ކަޅު ހަމުން ސަޕްލައި ކުރަން ފެށި ފެން، މަސް ނިމޭއިރަށް ބާޖަކުން ފޯރުކޮށްދޭން ފަށަނީ
ވޯޓާ ބަންކަރިންގެ ހިދުމަތުގެ ތެރެއިން ފެން ސަޕްލައި ކުރަމުން އައީ ކަޅު ހަމުގައި ނަމަވެސް މިހާރު އެކަން ކުރުމަށް ފެން ބާޖެއް ހޯދާފައިވާ ކަމަށާއި މަސް ނިމުމުގެ ކުރިން އެ ހިދުމަތް ބާޖުން ފޯރުކޮށްދޭން ފަށާނެ ކަމުގައި މޯލްޑިވްސް ޕޯޓްސް ލިމިޓެޑް (އެމްޕީއެލް) ގެ ސީއީއޯ މުހައްމަދު ވަޖީހް އިބްރާހިމް ވިދާޅުވެއްޖެ އެވެ.
ރާއްޖޭގެ މެރިޓައިމް ދާއިރާ ފުޅާކޮށް، އިގުތިސޯދަށް ދިރުން ގެނެސްދޭނެ އިތުރު ސިނާއަތެއްގެ ގޮތުގައި އެ ދާއިރާ ތަރައްގީ ކުރުމަށް މި ސަރުކާރުން ފެށި މަސައްކަތްތަކުގެ ތެރެއިން ރާއްޖޭގެ އުތުރުން ދަތުރު ކުރަމުންދާ ބޭރުގެ ބޯޓު ފަހަރަށް ބޭނުންވާ ހިދުމަތްތައް ފޯރުކޮށްދިނުމަށް "އުތުރު މެރިޓައިމް ސާވިސަސް" ގެ ނަމުގައި ހާއްސަ އިންތިޒާމުތަކެއް ހަމަޖައްސައި ހއ. އުލިގަމުގައި ފެސިލިޓީއެއް ހުޅުވާފައި ވަނީ މިދިޔަ މަހުގެ 18 ވަނަ ދުވަހު އެވެ.
އެމްޕީއެލުގެ ބެލުމުގެ ދަށުން ހިންގާ އެ ފެސިލިޓީން މިވަގުތު ޖުމްލަ 14 ހިދުމަތެއް އަންނަނީ ދެމުންނެވެ. އޭގެ ތެރޭގައި ޕައިލެޓޭޖް ހިދުމަތާއި ފްރެޝް ވޯޓަ ބަންކަރިން އާއި ކުނި މެނޭޖްކުރުމާއި މެއިންޓެނެންސް މަސައްކަތްތަކަށް ބޭނުންވާ ތަކެތި ފޯރުކޮށްދިނުމާއި ޓެކްނިކަލް މައްސަލަތަކުގެ ބޭނުންވާ އެހީތެރިކަން ފޯރުކޮށްދިނުމާއި ކްރޫ ޗޭންޖް އާއި ކާބޯތަކެތި ސަޕްލައި ކުރުމުގެ ހިދުމަތް ހިމެނެ އެވެ.
"ދެން" ގެ "އެކްސްކްލޫސިވް" ގައި ވާހަކަ ދައްކަވަމުން ވަޖީހް ވިދާޅުވީ ބަންކަރިންގެ ހިދުމަތް ފޯރުކޮށްދިނުމުގައި ވާދަކުރަން ޖެހެނީ ސްރީ ލަންކާ، އިންޑިއާ އަދި ބަންގްލަދޭޝް ފަދަ އަވަށްޓެރި ގައުމުތަކާ ކަމަށެވެ. މިއީ ރާއްޖެއިން އަލަށް ފެށި ހިދުމަތަކަށް ވުމާ އެކު ހިދުމަތް ދިނުމުގައި ބައެއް ކަހަލަ ގޮންޖެހުންތަކާ ކުރިމަތިވާ ކަމަށެވެ. އެގޮތުން ފާހަގަކުރެވުނު ބައެއް ކަންކަން މިހާތަނަށް އައިއިރު ރަނގަޅު ކުރެވިފައިވާ ކަމަށެވެ.
ކަމެއް އަލަށް ފަށާއިރު ހުރިހާ ކަމެއް އެންމެ ފުރިހަމަ ގޮތުގައި ފޯރުކޮށްނުދެވޭނެ ކަމަށެވެ. މީގެކުރިން ނުކުރެވި އޮތް ކަމެއް ކުރުމުން އެކަމާ ދެކޮޅަށް ވާހަކަ ދައްކާނެ މީހުން ވެސް ތިބޭނެ ކަމަށެވެ. އެގޮތުން ވޯޓާ ބަންކަރިންގެ ހިދުމަތް ފެށުމާ އެކު އެކަން ކުރަމުން އައީ "ކަޅު ހަންތަކަކަށް ފެން އަޅައިގެން" ކަމަށް ބުނެ ފާޑުކިޔުންތަކެއް އަމާޒުވި ކަމަށެވެ.
"މިއަދު އަޅުގަނޑުމެން މި ވަނީ އިންޓަނޭޝަނަލް ވޯޓާ ބަންކަރިން، ފްރެޝް ވޯޓާ ސަޕްލައިކޮށްދެވޭ ގޮތަށް ފެން ބާޖެއް ވެސް ހޯދާފައި. އެ ފެން ބާޖުގެ ހިދުމަތް މި މަސް ނިމެންވާއިރަށް ފޯރުކޮށްދޭނަން،" ވަޖީހް ވިދާޅުވި އެވެ.
ފެން ފޯރުކޮށްދެމުން އައީ ކަޅު ހަމުގައި ކަމަށް ދެކެވޭ ވާހަކައަކީ ރަނގަޅު ވާހަކައެއްކަން ފާހަގަކުރައްވާ ސީއީއޯ ވިދާޅުވި ގޮތުގައި ރާއްޖެއަކީ ހުރިހާ ހިދުމަތްތަކެއް އެއްފަހަރާ ދެވޭ ވަރަށް ކަންކަން ފުރިހަމަވެފައިވާ ގައުމެއް ނޫން ކަމުގަ އެވެ. އެމްޕީއެލްއަކީ ބިލިއަން ޑޮލަރުން އިންވެސްޓް ކުރެވޭވަރުގެ ކުންފުންޏެއް ނޫން ކަމުގަ އެވެ. އެހެންނަމަވެސް އިސްކަންދެވޭ ތަރުތީބަކުން ބޭނުންވާ ކަންކަން ކުރަމުން އަންނަ ކަމުގަ އެވެ.
"ކަޅު ހަމުން ސަޕްލައި ކުރަން ފެށި ފެން، މިއަދު އެ ވަނީ ބާޖަކަށް ބަދަލުކޮށްފައި. އިންޓަނޭޝަނަލީ އެކަން ކުރާ ގޮތަށް ފުޅާކޮށްފައި ވަނީ،" ވަޖީހް ވިދާޅުވި އެވެ.
މެރިޓައިމްގެ ހިދުމަތްތަކާ ގުޅޭގޮތުން ކަމާ ގުޅުންހުރި ފަރާތްތަކާ މަޝްވަރާ ކުރުމަށް މިދިޔަ އޮގަސްޓު މަހުގެ ފުރަތަމަ ހަފުތާގެ ތެރޭގައި އެމްޕީއެލްގެ ޓީމެއް ތިލަދުންމަތި އުތުރުބުރީގެ ރަށްތަކަށް ދަތުރެއް ކުރި އެވެ. އެ ދަތުރުގެ ތެރެއިން ރަށްތަކުގައި ބައެއް ހިދުމަތްތައް ފެށުމާ ބެހޭ ގޮތުން ރަށު ކައުންސިލުތަކާ އެކު މަޝްވަރާ ބައްދަލުވުންތަކެއް ބޭއްވި އެވެ.
Ads by STO
