ސަފީރުންނަށް އުނދަގޫކުރި ކަމުގެ ތުހުމަތުގައި ދެ އަންހެނަކު ހައްޔަރުކޮށްފި

ރާއްޖޭގައި ހުރި ބޭރުގެ ބައެއް ޑިޕްލޮމެޓިކް މިޝަންތައް ކައިރިއަށް އެއްވެ އުޅުނު ދެ އަންހެނަކު، ސަފީރުންނަށް އުނދަގޫކޮށް ގާނޫނާ ހިލާފަށް އެއްވުމުގެ ތުހުމަތުގައި ހައްޔަރުކޮށްފި އެވެ.

Ads by STELCO

ހައްޔަރުކުރި ދެ އަންހެނުންނަކީ؛

• އާއިޝަތު ޝާދިޔާ، މ. ބަޑިކުޅިމާގެ (47 އަހަރު)
• ޑރ. ޝަޒުރާ އިބްރާހީމް، ގދ. ރަތަފަންދޫ، ލިލީގެ (36 އަހަރު)

މިއަދު މެންދުރުފަހު އެކެއް ޖަހާކަށް ހާއިރު ހައްޔަރުކުރި ދެ އަންހެނުންނަކީ އިޒްރޭލާ ދެކޮޅަށް ރާއްޖޭގައި ހިންގާ ހަރަކާތްތަކުގައި ބައިވެރިވެ އުޅޭ ދެ ހަރަކާތްތެރިންނެވެ. ޑިޕްލޮމެޓިކް މިޝަންތައް ކައިރިއަށް އެއްވެ އަޑު އުފުލަމުން ގޮސްފައިވަނީ ވެސް އެ ކަންކަމާ ވެސް ގުޅޭ ގޮތުންނެވެ.

ދިވެހި ފުލުހުންގެ ހިދުމަތުން މިރޭ ނެރުނު ބަޔާނެއްގައި ބުނީ އެ މީހުން ހައްޔަރުކުރީ ސުލްހަވެރިކަމާ އެކު އެއްވެ އުޅުމުގެ ގާނޫނާ ހިލާފަށް ޑިޕްލޮމެޓިކް މިޝަންތަކުގެ ކައިރިއަށް ތަކުރާރުކޮށް އެއްވެ، އަޑުގަދަކުރާ ބޭނުންކޮށްގެން ބޭއަދަބީ ބަހުރުވައިން މުއާމަލާތް ވެސް ކޮށްފައިވާތީ ކަމަށެވެ.

އޭގެ އިތުރުން ތަކުރާރުކޮށް އެ ސަރަހައްދުން ދިއުމަށް ފުލުހުން އެދުމުން ފުލުހުންގެ އަމުރަށް ނުކިޔަމަންތެރިވުމާއި ފުލުހުންގެ ވާޖިބަށް ހުރަސް އެޅި ކަމަށް ވެސް އެ ދެ މީހުނަށް ފުލުހުން ތުހުމަތުކޮށްފައިވެ އެވެ.