ދުވާލަކު 40 ސިނގިރެޓް ހުސްކުރައްވާ އައްބާސް ނިންމެވީ ސިނގިރެޓް ހުއްޓައިލަން
ދުވާލަކު 40 ސިނގިރޭޓް ހުސްކުރައްވާ ކަމަށާއި، ސިނގިރޭޓް ހުއްޓާލަން ނިންމަވާފައިވާ ކަމަށް ވެލިދޫ ދާއިރާގެ އެމްޑީއޭގެ މެންބަރު މުހައްމަދު އައްބާސް ވިދާޅުވެއްޖެ އެވެ.
އައްބާސް އެކަން ހާމަކުރެއްވީ ދިވެހިރާއްޖޭގެ އެކްސްޕޯޓް އިމްޕޯޓްގެ ގާނޫނަށް ހުށަހަޅާފައިވާ ބިލުގެ ބަހުސްގަ އެވެ. ސިނގިރޭޓް އިން ނަގާ ޓެކްސް ބޮޑުކުރަން ތާއިދުކުރައްވަމުން އައްބާސް ވިދާޅުވީ އަންނަ ނޮވެމްބަރުން ފެށިގެން ސިނިގިރޭޓް ހުއްޓާލައްވާނެ ކަމަށެވެ. އެހެން މެންބަރުންވެސް އެގޮތަށް އަމަލުކުރެއްވުމަށް އެދިވަޑައިގެންނެވި އެވެ.
"ބައެއް މެންބަރުންގެ ވާހަކަ މި އިއްޒަތްތެރި މަޖިލީހުގެ އިއްޒަތްތެރި މެންބަރުން ސިނގިރޭޓް ހުއްޓާލުމަށް ވަރަށް ބޮޑަށް އާދޭހާއެކު އެދޭވާހަކަ އެބަ ދަންނަވާ. ޖަވާބުގައި އިހުތިރާމާއެކު ދަންނަވާނީ އަޅުގަނޑަކީ ދުވާލަކު ދެ ފޮށި ސިނގިރޭޓު މިހާރު ވެސް ބޯ މީހެއް. ނޮވެމްބަރު 15، ވަނަ ދުވަހުން ފެށިގެން މާތް ﷲ ގެ ތަނަވަސް ރަހުމަތާއެކު ސިނގިރޭޓު ބުއިން ހުއްޓާލަން އަޅުގަނޑު ނިންމައިފިން."
އައްބާސް ވިދާޅުވީ ހުށަހެޅިފައިވާ އިސްލާހަކީ ތުއްތުކުދިންނާ މާދަމާގެ ޒުވާން ޖީލު ދުންފަތާއި މަސްތުވާތަކެތީގެ ވަބާއިން ސަލާމަތްވުމަށް އެޅިގެންދާ ވަރަށް މުހިއްމު ގައުމީ އަދި ހަރުދަނާ ފިޔަވަޅެއް ކަމަށެވެ.
"މީގެ އިތުރުން އާންމު ދިރިއުޅުމުގެ އިގްތިސޯދު ރަނގަޅުވެ, ދުންފަތަށް ކުރާ ހޭދަ ނިމުމަކަށް, ދިރިއުޅުމުގެ ހާލަތު ރަނގަޅު ކުރުމަށްޓަކަިއ އެ ފައިސާ ހޭދަކުރެވިގެންދާނެ ކަން އެއީ އަޅުގަނޑު ޝައްކެއް ނެތި ޔަގީންކުރާ ކަމެއް"
އޭނާ ވިދާޅުވި ގޮތުގައި ޒުވާނުން، އާއިލާއަށް ކުރާ ހޭދައަށްވުރެ ސިނގިރޭޓަށް ކުރާ ހޭދަ ބޮޑުތަން އިތުރުވެ، ދުންފަތާއި ވޭޕްގެ ސަބަބުން ކެންސަރާއި، ހިތުގެ ބަލި އަދި ސްޓްރޯކާއި ފުއްޕާމެޔަށް ދިމާވާ ބަލިތަކާއި އިތުރުވަމުންދާ ކަމަށެވެ.
ވޭޕާ ގުޅޭ ގޮތުން، ރައްޔިތުންނަށް އޮޅޭ ގޮތަށް މަޖިލީހުގެ އިދިކޮޅު މެންބަރުން ވާހަކަދައްކަވާތީ ކަންބޮޑުވުން ފާޅުކުރައްވަމުން އައްބާސް ވިދާޅުވީ ރާއްޖޭގެ 95 އިންސައްތަ މީހުން ވޭޕް މަނާކުރަން ތާއީދުކުރާ ކަމަށެވެ.
"މީގެ ސަބަބުން ރާއްޖެއިން ބޭރުވާ ބޭރުފައިސާ ވެސް މަދުވެ, ރާއްޖޭގެ އިގްތިސޯދު ވެސްރަނގަޅުވާނެ. އާއިލާގެ ދިރިއުޅުމުގެ ހާލަތު ވެސް ރަނގަޅުވާނެ, ފަރުދުން ހާލަތުވެސް ރަނގަޅުވާނެ. މިހާރަށްވުރެ މީރު ކާނާ ކައިގެން ދިރިއުޅެވޭނެ."
އައްބާސް ވިދާޅުވީ މިއަދު ސިނގިރެޓަށް ހޭދަކުރާ 7000 ނުވަތަ 8000 ރުފިޔާ މާދަމާ ހަރަދު ނުކުރާނަމަ ރީތި އަންނައުނާއި ރީތި ފައިވާނާއި ރީތި ބޫޓަށްވެސް އެރޭނެ ކަމަށެވެ.
