މޫލީ މެދުވެރިކޮށް ކޮންމެ ގެއަކަށް ފުއާދުގެ ބަޔޯގްރަފީ ޑެލިވަރީ ކޮށްދެނީ
އީ ކޮމާސް ޕްލެޓްފޯމް މޫލީ މެދުވެރިކޮށް، އިލެކްޝަންސް ކޮމިޝަން (އީސީ) ގެ ރައީސް ފުއާދު ތައުފީގުގެ ބަޔޯގްރަފީ ފޮތަށް ޕްރީ އޯޑަރަށް ހުޅުވާލައިފި އެވެ.
އުރީދޫ މޯލްޑިވްސްއިން ބުނީ ޕްރީ އޯޑަރަށް ހުޅުވާލާފައިވާއިރު މޫލީ ވެބްސައިޓުން އޯޑަރު ދިނުމުން، މި ފޮތް ނެރުމާ އެކު އަންނަ ހަފުތާގެ ތެރޭގައި ރާއްޖޭގެ ކޮންމެ ރަށެއްގެ ކޮންމެ ގެއަކަށް މި ފޮތް ޑެލިވަރީ ކޮށްދޭނެ ކަމަށެވެ. މި ފޮތުގެ އަގަކީ 200 ރުފިޔާ އެވެ.
އުމުރުން 69 އަހަރުގެ ފުއާދުގެ ހަޔާތުގެ މުހިންމު ހުރިހާ ވާހަކަތަކެއް 190 ސަފުހާގެ މި ފޮތުގައި ހިމެނެ އެވެ. އެގޮތުން ފުއާދުގެ ތުއްޕުޅުއިރުގެ ދުވަސްތަކުން ފެށިގެން ސްކޫލު ދުވަސްތަކާއި މަތީ ތައުލީމު ހާސިލުކުރެއްވި ދުވަސްތަކުގެ އިތުރުން ގައުމީ ހިދުމަތުގެ ދުވަސްތައް ހިމަނާފައިވެ އެވެ.
ފުއާދުގެ ބަޔޯގްރަފީ ލިޔުއްވާފައި ވަނީ ސަން އޮންލައިންގެ މެނޭޖިން އެޑިޓަރު - ޑިރެކްޓާ ނިއުސް، އަހްމަދު ސާއިލު އަލީ އެވެ.
ތަޅަމުދިގޭ މުހައްމަދު ތައުފީގާއި ހާޖަރޭގޭ ސިއްތިގެ ފުއާދު ތައުފީގު ދިވެހީން ދަންނަން ފެށީ ތަފާސް ހިސާބަށް ކުޅަދާނަ މީހެއްގެ ގޮތުގަ އެވެ. ރާއްޖެއަށް އަލަށް ކޮމްޕިއުޓަރު ގެނެސްގެން، އޭގެ ބޭނުންކޮށްގެން އޭނާ ބޯހިމެނުމުގެ މަސައްކަތް އެހެން ހަރުފަތަކަށް ގެންދެވި އެވެ. ސާކުގެ ސެކްރެޓިއޭޓުގައި ވެސް އޭނާ ވަޒީފާ އަދާކުރެއްވި އެވެ.
ދިވެހީންގެ އިހުތިރާމު އޭނާ އެންމެ ބޮޑަށް ހޯއްދެވީ އިލެކްޝަންސް ކޮމިޝަނުގައި ކުރެއްވި މަސައްކަތުންނެވެ. ރާއްޖެއަށް ޑިމޮކްރަސީ ތައާރަފުވެ، ދެފުށް ފެންނަ ގޮތަށް އިންތިހާބުތައް ބާއްވަން ގާނޫނު ލާޒިމު ކުރުމުން، އެ މަސައްކަތް ފުރިހަމަކޮށް ގެންދެވުމުގައި ފުއާދު އަދާކުރެއްވި ދައުރު، ދިވެހި ތާރީހުގައި ވަނީ ލިޔެވިފަ އެވެ.
މި ފޮތް ލިޔުއްވި ސާއިލު ވިދާޅުވެފައިވާ ގޮތުގައި ފުއާދުގެ ހިދުމަތްތެރި ހަޔާތަކީ ގިނަ އިބުރަތްތަކެއް ލިބެނިވި ކަމެއް ކަމުގަ އެވެ. އެގޮތުން ސިޔާސީ ގޮންޖެހުންތަކާއި ވާދަވެރިކަމުގައި ފިތި، އެކަށީގެންވާ ގޮތަށް މަސައްކަތް ނުކުރެއްވޭ ހާލަތުގައި ވެސް ފުއާދު ދެއްކެވި ހިތްވަރު ފޮތުގައި ބުނެދީފައިވާނެ ކަމަށް ސާއިލު ވިދާޅުވި އެވެ.
"ވެރީންނަށް ރައްޔިތުންގެ އިތުބާރު ކުޑަވެފައިވާ ޒަމާނެއްގައި ފުއާދަކީ ދިވެހީންނަށް ލިބުނު މުތެއް. އެއީ ހިންގުމާއި ރޭވުމާއި ތަންފީޒު ކުރެއްވުމުގައި އެފަދަ ދެވަނައެއް ނެތް ފަދަ ފަސްމީރުކުރި ރުކެއް. މި ފޮތަކީ އޭނާގެ ހަޔާތުނާމާ. އެންމެ ތުއްތުއިރުން ފެށިގެން މިއަދާ ހަމަޔަށް ހަޔާތުގައި ދިމާވި ހުރިހާ ކަމެއް ހިމެނޭނެ. ހިތާމަތަކާއި އުފާތައް ވެސް. ތަޖުރިބާތަކާއި ގޮންޖެހުންތައް ވެސް. ކާމިޔާބާއި ފިލާވަޅުތަކާއި ލޯތްބާއި ބޭވަފާ ވެސް،" ސާއިލު ވިދާޅުވި އެވެ.
ސާއިލު ވިދާޅުވީ މި ފޮތުން ލިބޭނެ އެންމެ ބޮޑު މެސެޖަކީ އެންމެން ލޯބިވާ އަދި އިހުތިރާމުކުރާ މީހަކަށްވާން ފުއާދު ގެންގުޅުއްވި ޕްރިންސިޕަލްތައް ކަމަށެވެ. އަދި ގޮންޖެހުންތަކާއި ހިތާމަތަކާ ކުރިމަތިވުމުން ފުއާދު އަމަލު ކުރައްވާ ގޮތަކީ އިބުރަތަކަށް ފުދޭނެ ކަންކަން ކަމަށް އޭނާ ވިދާޅުވި އެވެ.
"ފޮތް މިހާރު ފާސްކޮށް ޕްރިންޓިންގެ މަސައްކަތުގައި މި އުޅެނީ. މި މަސް ތެރޭގައި މި ފޮތް ނެރުމުގެ މަސައްކަތް މި އަންނަނީ ކުރަމުން. ފަސޭހަކަމާ އެކު ބައްލަވާލެއްވުމުގެ އިންތިޒާމު ހަމަޖައްސާނަން އަޅުގަނޑުމެން،" ސާއިލު ވިދާޅުވި އެވެ.
މި ފޮތް ލިޔުއްވި ސާއިލުގެ ލިޔުންތެރިކަމުގެ ދައުރު ފެށުނީ ނޫސްވެރިކަމުގެ ތެރެއިންނެވެ. އެ ރޮނގުން ކުރިއަށް ގޮސް އޭނާ ވަނީ މިހާތަނަށް ދެ ފޮތެއް ލިޔެ ޝާއިއުކޮށްފަ އެވެ. އެއީ އާންމުންގެ މަގުބޫލުކަން ވަރަށް ބޮޑަށް ލިބުނު އޭނާގެ އަމިއްލަ ނަފުސާނީ ހަޔާތުގެ މައްޗަށް ލިޔުނު "އެ ދުވަސް ގެނެވޭނެ" ފޮތާއި ކުރީގެ ނައިބު ރައީސް ފައިސަލް ނަސީމުގެ ހަޔާތްޕުޅުގެ މައްޗަށް ލިޔުނު 'ފައިސަލް ނަސީމް' ފޮތެވެ. ފުއާދުގެ ބަޔޯގްރަފީއަކީ ސާއިލުގެ ތިންވަނަ ފޮތެވެ.
