ފޮރިން އިންވެސްޓްމެންޓް ބިލު ހިމެނޭހެން ތިން ބިލެއް ކޮމިޓީން ފާސްކޮށްފި
ރައްޔިތުންގެ މަޖިލީހަށް ހުށަހެޅިފައިވާ ފޮރިން އިންވެސްޓްމެންޓް ބިލާއި، ވިޔަފާރި ރެޖިސްޓްރީ ކުރުމުގެ ގާނޫނަށް އިސްލާހު ގެނައުމުގެ ބިލާ އަދި ދިވެހިރާއްޖޭގެ މާލީ ސެކިއުރިޓީސް އާ ބެހޭ ގާނޫނަށް އިސްލާހު ގެނައުމުގެ ބިލު ދިރާސާ ކުރުމުގެ މަސައްކަތް އިގުތިސޯދީ ކޮމިޓީން ނިންމާ ތަޅުމަށް ފޮނުވަން މިއަދު ފާސްކޮށްފި އެވެ.
މިއަދު ކުރިއަށް ދިޔަ ކޮމިޓީ ބައްދަލުވުމުގައި މި ތިން ބިލަށް ވެސް ވަކި ވަކިން ވޯޓަށް އަހާފައިވެ އެވެ. ތިން ބިލު ވެސް ފާސްކޮށްފައިވަނީ ކޮމިޓީއަށް ހާޒިރުވެވަޑައިގެން ތިއްބެވި 6 މެންބަރުންގެ އިއްތިފާގުންނެވެ. އެއާއެކު ދެން އެ ތިން ބިލުގެ ރިޕޯޓް ދާނީ މަޖިލީހުގެ ތަޅުމަށެވެ. ތަޅުމުން ބިލު ފާސްކުރާނީ ކޮމިޓީ ރިޕޯޓަށް ބަހުސް ކުރުމަށް ފަހު އެވެ.
ފޮރިން އިންވެސްޓްމެންޓް ބިލު
އެ ބިލަކީ ސަރުކާރުގެ ފަރާތުން ހިތަދޫ މެދު ދާއިރާގެ ކޮންގްރެސް ޕާޓީ މެމްބަރު އަހުމަދު އަޒާން މަރުޒޫގު ހުށަހެޅި ބިލެކެވެ.
މި ބިލަކީ ރާއްޖޭގައި ބޭރުގެ ފަރާތްތަކަށް އިންވެސްޓްކުރެވޭނެ ދާއިރާތައް ކަނޑައެޅުމާއި، އެފަދަ ފަރާތްތަކަށް އިންވެސްޓް ކުރުމުގެ ހުއްދަ ދުކުރުމާ ގުޅޭ އުސޫލުތަކާއި އަދި އިންވެސްޓަރުންގެ ހިމާޔަތާ ރައްކާތެރިކަމާއި ގުޅޭ އުސޫލުތައް ބަޔާންކޮށްފައިވާ ބިލެކެވެ. އަދި އެފަދަ އިންވެސްޓްމެންޓްތައް ދައުލަތަށް ނެގޭނެ ހާއްސަ ހާލަތްތަކާއި، އެފަދައިން ދެވޭ އިންވެސްޓްމެންޓްތަކަށް ބަދަލުދެވޭނެ އުސޫލުތައް އެ ބިލުގައި ހިމަނާފައިވެ އެވެ.
މިއަދު ކޮމިޓީ ބައްދަލުވުމުގައި ކެނދިކުޅުދޫ ދާއިރާގެ ކޮންގްރެސް ޕާޓީގެ މެމްބަރު މުހައްމަދު އަފޫ ހާމިދު ވަނީ އޭގެ ކުރީގެ ބައްދަލުވުމުގައި ނިންމި ބައެއް ކަންތައްތަކުގެ ތެރެއިން އެޓާނީ ޖެނެރަލް އޮފީހުގެ ކޮމެންޓަށް ރިއާޔަތްކޮށް ބިލަށް 3 އިސްލާހެއް ހުށަހަޅާފަ އެވެ.
ތިނަދޫ އުތުރު ދާއިރާގެ ކޮންގްރެސް ޕާޓީގެ މެމްބަރު ސައުދުﷲ ހިލްމީގެ އިތުރުން ކެންދޫ ދާއިރާގެ އެމްޑީޕީގެ މެމްބަރު މައުރޫފް ޒާކިރު (މަޓޭ) ވެސް އިސްލާހެއް ހުށަހެޅި އެވެެ. އެކަމަކު ފާސްކޮށްފައިވަނީ އަފޫއާ ސައުދުﷲ ހުށަހެޅި އިސްލާހެވެ. މަޓޭގެ އިސްލާހު ފާހެއް ނުވެ އެވެ.
ވިޔަފާރި ރެޖިސްޓްރީ ބިލު
ސަރުކާރުގެ ފަރާތުން ފަރެސްމާތޮޑާ ދާއިރާގެ ކޮންގްރެސް މެމްބަރު އަޝްރަފް ރަޝީދު ހުށަހެޅި މި ބިލަކީ ބޭރުގެ ފަރާތްތަކުން ރާއްޖޭގައި ސެކިއުރިޓީޒް ގައި އިންވެސްޓް ކުރެވޭނެ ދާއިރާ ކަނޑައެޅުމާއި އެ ނޫންވެސް ކަމާއި ގުޅޭ މައިގަނޑު އުސޫލުތައް ބަޔާން ކުރުމަށްޓަކައި ވިޔަފާރި ރަޖިސްޓްރީކުރުމުގެ ގާނޫނަށް ގެންނަން ޖެހޭ އިސްލާހުތައް ގެނައުމެވެ. މި ބިލު ކޮމިޓީން ފާސްކޮށްފައިވަނީ އަފޫ ހުށަހެޅި ދެ އިސްލާހާ އެކު އެވެ.
މާލީ ސެކިއުރިޓީސް އާ ބެހޭ ގާނޫނަށް
ސަރުކާރު ފަރާތުން މި ބިލު މަޖިލީހަށް ހުށަހަޅާފައިވަނީ އަފޫ އެވެ. މި ބިލަކީ ވިޔަފާރި ރަޖިސްޓްރީކުރުމުގެ ގާނޫނާ އެއްގޮތްވާ ގޮތުގެ މަތިން ބޭރުގެ ފަރާތްތަކަށް ރާއްޖޭގައި ހުއްދަކުރެވޭ ސެކިއުރިޓީޒްގެ ބާވަތްތަކުގައި އިންވެސްޓް ކުރެވޭނެ އުސޫލުތައް ކަނޑައެޅުމަށްޓަކައި މާލީ ސެކިއުރިޓީސް އާ ބެހޭ ގާނޫނަށް ގެންނަން ޖެހޭ އިސްލާހުތައް ބަޔާކޮށްފައިވާ ބިލެކެވެ.
މި ބިލަށް އަފޫ ތިން އިސްލާހެއް ހުށަހެޅިއިރު އެ ތިން އިސްލާހުވެސް ފާސްވި އެވެ.
އެއަށް ފަހު ފޭދޫ އުތުރު ދާއިރާގެ ކޮންގްރެސް ޕާޓީގެ މެމްބަރު އިސްމާއީލް ނިޒާރު ހުށަހެޅީ އެ ތިން ބިލަށް ކޮމިޓީން ގެނައި ބަދަލުތަކާ އެކު ފާސް ކުރުމަށެވެ. އޭނާގެ އެ ހުށަހެޅުމަށް ތާއީދު ކުރެއްވީ މައްޗަންގޮޅި މެދު ދާއިރާގެ މެމްބަރު އަހްމަދު ޒަމީރެވެ.
އެގޮތަށް ފާސް ކުރުމަށް ފެނޭތޯ ވޯޓަށް އެހުމުން ކޮމިޓީއަށް ހާޒިރުވެ ތިއްބެވި ހަ މެމްބަރުންގެ ތެރެއިން ފަސް މެމްބަރުންގެ އިއްތިފާގުން އެ ހުށަހެޅުން ވަނީ ފާސްކޮށްފަ އެވެ. އެއާއެކު ތިން ބިލުގެ ކޮމިޓީ މަރުހަލާ ވަނީ ނިންމާލާފަ އެވެ.
