ހުއްދަތައް ނުނަގައި ޑޮލަރު ވިއްކާ ދެ ތަނެއް ބަންދުކޮށްފި
މާލޭގައި ހުއްދަތައް ނުނަގައި ބޭރު ފައިސާ ގަނެ ވިއްކުމުގެ ހިދުމަތް ދޭ ތަނެއް ބަންދުކޮށްފި އެވެ.
ފުލުހުން ބުނީ އެ ދެތަން ބަންދުކުރީ މާލެ ސިޓީ ޕޮލިހާއި ފުލުހުންގެ އިންޓެލިޖެންސް އަދި އިކޮނޮމިކް މިނިސްޓްރީއާ ގުޅިގެން މާލޭގައި ހިންގި ދެ އޮޕަރޭޝަނެއްގެ ތެރެއިން ކަމަށެވެ.
ދެ ދުވަހެއްގެ މަތިން ހިންގި އޮޕަރޭޝަންގެ ތެރެއިން މި މަހުގެ ތިން ވަނަ ދުވަހު އެންމެ ފުރަތަމަ ބަލާ ފާސްކުރީ "ޓްރާންސްފާ މޯލްޑިވްސް" ގެ ނަމުގައި، ހުއްދަ ނެތި ބޭރު ފައިސާ މާރުކުރުމުގެ ވިޔަފާރި ކުރަމުންދިޔަ ތަނެކެވެ.
އަދި އިކޮނޮމިކް މިނިސްޓްރީން ވަނީ އެ ތަނުގެ ވިޔަފާރި ހުއްޓުވައި، ނޯޓިސް ހަރުކޮށްފަ އެވެ.
އޭގެ އިތުރުން މިއަދުވެސް އެފަދަ އޮޕަރޭޝަނެއް ހިންގައި ވަނީ ބޭރު ފައިސާގެ މުއާމަލާތް ހިންގާ ޗާންދަނީ މަގުގައި ހުންނަ ކާޝިބޯޓް ސުވެނިޔަ ފިހާރަ އެއް ބަލައި ފާސްކޮށްފައިވެ އެވެ.
ފުލުހުން ބުނީ އެތަނަކީވެސް އެމްއެމްއޭއިން ނަގަންޖެހޭ ހުއްދަތައް ނުނަގައި ބޭރު ފައިސާ ގަނެ ވިއްކުމުގެ މަސައްކަތް ކުރަމުންދާ ތަނެއްކަން ފާހަގަކުރެވުމާ ގުޅިގެން ފިހާރައަށް ދީފައިވާ ވިޔަފާރި ކުރުމުގެ ހުއްދަ ވަގުތީގޮތުން ބާތިލުކޮށްފައިވާ ކަމަށެވެ.
އޭގެ އިތުރުން އެ އޮޕަރޭޝަނުގައި، ބޭރު ފައިސާ މާރުކުރުމުގެ ހިދުމަތްދޭ ބައެއް ތަންތަން ބަލައިފާސްކޮށް، ރަނގަޅު ކުރަންޖެހޭ ކަންކަން ރަނގަޅުކުރުމަށް އިރުޝާދުދީފައިވާ ކަމަށް ވެސް ފުލުހުން ބުންޏެވެ.
