޅުއްވި ނަމަވެސް އެމަނިކުފާނަށްފަހު މަޖިލިސް ރައީސްކަން ކުރެއްވި މުހައްމަދު އަސްލަމް މުރައިދޫގޭގައި ދިރިނޫޅުއްވަ އެވެ. އަދި މިހާރުގެ މަޖިލިސް ރައީސްވެސް މިހާތަނަށް ދިރިއުޅުއްވަމުން ގެންދަވަނީ އަމިއްލަ ގެކޮޅުގަ އެވެ.
އަބްދުއްރަހީމް މަޖިލިސް ރައީސްކަމާއި ހަވާލުވެވަޑައިގެންނެވުމަށްފަހު ދެ މަސްދުވަސް ވެފައިވާއިރު މަޖިލީހުގެ މީޑިއާ ޑިރެކްޓަރު ހަސަން ޒިޔާއު ވިދާޅުވީ މުރައިދޫގެ މަރާމާތު ކުރުމުގެ މަސައްކަތް ފިނޭންސް މިނިސްޓްރީން ކުރަމުން ގެންދާ ކަމަށެވެ. އެހެންކަމުން އަބްދުއްރަހީމް މުރައިދޫގެއަށް ބަދަލުވެވަޑައިގެންނެވުމާއިމެދު ގޮތެއް ނިންމާނީ މަރާމާތަށްފަހު އެތަން މަޖިލީހާއި ހަވާލު ކުރުމުން ކަމަށް ޒިޔާއު ވިދާޅުވި އެވެ.
މަޖިލިސް ރައީސްގެ ރަސްމީ ގެކޮޅުގެ ގޮތުގައި މުރައިދޫގެ ހަމަޖެއްސުމުގެ ކުރިން ދައުލަތުން ރަސްމީ ގެކޮޅު ކަނޑައަޅުއްވާފައިވަނީ ހަމައެކަނި ރައީސުލްޖުމްހޫރިއްޔާ އަށާއި އެމަނިކުފާނުގެ ނައިބަށެވެ. އެގޮތުން ރައީސް ދިރިއުޅުއްވަނީ މުލިއާގޭގަ އެވެ. އަދި ނައިބު ރައީސް ދިރިއުޅުއްވަނީ ހިލާލީގޭގަ އެވެ.
