އެއާޕޯޓް ޓެކްސްއަށް ގެނައި އިސްލާހުތައް ރައީސް ތަސްދީގުކުރައްވައިފި
ރާއްޖޭގެ އެއާޕޯޓަކުން ރާއްޖެއިން ބޭރަށް ފުރާ ފަސިންޖަރުންގެ އަތުން ޓެކްސްއާއި ފީ ނެގުމާބެހޭ ގާނޫނަށް ގެނައި އިސްލާހުގެ ބިލު ރައީސް ޑރ. މުހައްމަދު މުއިއްޒު މިއަދު ތަސްދީގުކުރައްވައިފި އެވެ.
މިދިޔަ މަހުގެ 31 ވަނަ ދުވަހު ރައްޔިތުންގެ މަޖިލީހުން ފާސްކުރި އެ ބިލުގައި ރާއްޖޭގެ އެއާޕޯޓަކުން ރާއްޖެއިން ބޭރަށް ފުރާ ފަސިންޖަރުންގެ އަތުން ނަގާ ޓެކްސްއަށް ބޮޑެތި ބަދަލުތަކެއް ގެނެސްފައިވެ އެވެ.
އެގޮތުން އަންނަ މަހުން ފެށިގެން އިކޮނޮމީ ކުލާހުން ދަތުރުކުރާ ބިދޭސީންގެ އަތުން 50 އެމެރިކާ ޑޮލަރު ނެގޭނެ އެވެ.
އަދި ބިޒްނަސް ކުލާހުން ދަތުރުކުރާނަމަ ދިވެހިންނާއި ބިދޭސީންގެ އަތުން ވެސް 120 އެމެރިކާ ޑޮލަރު އަދި ފަސްޓް ކުލާހުން ދަތުރުކުރާ ދިވެހިންނާއި ބިދޭސީންގެ އަތުން ވެސް 240 އެމެރިކާ ޑޮލަރު ޑިޕާޗާ ޓެކްސްގެ ގޮތުގައި ނެގޭނެ އެވެ.
އޭގެ އިތުރުން ޕްރައިވެޓް ޖެޓުން ދަތުރުކުރާ ދިވެހިންނާއި ބިދޭސީންގެ އަތުން ވެސް 480 އެމެރިކާ ޑޮލަރު، ޑިޕާޗާ ޓެކްސްގެ ގޮތުގައި ނެގޭނެ އެވެ.
ބިލުގައިވާ ގޮތުން އެއާޕޯޓް ސާވިސް ޗާޖް ނުވަތަ ޑިޕާޗާ ޓެކްސް ނުވަތަ އެއާޕޯޓް ޑިވެލޮޕްމަންޓް ފީ ނެގުން ހުއްދަ ނޫން ފަރާތަކުން އެއިން ޓެކްސްއެއް ނުވަތަ ފީއެއް ނުވަތަ ހުއްދައޮވެ އިތުރަށް ޓެކްސްއެއް ނަގާފައިވާނަމަ އެ ފައިސާ ނެގި މުއްދަތަށް ނިސްބަތްވާ އެއާޕޯޓް ޓެޖްސް އާއި ފީގެ ބަޔާން މީރާއަށް ހުށަހަޅަންޖެހޭ މުއްދަތުގެ ކުރިން އެ ފައިސާ، އެ ފަސިންޖަރަށް އަނބުރާ ދޭންވާނެ ކަމަށް އިސްލާހުގައިވެ އެވެ.
އަދި އެފަދައިން އެ ފައިސާ އެ ފަރާތަކަށް އަނބުރާ ނުދޭހާ ހިނދަކު، އެ ފައިސާ މީރާއަށް ދައްކަން ޖެހޭ ގޮތަށް ވެސް ބިލުގައި ހިމަނާފައިވެ އެވެ.
