ޔަހްޔާ ޝަހީދުކޮށްލުން: އަދާލަތު ޕާޓީގެ ތައުޒިޔާ!
ފަލަސްތީނުގެ ހައްގުގައި ޖިހާދުކުރަމުން އަންނަ ހަރަކަތުލް މުގާވަމަތުލް އިސްލާމިއްޔާ (ހަމާސް) ގެ ލީޑަރު އަލްގާއިދު ޔަހްޔާ ސިންވާރު އަބޫ އިބްރާހިމް ޝަހީދުކޮށްލުމާ ގުޅިގެން އަދާލަތު ޕާޓީން ތައުޒިޔާ ކިޔައިފި އެވެ.
މިދިޔަ ބުރާސްފަތި ދުވަހު ޔަހްޔާ އަވަހާރަކޮށްލުމާ ގުޅިގެން އަދާލަތު ޕާޓީން މިއަދު ނެރުނު ބަޔާނުގައި ބުނީ ބިންތައް ފޭރެންވެގެން ޣައްޒާއަށް އަރައިގަނެގެން އުޅުނު ސިފައިންނާ ޔަހްޔާ ކުރިމަތިލާ ފަސްޖެހުމެއް ނެތި ހަމަލާ ބަދަލުކުރަމުން ދިޔަ ކަމަށެވެެ.
އަދި އެންމެ ފަހު ހަރަކާތްތުގައި ވެސް އަނިޔާވެރިންނަށް ހަމަލާދިނުމުގައި ޔަހްޔާ ސާބިތުވެ ހުންނެވި ކަމަށް އެ ޕާޓީގެ ބަޔާނުގައި ބުންޏެވެ.
އަދާލަތު ޕާޓީން ބުނީ 1948 ވަނަ އަހަރުން ފެށިގެން އަލްމަސްޖިދުލް އަގްޞާއާއި ފަލަސްތީނުގެ ބިންތައް ހިސޯރުކޮށް, ފަލަސްތީނު ރައްޔިތުންގެ ނަސްލު ނައްތާލުމަށް ޔަހޫދީން ހިންގަމުންދާ ލާއިންސާނީ ޖަރީމާތަކާ ދެކޮޅަށް ކުރިއަށްދާ ޖިހާދު ބިނާވަނީ ވަކި ފަރުދެއްގެ މައްޗަށް ނޫން ކަމަށެވެ. އަދި އެ ޖިހާދަކީ އަމާޒުތައް ވާސިލުވެއްޖެއުމަށް ދާންދެން ކުރިއަށްދާނެ ޖިހާދެއް ކަމަށް އެ ޕާޓީން ބުނެ އެވެ.
ސިހްޔޫނީ އިސްރާއީލަކީ މުޅި އިންސާނިއްޔަތަށް ހުރި ހުތުރެއް ކަމަށް ފާހަގަކޮށް އަދާލަތުން ބުނީ އަނިޔާވެރިކަން ނިމުމަކަށް ގެނައުމަށް އެ ޕާޓީއިން ގޮވައިލާ ގޮވާލުން ތަކުރާރު ކުރާ ކަމަށެވެ. އަދި އިސްރާއީލުގެ ލާއިންސާނީ ޖަރީމާތަށް ބަލައި, ފަލަސްތީނުގެ ރައްޔިތުންނާއި އިންސާނިއްޔަތަށް އިންސާފު ހޯދައި ދިނުމަށް ވެސް އަދާލަތުން ގޮވާލާފައިވެ އެވެ.
"މާތްاللهގެ ވާގިފުޅާއެކު އަލްމަސްޖިދުލް އަގްޞާ މިނިވަންކުރުމަށާއި ފަލަސްތީނުގެ ރައްޔިތުންގެ ހައްގުތައް ހޯދައިދިނުމަށް ވަކާލާތުކުރުމާއި ކުރެވެވެން ހުރި ކޮންމެ މަސައްކަތެއް ކުރުމުގައި މި ޕާޓީން ދެމިއޮންނާނަމެވެ."
ޔަހްޔާ، ހަމާސްގެ ލީޑަރު ކަމަށް އައްޔަން ކުރީ އެ ޖަމާއަތުގެ އެންމެ އިސް ލީޑަރު އިސްމާއީލް ހަނިއްޔާ މިދިޔަ ޖުލައި މަހު ޝަހީދުކޮށްލުމަށްފަހު އެވެ.
