ރަނގަޅަށް ކުރެވިއްޖެ ނަމަ މަހެއްގެ މައްޗަށް 400 ކޮންޓެއިނަރުގެ މުދާ އެކްސްޕޯޓް ކުރެވިދާނެ: ވަޖީހް
ސީ-ޓު-އެއާ ޓްރާންސްޝިޕްމަންޓް ކާގޯގެ ހިދުމަތް ރަނގަޅު ގޮތުގައި ކުރިއަށްގެންދެވޭ ނަމަ މަހެއްގެ މައްޗަށް 400 އަށް ވުރެ ގިނަ ކޮންޓެއިނަރުގެ މުދާ ކަނޑުމަގުން ރާއްޖެ ގެނެސް ވައިގެ މަގުން އެކި ގައުމުތަަކަށް ފޮނުވުމުގެ ފުރުސަތު އެބައޮތް ކަމުގައި މޯލްޑިވްސް ޕޯޓްސް ލިމިޓެޑް (އެމްޕީއެލް) ގެ ސީއީއޯ މުހައްމަދު ވަޖީހް އިބްރާހިމް ވިދާޅުވެއްޖެ އެވެ.
ބޭރުގެ ބައެއް މީޑިއާތަކުން ރިޕޯޓުކޮށްފައިވާ ގޮތުގައި ބަންގްލަދޭޝްގެ އަންނައުނު އުފައްދާ ފެކްޓްރީތަކުން ރާއްޖެ މެދުވެރިކޮށް އެކްސްޕޯޓްކުރާ މިންވަރު އިތުރުވަމުންދާ ކަމަށެވެ. އެ ގައުމަކީ ދުނިޔޭގައި ދެ ވަނައަށް އެންމެ ގިނައިން އަންނައުނު އުފައްދަމުން އަންނަ ގައުމަށްވާއިރު، މީގެކުރިން އެތަކެތި އެކްސްޕޯޓު ކުރަމުން ގޮސްފައި ވަނީ އިންޑިއާ މެދުވެރިކޮށެެވެ.
އެހެންނަމަވެސް ފެކްޓްރީތަކުން ރާއްޖެ މެދުވެރިކޮށް މުދާ އެކްސްޕޯޓްކުރަން ނިންމާފައި ވަނީ ތަކެތި ބޭރުކުރުމުގައި މިހާރު ބޭނުން ކުރަމުންދާ އިންޑިއާގެ އެއާޕޯޓުތަކާއި ބަނދަރުތަކަށް ބާރުބޮޑުވެ، އެކްސްޕޯޓު ކުރުމުގައި ދަތިތަކާ ކުރިމަތިވާތީ ކަމަށެވެ. އެހެންވުމާ އެކު އެޗް އެންޑް އެމް އާއި ޒާރާ ފަދަ މަޝްހޫރު ބްރޭންޑްތަަކުގެ ޝިޕްމެންޓްތައް ދުނިޔޭގެ އެކި ސަރަހައްދުތަކަށް ދެން ފޮނުވާނީ ރާއްޖެ މެދުވެރިކޮށް ކަމަށެވެ.
ވަޖީހް "ދެން" އަށް ވިދާޅުވީ ސްރީލަންކާ އާއި އިންޑިއާގެ އެއާޕޯޓުތަކާއި ބަނދަރުތަކަށް ބާރުބޮޑުވެފައި ވުމާ އެކު ބަންގްލަދޭޝްއިން މުދާ ބޭރުކުރާ ފަރާތްތަކަށް އެ ފަރާތްތަކުން ބޭނުންވާ ދުވަހަށް މުދާ ފޮނުވޭނެ ކަމުގެ ޔަގީންކަން ނުލިބޭ ކަމަށެވެ. އެ ގައުމުތަކަށް ވުރެ ރާއްޖެ އާއި ޔޫރަޕާ ދެމެދު ކުރެވޭ ދަތުރުތައް ގިނަ ކަމަށެެވެ. ވުމާ އެކު އެއީ ރާއްޖެއަށް އޮތް ވަރަށް ބޮޑު ފައިދާއެއް ކަމަށެެވެ.
"އަޅުގަނޑުމެން އެކަމަށް ވަރަށް ހާއްސަ ސަމާލު ކަމެއް ދީގެން މި އުޅެނީ. ސީދާ އެކްސްޕޯޓްކުރާ މުދަލެއް ވެއްޖިއްޔާ ވަގުތުން އެމްޕީއެލުން މުދާތައް ބޯޓުން ބާލައި އެ ދުވަހުން ދުވަހަށް އެއާޕޯޓަށް ގެންގޮސްގެން އެއާޕޯޓުން ބޭރުކޮށްލެވޭ ގޮތަށް އިންތިޒާމުތައް ހަމަޖައްސާފައި ހުރީ،" ވަޖީހް ވިދާޅުވި އެވެ.
މި ވަގުތު ރާއްޖެއިން ބޭރުކުރެވޭ މުދަލަކީ ބަންގްލަދޭޝްގައި އުފައްދާ އަންނައުނުގެ ބާވަތްތަކެވެ. އެ ސިނާއަތުގެ ބޮޑު އިންސައްތައެއް ވައިގެ މަގުން ފޮނުވަނީ ޔޫރަޕުގެ ގައުމުތަކަށެވެ.
އެކަމުގެ ހިތްހަމަޖެހުން ބަންގްލަދޭޝްގެ މުދާ އުފައްދާ ފަރާތްތަކަށް އޮންނަ ކަމަށެވެ. މި މާކެޓުގެ ބޮޑު ބައެއް ރާއްޖެއަށް ކެޕްޗާ ކުރެވޭނެ ކަމުގެ ޔަގީންކަން އެބައޮތް ކަމަށެވެ. ހިދުމަތް އިތުރަށް ފުޅާކުރުމަށާއި ކަމަށް އިތުބާރު ހޯދުމުގެ ގޮތުން ބަންގްލަދޭޝްގެ އަންނައުނު އުފައްދާ ފެކްޓްރީތަކުގެ ވެރިންނާ މަޝްވަރާ ކުރުމަށް މިފަހުން އެމްޕީއެލްގެ ޓީމަކުން މި މަސައްކަތުގައި އިސްކޮށް ހަރަކާތްތެރިވެ ވަޑައިގަންނަވާ އިނަ މޯލްޑިވްސްގެ ވެރިޔާ މުހައްމަދު ފިރާގާ އެކު ބަންގްލަދޭޝްގެ ޗިޓަގޮންއަށް ވަނީ ދަތުރެއް ކޮށްފަ އެވެ. ފާހަގަކުރެއްވީ އެގޮތުން ކުރެވުނު މަޝްވަރާތަކުގެ ތެރެއިން މަސައްކަތް ރަނގަޅަށް ކުރެވިއްޖެ ނަމަ މަހެއްގެ މައްޗަށް 400 އަށް ވުރެ ގިނަ ކޮންޓެއިނަރުގެ މުދާ ކަނޑުމަގުން ރާއްޖެ ގެނެސް ވައިގެ މަގުން އެކި ގައުމުތަަކަށް ފޮނުވުމުގެ ފުރުސަތު އޮތްކަން ކަމަށެެވެ.
އެމްޕީއެލްގެ ސީއީއޯ ވިދާޅުވި ގޮތުގައި މި ދުވަސްވަރަކީ ފިނި މޫސުމަށް ބަދަލުވާ ދުވަސްވަރަށް ވުމާ އެކު ޔޫރަޕަށް އޮތް ޑިމާންޑް ބޮޑު ކަމުގަ އެވެ. އެހެންކަމުން ބޭރުކުރެވޭ މުދަލުގެ އަދަދު އިތުރުވާނެ ކަމުގަ އެވެ.
"ބަންގްލަދޭޝްގެ ޗިޓަގޮންއިން ބޮޑަށް މި މަސައްކަތް އޮތީ. އެތަނުގެ ފެކްޓްރީތަކުގެ އޯނަރުން ރާއްޖެއިން މިކަން ކުރުމަށް ބޭނުންވޭ. އެ ފަރާތްތަކާ އެކު އަޅުގަނޑުމެންނަށް މިކަން ވަރަށް ރަނގަޅަށް ގެންދެވޭނެ ކަމުގެ ޔަގީންކަން އެބައޮތް،" ވަޖީހް ވިދާޅުވި އެވެ.
އެހެންނަމަވެސް މި ދެ މެދުގައި ދަތުރުކުރާ ބޯޓުފަހަރު މަދުވުމާ އެކު މުދާ ގެނައުމުގައި ދަތިތަކާ ކުރިމަތިވެފައިވާ ކަމުގަ އެވެ. ފަސޭހަކަމާ އެކު މުދާ ގެނެވޭނެ ގޮތް ފަހިކުރުމަށް ރާއްޖެއަށް ދަތުރުކުރާ ޝިޕިންލައިންތަކާ އެކު މަޝްވަރާ ކުރަމުންދާ ކަމުގަ އެވެ. ބޭނުންވާ މެޝިނަރީތަކާއި އިކުއިޕްމަންޓްސްތައް ހަމަކޮށް ކަސްޓަމަރުން ހިތްހަމަޖެހޭ ފަދަ ހިދުމަތްތަކެއް ފޯރުކޮށްދެވޭތޯ މަސައްކަތް ކުރަމުންދާ ކަމުގަ އެވެ.
މި އަހަރުގެ މާޗު މަހު ޓާކިޝް އެއާލައިނާ އެކު ސޮއިކޮށް އެމްޕީއެލުން ތައާރަފުކުރި ސީ-ޓު-އެއާ ޓްރާންސްޝިޕްމަންޓް ކާގޯގެ ހިދުމަތުގެ ފުރަތަމަ ޝިޕްމަންޓް ރާއްޖޭން ފޮނުވީ މެއި މަހުގެ ތެރޭގަ އެވެ. ރާއްޖޭގައި ހިދުމަތް ފެށި ފަހުން ކަމަށް ލިބޭ ތަރުހީބު ބޮޑުވެ، ޑިމާންޑް ވަނީ ވަރަށް ބޮޑަށް އިތުރުވެފަ އެވެ. ވައިގެ މަގުން ބޭރު ކުރަމުން އައި ކޮންޓެއިނަރުގެ އަދަދު މަހުން މަހަށް އައީ އިތުރުވަމުންނެވެ. އެގޮތުން ސެޕްޓެމްބަރު މަހު 55 ކޮންޓެއިނަރުގެ މުދާ އެކްސްޕޯޓް ކުރެވުނުއިރު، ނިމިދިޔަ މަހު އެ އަދަދު 96 އަށް އިތުރުވެފައިވާ ކަމަށް ވަޖީހް ވިދާޅުވި އެވެ. އެއީ 418 ޓަނުގެ މުދާ ނުވަތަ 34،946 ދާގީނާ އެވެ. ލަފާކުރެވޭ ގޮތުން މި މަހު އެ އަދަދުތައް އެއަށް ވުރެ ވެސް އިތުުރުވާނެ ކަމަށެވެ.
"ސީ-ޓު-އެއާ ކާގޯގެ ހިދުމަތް ފުޅާކޮށް، ކަސްޓަމަރުންގެ އިތުބާރު ލިބޭ ފަދަ ހިދުމަތްތަކެއް ފޯރުކޮށްދެމުން ގެންދިއުމަށް ރައީސް ވަނީ މި މަސައްކަތުގައި ސީދާ ބައިވެރިވާ ސަރުކާރުގެ ދެ ކުންފުނި ކަމަށްވާ އެމްޕީއެލް އާއި އެމްއޭސީއެލް ގުޅިގެން މަސައްކަތް ކުރުމަށް އިރުޝާދު ދެއްވާފައި،" ވަޖީހް ވިދާޅުވި އެވެ.
ސީ-ޓު-އެއާ ކާގޯގެ ހިދުމަތަކީ ކަނޑު މަގުން ގެންނަ މުދާ، ޓްރާންސިޓްކޮށް ވައިގެ މަގުން އެއްތަނުން އަނެއް ތަނަށް ފޮނުވުމުގެ ހިދުމަތެވެ. މި ހައިބްރިޑް މޮޑެލްގެ ސަބަބުން މި ސަރަހައްދުގެ ވިޔަފާރިތަކާއި ސިނާއަތްތަކުގެ ބޭނުންތައް ފުއްދައިދީ، މުދާ އުފުލުމުގެ ހިދުމަތް އަވަސް އަދި ހަރުދަނާ ގޮތެއްގައި ބެލެހެއްޓެ އެވެ.
ސީ-ޓު-އެއާ ކާގޯގެ ހިދުމަތަށް އޮތް ޑިމާންޑް ބޮޑުވަމުންދާއިރު، ހިދުމަތާ ހަތް އެއާލައިނަކުން ވަނީ ގުޅިފަ އެވެ. އޭގެ ތެރޭގައި ޓާކިޝް އެއާލައިނާއި ގަތަރު އެއާވޭސް އާއި އެމިރޭޓްސް އާއި އިއްތިހާާދާއި ގަލްފް އެއާ އާއި ނިއޯސް އެއާލައިނުގެ އިތުރުން އޭރޯފްލޮޓް ހިމެނެ އެވެ. އެ އެއާލައިންތައް މެދުވެރިކޮށް 13 ގައުމަކަށް މިހާތަނަށް ވަނީ މުދާ ފޮނުވާފަ އެވެ.
ރަނގަޅަށް ވަށްކަން ކުރެވިއްޖެނަމަތޯ؟؟
ފޮނި ކެޑުން ނޫންކަމެއް ނުކުރޭ!