ގުރުއާނާ ބެހޭ ކޯސްތައް އޮންލައިންކޮށް ކިޔަވައިދިނުމުގެ ހުއްދަދީފި
ގުރުއާން އުނގަންނައިދިނުމާއި ގުރުއާނާ ގުޅުންހުރި ދާއިރާތަކުގެ މާއްދާތައް އީ-ލާނިން މޮޑަލިޓީގެ ދަށުން އުނގަންނައިދުނުމަށް ބަދަލުތަކެއް ގެނެސްފި އެވެ.
މާއްދާތައް އޮންލައިންކޮށް ކިޔެވެމުގެ ހުއްދަ ދީފައިވަނީ އިސްލާމީ ކަންތައްތަކާބެހޭ ވުޒާރާގެ ލަފާގެމަތިން ކަމަށް އިއްޔެ މޯލްޑިވްސް ކޮލިފިކޭޝަންސް އޮތޯރިޓީ، (އެމްކިޔުއޭ) އިން ނެރުނު ބަޔާނެއްގައި ބުންޏެވެ.
އެމްކިއުއޭގެ ސީއީއޯ މަރިޔަމް ފިޒާނާ ރަޝީދު ވިދާޅުވީ ރާއްޖޭގައި ކޯސްތައް އޮންލައިންކޮށް ކިޔަވައިދިނުމުގެ ގައިޑްލައިނެއް ތައާރަފް ކުރީއްސުރެން، އޮންލައިންކޮށް ކިޔަވައިނުދެވޭނެ 8 ދާއިރާއެއް ހިމެނޭ ކަމަށެވެ. އެދާއިރާތަކުގެ ތެރޭގައި ގުރުއާނުގެ ކޯސްތައްވެސް ހިމެނެ އެވެ. އެހެން ނަމަވެސް ގައިޑްލައިންގައި އޮންލައިންކޮށް ކިޔަވައިނުދެވޭނެ ކަމަށް ބުނާ ދާއިރާތަކުގެ ކޯސްތައް، ކަމާބެހޭ ފަރާތްތަކާ ވާހަކަ ދައްކައިގެން އޮންލައިންކޮށް ކިޔަވައިދެވޭތޯ ބަލަމުންދާ ކަމަށް ފިޒާނާ ވިދާޅުވި އެވެ.
މި ލިބުނު ހުއްދާގައި މައާނިލް ގުރުއާން އަދި އުލޫމުލް ގުރުއާން ހިމެނެ އެވެ. މީގެ އިތުރުން ތިލާވާ އަދި ހިފްޒު ފަދަ ކޯސްތައް ހިމެނޭކަމަށް އެމްކިއުއޭއިން ބުންޏެވެ. ކޮންމެ މާއްދާއެއް އޮންލައިންކޮން ގެންދެވުނު ނަމަވެސް މާއްދާ އާއި ގުޅޭ އިމްތިހާންތައް ބާއްވަންޖެހޭނީ ފޭސް ޓު ފޭސް ކޮށެވެ.
އެމްކިއުއޭގެ އީލަރނިން ގައިޑްލައިންގައި ބަޔާންކުރާގޮތުގައި އޮންލައިންކޮށް ކޯހެއް ކުރިއަށް ގެންދެވޭނީ އެ ދާއިރާގެ ގާނޫނީ ބާރުލިބިފައިވާ ކައުންސިލްތަކާއި، ކަމާބެހޭ ރެގިއުލޭޓަރީ އިދާރާތަކުން އީލާނިން ޑެލިވަރީ މޮޑަލިޓީން ކިޔަވައިދިނުމަށް ހުއްދަ ލިބުމުންނެވެ.
Ads by STO
