ރައްޔިތުންނާ ގުޅޭ ޓެކުހަށް ބަދަލެއް ނުގެންނާނަން: ޝަފީގު
ދައުލަތުން މިހާރު އަދާކުރަން ޖެހިފައިވާ ދަރަނިތައް ދައްކާނީ ރައްޔިތުންގެ އަތުން ނަގާ ޓެކްސް ބޮޑު ނުކޮށް ކަމުގައި ފިނޭންސް މިނިސްޓަރު ޑރ. މުހައްމަދު ޝަފީގު މިއަދު ވިދާޅުވެއްޖެ އެވެ.
ރައްޔިތުންގެ މަޖިލިހުގެ މާލިއްޔަތު ކޮމިޓީގައި ކުރިއަށް ގެންގޮސްފައި ވަނީ މިނިސްޓްރީން ފޮނުވާފައިވާ ކުއާޓާލީ ޑެބްޓް ބުލެޓިން، ފިސްކަލް ސްޓްރެޓެޖީ ބަޔާނާ އަދި މެދު ރާސްތާގެ ދަރަނީގެ ސްޓެރެޓެޖީ ބަޔާނާ ގުޅޭގޮތުން ފިނޭންސް މިނިސްޓްރީގެ ބޭފުޅުންނާ ބައްދަލުކޮށް މައުލޫމާތު ސާފުކުރުމެވެ.
ފިނޭންސް މިނިސްޓްރީން ގެންނަން ނިންމާފައިވާ ރިފޯމްތަކާ ގުޅިގެން ދިއްގަރު ދާއިރާގެ މެމްބަރު އަދި މަޖިލިހުގެ ނައިބު ރައީސް އަހްމަދު ނާޒިމް ވަނީ މިނިސްޓްރީން ހުށަހަޅާފައިވާ ކަންތަކުގެ ތެރެއިން 6.5 ބިލިއަން ރުފިޔާ އިތުރަށް ލިބޭނެ ކަމަށް ފާހަގަކޮށްފައިވާތީ އެ އަދަދަށް ފައިސާ ހޯދަން ނިންމާފައިވާ ގޮތަކީ ކޮބައިކަން ސާފު ކުރުމަށް ސުވާލު ކުރައްވާފަ އެވެ.
އެ ސުވާލަށް ޖަވާބު ދެއްވާ މިނިސްޓަރު ވިދާޅުވީ ހިމަނާފައިވާ އަދަދުތަކަކީ ހާސިލުކުރަން ބޭނުންވާ އަމާޒުތަކެއް ކަމަށެވެ. އެކަން ކުރުމުގައި އޮންނަނީ ދެ ގޮތެއް ކަމަށެވެ. އެއްގޮތަކީ ފުރަތަމަ ސްޓޭކްހޯލްޑާސް އާ ކޮންސަލްޓް ކުރުން ކަމަށެވެ. ކުރުމަށް ފަހު ގޮތެއް ކަނޑައެޅުން ކަމަށެވެ. އަނެއް ގޮތަކީ ގޮތްތަކެއް ކަނޑައަޅާފައި ސްޓޭކްހޯލްޑާސް އާ ކޮންސަލްޓް ކުރުން ކަމަށެވެ. ކުރިއަށް ދަނީ ބަޖެޓުގެ އިނިޝިއަލް މަރުހަލާކަމުން ކުރިއަށް އޮތް ތަނުގައި މިކަންކަން ތަފުސީލު ކުރެވޭނެ ކަމަށް ވިދާޅުވި އެވެ.
"މީގައި އަޅުގަނޑުމެން ބަލާފައި އިންނާނީ ކުރިން ވެސް ދެންނެވި ގޮތަށް ރޭޓުތަކަށް އާންމުކޮށް ހުރިހާ ފަރުދުންނަށް، ރައްޔިތުންނާ ގުޅިފައި ހުންނަ. އެ ރޭޓުތަކަށް އެއްވެސް ކަހަލަ ބަދަލެއް ނުގެނެސް ޓެކްސް ވެސް ފުޅާކުރުމަށް ޓަކައި،" ޝަފީގް ވިދާޅުވި އެވެ.
ސޮވެރިން ފަންޑަށް ޖަމާކުރެވޭނެ އިތުރު ގޮތްތައް މުރާޖައާކޮށްފައި، ސްޓޭކްހޯލްޑާސް މަޝްވަރާގެ މަތިން އަދަދުތަކެއް ކަނޑައަޅުއްވާނެކަން ވެސް ފާހަގަ ކުރެއްވި އެވެ.
