ފަލަސްތީން ޓެލެތޯނުން ލިބުނު 19 މިިލިއަން ރުފިޔާ އަންރުއާ ހަވާލުކޮށްފި
ރާއްޖެއިން ފަލަސްތީނުގެ ރައްޔިތުންނަށް އެހީވުމުގެ ގޮތުން "ފަލަސްތީނާއި އެކު ދިވެހީން" ނަމުގައި ދައުލަތުގެ މީޑިއާ ޕީއެސްއެމުން ކުރިއަށްގެންދިޔަ ޓެލެތޯނަށް ލިބުނު 19 މިލިއަން ރުފިޔާ އދ. ގެ ޖަމިއްޔާ ޔުނައިޓެޑްނޭޝަންސް ރިލީފް އެންޑް ވޯކްސް އެޖެންސީ ފޯ ޕަލަސްޓައިން ރެފިއުޖީސް (އަންރުއާ) އާ ހަވާލުކޮށްފައިވާ ކަމަށް ފޮރިން މިނިސްޓްރީން މިއަދު ބުނެފި އެވެ.
ފޮރިން މިނިސްޓްރީން "ދެން އޮންލައިން" އަށް ފޮނުވި މެސެޖެއް ގައި ބުނީ އެ ފައިސާ އަންރުއާގެ އެކައުންޓަށް ފޮނުވާފައިވަނީ ފިނޭންސް މިނިސްޓްރީ އާއި މަރުކަޒީ ބޭންކާ މޯލްޑިވްސް މަނިޓަރީ އޮތޯރިޓީ (އެމްއެމްއޭ) މެދުވެރިކޮށް ކަމަށެވެ.
ރައީސް ޑރ މުހައްމަދު މުއިއްޒުގެ އިރުޝާދުގެ ދަށުން ޖޫން މަހުގެ 12 ވަނަ ދުވަހު ކުރިއަށްގެންދިޔަ ޓެލެތޯން ގައި ފައިސާގެ ގޮތުގައި 19،309،468.02ރ ލިބުނެވެ. ޓެލެތޯނަށް ލިބުނު ފައިސާގެ ތެރެއިން 15 މިލިޔަނަކީ އޮންލައިން ޓްރާންސެކްޝަންގެ ގޮތުގައި ލިބިފައިވާ ފައިސާ އެވެ. އަދި އޮންލައިން ޓްރާންސެކްޝަންގެ ގޮތުގައި 37919 ޑޮލަރުވެސް ލިބިފައި ވެއެވެ.
އެ ޓެލެތޯނަށް ރައީސް އާއި ނައިބް ރައީސްގެ އިތުރުން ރައްޔިތުންގެ މަޖިލީހުގައި ޕީއެންސީ ތަމްސީލުކުރައްވާ މެންބަރުންވެސް ފައިސާ ހަދިޔާކޮށްފައިވެ އެވެ. އެ ޓެލެތޯންގައި ފޮރިން މިނިސްޓަރު މޫސާ ޒަމީރު ވަނީ ރާއްޖެއިން ފަލަސްތީނަށް ފައިސާގެ އެހީގެ ގޮތުގައި ދޭ އަދަދު އިތުރުކުރުމަށް ނިންމާފަައިވާކަން އިއުލާންކޮށްފަ އެވެ.
ޒަމީރު ވިދާޅުވީ ފާއިތުވި އަހަރުތަކުގައި ރާއްޖޭގެ ދައުލަތުން ރަމްޒީ އެހީގެ ގޮތުގައި ފަލަސްތީނަށް 5000 އެމެރިކާ ޑޮލަރު ދެމުންދާ ކަމަށެވެ. ނަމަވެސް އެ އަދަދު 50،000 ޑޮލަރަށް އިތުރުކުރަން ރައީސް މުއިއްޒު ނިންމަވާފައިވާ ކަމަށެވެ.
އިޒްރޭލުން ފަލަސްތީނަށް ދެމުންގެންދާ ލާއިންސާނީ އަނިޔާތަކުން ފަލަސްތީނު ސަލާމަތްކޮށް، އެކަމުގައި ރާއްޖެއިން އަޑުއުފުލުމުގެ ގޮތުން ހިނގާލުމެއް ބާއްވަން ވަޒީރުންގެ މަޖިލީހުން ޖޫން މަހު ވަނީ ނިންމަވާފަ އެވެ. އެހެން ސަރުކާރުތަކެކޭ އެއްފަދައިން އިޒްރޭލުން ފަލަސްތީނަށް ދެމުންދާ ހަމަލާތައް މި ސަރުކާރުންވެސް ދަނީ ކުށްވެރި ކުރަމުންނެވެ.
