7000 ރުފިޔާއަށް ލިބޭ އިންޖެކްޝަނަކުން 23000 ރުފިޔާ އައިކެއާއިން އާސަންދައަށް ބިލްކުރި މައްސަލައެއް!
7000 ރުފިޔާ (500 ޑޮލަރު) އަށް ލިބޭ އިންޖެކްޝަނަކުން 23000 ރުފިޔާއަށް ރާއްޖޭގެ ކްލިނިކަކުން އާސަންދައަށް ބިލްކުރި މައްސަލައެއް ނޭޝަނަލް ސޯޝަލް ޕްރޮޓެކްޝަން އެޖެންސީ (އެންސްޕާ) ސީއީއޯ އަދި ރައީސް އޮފީހުގެ ސްޕޯކްސްޕާސަން ހީނާ ވަލީދު ތިލަކޮށްދީފި އެވެ.
ސޯޝަލް މީޑިއާގައި ހީނާ މިއަދު ވަނީ އިންޖެކްޝަންއާ ގުޅޭ ގޮތުން ދައުރުވަމުންދާ ޕޯސްޓަކާއި ގުޅިގެން ސްޓޭޓްސް އެއް ލިޔެފަ އެވެ.
ދައުރުވަމުންދާ ޕޯސްޓްގައި މީހަކު ބުނީ އޭނާގެ މަންމަ 2011 ވަނަ އަހަރުން ފެށިގެން އެ އިންޖެކްޝަން ޖަހަމުން އަންނަނީ އާސަންދަ މެދުވެރިކޮށް ނަމަވެސް މި އަހަރު އެ އިންޖެކްޝަނަށް 24,000 ރުފިޔާ ދައްކަން ޖެހުނު ކަމަށެވެ.
ހީނާ ވިދާޅުވީ ފޮޓޯގައިވާ މެސެޖުގެ ހަގީގަތް ރައްޔިތުންނަށް އެނގުން މުހިއްމު ކަމަށާއި އެއީ އާސަންދައިން ވިޔަފާރިކޮށް ނާޖާއިޒު ބޮޑެތި ފައިދާ ނަގައި އުސޫލުތަކުން ބޭރުން ކަންކުރުމުގެ ލާމަސީލު މިސާލެއް ކަމަށެވެ.
"ލޫސެންޓިސް އިންޖެކްޝަން" ނަމަކަށް ކިޔާ އިންޖެކްޝަނަކީ އެންމެ ހަރަދު ބޮޑު އެއް ބޭސް ކަން ފާހަގަކުރަމުން ހީނާ ވިދާޅުވީ ބޭސް ގަންނަ އަގު ހޯދުމަށް ކްލިނިކުގައި އެދުމުން ފޮނުވި އިންވޮއިސްތަކުން ބޭސް ގަންނަން ލިބޭ އަގަށްވުރެ ބޮޑުތަނުން ބޮޑުކޮށް އާސަންދައަށް ބިލްކޮށްފައިވާކަން ހާމަވެފައިވާ ކަމަށެވެ.
"މިގޮތުން 500 ޑޮލަރަށް މި ބޭސް ގެނެސް 23000 (ތޭވީސްހާސް) ރުފިޔާ އަށް އާސަންދަ އަށް ބިލްކޮށްފައިވޭ. މިއީ އަށާރަ ރުފިޔާގެ ރޭޓުން ޑޮލަރު ބެލިކަމުގައިވިޔަސް، އެންމެ އިންޖިކްޝަނަކުން 14،000 (ސާދަހާސް) ރުފިޔާގެ ފައިދާއެއް"
ހީނާ ވިދާޅުވީ އެ ބޭސް ރާއްޖެ އެތެރެކުރަން ރަޖިސްޓްރީކޮށްފައިވަނީ މުޅިން އެހެން ކުންފުންޏަކުން ނަމަވެސް އެ ކުންފުނިން އެއްވެސް ވަރަކަށް އެ ބޭސް އެތެރެކޮށްފައިނުވާ ކަމަށެވެ.
އަދި އެ ކްލިނިކުން ބޭސްވިއްކާފައިވަނީ ބޭސް އެތެރެ ކުރުމަށް ރަޖިސްޓަރީނުކޮށް, ޕްރިސްކްރިޕްޝަން އަށް ކަމަށް ހީނާ ވިދާޅުވި އެވެ.
އާސަންދަ ސްކީމްގެ ތެރެއިން އެ އިންޖެކްޝަނަށް އެންމެ ގިނައިން ބިލްކޮށްފައިވަނީ ވެސް އައިކެއާއިންނެވެ.
މޯލްޑިވްސް ފުޑް އެންޑް ޑްރަގް އޮތޯރިޓީގައި ރަޖިސްޓަރީކޮށްފައިނުވާ އިންޖެކްޝަންއަކަށް ބިލުކޮށްފައިވުމާއި އަގުގެ ބޮޑު ތަފާތަކުން ބޮޑު ފައިދާއެއް ނަގަމުންދިޔަ އިރު އެކަން އާސަންދަ ކުންފުންޏަށް ނުވަތަ އެންސްޕާއަށް އަންގައިފައިނުވާއިރު އެކަން ފާހަގަވީ އާސަންދައިގެ ބޭހުގެ އަގު ރިވައިޒްކުރުމުގެ ތެރެއިން ކަމަށް ހީނާ ވިދާޅުވި އެވެ.
ހީނާ ވިދާޅުވީ އެކަން ހުއްޓުވުމަށް ފިޔަވަޅު އަޅައި އެންސްޕާގެ ވެލްފެއާ އެހީގެ ދަށުން މިހާރުވެސް ކޮންޓްރޯލްޑް އަގެއްގައި ބޭނުންވާ ފަރާތްތަކަށް މި ބޭސް ހޯދުމަށް އެހީތެރިކަން ދެވެމުންދާ ކަމަށާއި އެކަން އިތުރަށް ފުރިހަމަކުރުމުގެ މަސައްކަތްވެސް ހިނގަމުންދާ ކަމަށެވެ.
"އެކި އަމިއްލަ ފަރާތްތަކުން ވިޔަފާރީގެ ފައިދާގެ ބޭނުމަށް އާސަންދަ ބޭނުންކުރުމުގެ ނަތީޖާއެއްގެ ގޮތުން، ރައްޔިތުންނަށް ބޮޑެތި ގެއްލުން ލިބޭކަމީ ހަގީގަތެއް."
ހީނާ ވިދާޅުވީ އެހެން ދިމާވަނީ ޒަމާނުއްސުރެ އެ ނިޒާމްގެ ތެރޭގައި ހުރި މިފަދަ އެތައް މައްސަލައަކަށް އެޓެންޑް ނުކުރެވި، އެއް ނިޒާމް އަނެއް ނިޒާމާ ވާހަކަ ނުދެކެވި ބޮއްސުންލާން ދޫކޮށްލެވިފައި އޮތުމުގެ ސަބަބުން ކަމަށެވެ. އަދި ރައީސް ޑރ މުހައްމަދު މުއިއްޒުގެ ލަފާފުޅުގެ ދަށުން އެކަން ބަދަލުކޮށް އިސްލާހު ކުރާނެ ކަމުގެ ޔަގީންކަން ހީނާ ދެއްވި އެވެ.
މީގެ ކުރިންވެސް ފްރޯޑް މައްސަލަތައް ދިމާވެ, އާސަންދައިން ހިދުމަތްދޭ ތަންތަނަށް ހިދުމަތް ދިނުން މެދުކަނޑާލާފައި އެބަ ހުއްޓެވެ. ދާދިފަހުން އެފަދަ މައްސަލައެއް ދިމާވެ އީވް ކްލިނިކްއިން އާސަންދައިގެ ހިދުމަތް ދިނުން މަޑު ޖައްސާލި އެވެ.
