ގައުމިއްޔަތަށް ހިދުމަތްކުރުމުގެ ޝަރަފް ހުސައިން ސަލާހުއްދީންގެ ހަނދާނަށް އަރުވަނީ
ދިވެހި ގައުމިއްޔަތަށް ހިދުމަތް ކުރުމުގެ އެންމެ މަތިވެރި ޝަރަފު ހުސައިން ސަލާހުއްދީންގެ ހަނދާނަށް އެރުވުމަށް ރައީސް ޑރ. މުހައްމަދު މުއިއްޒު ކަނޑައަޅުއްވައިފި އެވެ.
އެގޮތަށް ކަނޑައެޅުއްވީ ދިވެހި ގައުމިއްޔަތު އެންމެ އިސް ބަހާތައް ކަމަށްވާ, ދިވެހީންގެ ދީނާއި ދިވެހީންގެ ދިވެހިބަހާއި ތަރިކައާއި ސަގާފަތާ ގުޅުން ހުރި ރޮނގުތަކުން ދިވެހީންގެ ވިސްނުމާއި ފިކުރީ ތަރައްގީއަށް މަގުފަހިކޮށްދިނުމަށް އިލްމުގެ ނޫރު ފެތުރުއްވުމަށް ސަލާހުއްދީން ކުރެއްވި ހިދުމަތަށްޓަކަ އެވެ.
އެ ޝަރަފަށް ރައީސް ދެއްވާނީ ޝަރަފުގެ އައްޑަނަ އެވެ. އެ އައްޑަނަ އެރުވުން އޮންނާނީ މި އަހަރުގެ ގައުމީ ދުވަހުގެ މުނާސަބަތުގައި މާދަމާ ހެނދުނު 9 ޖަހާއިރު ދަރުބާރުގޭގައި ބާއްވާ ރަސްމިއްޔާތުގަ އެވެ.
އެ ޝަރަފަކީ ދިވެހި ގައުމިއްޔަތަށް ފާހަގަކޮށްލެވޭ ފަދަ ހިދުމަތްތަކެއް ކުރައްވާފައިވާ ބޭފުޅުންނަށް ރައީސް ދެއްވާ އެންމެ މަތިވެރި ޝަރަފެވެ. އެ ޝަރަފު ދެއްވުމަށް ރައީސް ކަނޑައެޅުއްވީ އިއްޒަތުގެ ގާނޫނުގެ ދަށުން ރައީސުލްޖުމްހޫރިއްޔާއަށް ލިބިވަޑައިގަންނަވާ އިހްތިޔާރުގެ ދަށުންނެވެ.
މާދަމާ ބާއްވާ ޖަލްސާގައި ޝަރަފުވެރިކަމުގެ ގައުމީ އިނާމާއި ހިތްވަރު ދިނުމުގެ ގައުމީ އިނާމު ދެއްވާނެ އެވެ. އެގޮތުން ޝަރަފުވެރިކަމުގެ ގައުމީ އިނާމު 7 ބޭފުޅަކަށް ލިބިވަޑައިގަންނަވާއިރު އެތަނުން އެއް ބޭފުޅަކަށް އިނާމު އަރުވަނީ ދެމިހުންނަނިވި ހާއްސަ ހިދުމަތެއް ކުރުމުގެ ދާއިރާއިންނެވެ. އެ ބޭފުޅަކީ ހެންވޭރު ހާޖަރާގޭ މުހައްމަދު ތައުފީގެވެ.
ތައުފީގަށް އެ ޝަރަފު އަރުވަނީ ކީރިތި ރަސޫލާ مُحَمَّدُ صَلَّى اللهُ عَلَيْهِ وَسَلَّمَ ގެ ސިޔަރަތު ގެނެސްދެއްވާފައިވާލެއް ފުރިހަމަކަމާއި ސިޔަރަތު އަޑުއެހުމަށް މީހުންގެ ހިތްތަކުގައި އޮންނަ ޝައުގުވެރިކަން އިތުރުކުރެއްވުމަށް ކުރެއްވި ގައުމީ ހިދުމަތަށްޓަކަ އެވެ.
މި އަހަރު ހިތްވަރު ދިނުމުގެ ގައުމީ އިނާމު ލިބިވަޑައިގަންނަވަނީ 10 ބޭފުޅަކަށެވެ. އަދި ކުންފުންޏަކަށެވެ.
Ads by STO
