ރ އަތޮޅުގައި ބާއްވާ އެންމެ ބޮޑު ގުރުއާާން މުބާރާތް ފަށައިފި
ރ. އަތޮޅުގައި ބާއްވާ އެންމެ ބޮޑު ގުރުއާާން މުބާރާތް ފަށައިފި އެވެ.
މީދޫގައި އިއްޔެ ފެށި އަތޮޅު ގުރުއާން މުބާރާތުގައި ރ. އަތޮޅުގެ 14 ރަށަކުން 198 ބައިވެރިން ވާދަކުރެއެވެ.
މުބާރާތަށް ރ. އަތޮޅުގެ އެކި ރަށްރަށުން މީދޫއަށް 500 އެއްހާ މީހުން އަރާފައިވާއިރު، މުބާރާތް ފެށުމުގެ ކުރިން ހުކުރު ދުވަހުގެ ރޭ މީދޫ ރައްޔިތުންގެ ފަރާތުން ވަނީ ރަށަށް ޒިޔާރަތްކުރި ހުރިހާ މެހެމާނުންނަށް ހާއްސަ ޖާފަތެއް އަރުވާފަ އެވެ.
މީދޫއިން މައުލޫމާތު ދެއްވި އިސް އޮފިޝަލަކު ވިދާޅުވީ، މިއަހަރުގެ މުބާރާތަށް އެކި ތައްޔާރީތައްވުމަށް ރަށުގެ ގިނަ އަދަދެއްގެ ބަޔަކު އަމިއްލަ މަސައްކަތްތައް އެއްފަރާތް ކުރުމަށްފަހު ހަރަކާތްތެރި ވެފައިވާ ކަމަށެވެ.
އެގޮތުން އިދާރީ މަސައްކަތްތަކާއި، މުބާރާތް ކުރިއަށްދާ ރ. އަތޮޅު ތައުލީމީ މަރުކަޒުގެ ހޯލްގެ އެކި މަސައްކަތްތަކާއި، ރަށުތެރެ ޒީނަތްތެރި ކުރުމުގެ މަސައްކަތްތައް ހިމެނޭހެން 400 އަށްވުރެ ގިނަ މީހުން އެކި މަސައްކަތް ތަކުގައި ހަރަކާތްތެރިވެފައިވާ ކަމަށެވެ.
"މިކަމުގައި އަޅުގަނޑުމެން މަސައްކަތް މިކުރަނީ ވަރަށް ގުޅިގެން އެކަތިގަނޑެއްގެ ގޮތުގައި. މި މުބާރާތުން އަޅުގަނޑުމެން އެކަތިގަނޑަކަށް ހަދައިދީފި. ރަށަށްޓަކައި އެތައް ބަޔަކު ބޮޑެތި ގުރުބާނީތަކެއް ވެއްޖެ. ވަރަށް ފަހުރުވެރިވަން" މުބާރާތުގެ ހިންގާ ކޮމިޓީގެ ޗެއާ، ކައުންސިލްގެ ނައިބު ރައީސް ވިދާޅުވި އެވެ.
އެ މުބާރާތް ކުރިއަށް ދަނީ ހޯމަ ދުވަހުގެ ނިޔަލަށެވެ. މުބާރާތުގެ ނިންމުމުގެ ރަސްމިއްޔާތު އޮންނާނީ ހޯމަ ދުވަހު ހަވީރު އެވެ.
Ads by STO
