ނަޑެއްލާގައި ނުރައްކާތެރި އެކްސިޑެންޓެއް، އަނިޔާވި ދެ މީހަކު މާލެއަށް!
ގދ. ނަޑެއްލާގައި ރޭ ނުރައްކާތެރި އެކްސިޑެންޓްގައި ހިނގައި އަނިޔާވި ދެ މީހަކު އިތުރު ފަރުވާއަށް މާލެ ގެނެސްފި އެވެ.
"ދެން" އާ ވާހަކަދައްކަމުން އެ ރަށު ކައުންސިލްގެ ރައީސް މުހައްމަދު އަންޝައު ވިދާޅުވީ އެ އެކްސިޑެންޓް ހިނގާފައިވަނީ ރޭ 11:15 ހާއިރު ކަމަށެވެ.
އެކްސިޑެންޓް ހިނގާފައިވަނީ ބާރު ސްޕީޑްގައި ދުއްވާފައި ދިޔަ ސައިކަލެއް، ބަނދަރު މަތީ ބޯޓު އެހެލާ ސަރަހައްދުގައި އޮތް ރަށު ޕިކަޕަކަށް އަރުވަމުން ދިޔަ ލަކުނޑިގަނޑެއްގައި ޖެހިގެންނެވެ. އެއިން ލަކުނޑިގަނޑެއް ވިއްސައިގެން ގޮސް ލަކުނޑިތައް އަރުވަން ހުރި މީހާގެ ގައިގައިވެސް ޖެހުނު ކަމަށް ކައުންސިލު ރައީސް ވިދާޅުވި އެވެ
އަންޝައު ވިދާޅުވީ ސައިކަލުގައި ތިބި 18 އަހަރުގެ ދެ މީހުންނާއި ރަށު ޕިކަޕަށް ލަކުނޑިތައް އަރުވަމުންދިޔަ 47 އަހަރުގެ މީހާ އަށް އެކިވަރުގެ އަނިޔާ ލިބިފައިވާ ކަމަށެވެ. އެހެންނަމަވެސް ބޮޑަށް އަނިޔާވީ ރަށު ޕިކަޕަށް ލަކުނޑިއަރުވަން ހުރި މީހާއަށާއި ސައިކަލު ދުއްވި މީހާއަށް ކަމަށް އަންޝައު ވިދާޅުވި އެވެ.
އަންޝައު ވިދާޅުވީ ސައިކަލު ދުއްވަންއިން މީހާގެ މެޔަށާއި ލަކުނޑި އަރުވަން ހުރި މީހާގެ ބޮލަށް އަނިޔާވެފައިވާ ކަމަށެވެ.
އަންޝައު އިތުރަށް ވިދާޅުވީ އެ ދެ މީހުންނަށް ތިނަދޫ އަބްދުއްސަމަދު މެމޯރިއަލް ހޮސްޕިޓަލްގައި ފަރުވާދިނުމަށްފަހު އިތުރު ފަރުވާއަށް މިއަދު މާލެ ގެނެސްފައިވާ ކަމަށެވެ.
އެކަމާ ގުޅިގެން އައިޖީއެމްއެޗްގެ މީޑިއާ އޮފިޝަލް "ދެން" އަށް ވިދާޅުވީ އެ ދެ މީހުންނަށްވެސް ފަރުވާދެމުން ގެންދަނީ އެ ހޮސްޕިޓަލްގެ އެމެޖެންސީ ރޫމްގައި ކަމަށެވެ.
Ads by STO
