ދެ ކޮމިޝަންގެ ވެރިން ރައީސްއަށް އައްޔަނުކުރެވޭ އިސްލާހުތަކަށް ހިޔާލު ހޯދަނީ
ރައީސުލްޖުމްހޫރިއްޔާއަށް, އެންޓި ކޮރަޕްޝަން ކޮމިޝަން (އޭސީސީ) އަދި އިލެކްޝަންސް ކޮމިޝަންގެ ރައީސްއާއި ނައިބު ރައީސް އައްޔަނު ކުރެވޭ ގޮތަށް ދެ ގާނޫނަށް ހުށަހަޅާ އިސްލާހުގެ ދެ ބިލަށް އާންމުންގެ ހިޔާލު ހޯދަން ހުޅުވާލައިފި އެވެ.
އެ ދެ ބިލުގެ ބަހުސް ނިންމާ އިއްޔެ ވަނީ އިތުރަށް ދިރާސާކުރަން މަޖިލީހުގެ މިނިވަން މުއައްސަސާތަކާ ބެހޭ ކޮމިޓީއަށް ފޮނުވާފަ އެވެ.
މަޖިލީހުގެ އިދާރާއިން މިއަދު ވަކިވަކިން ކުރި އިއުލާނުތަކުގައި ބުނީ ދެ ބިލާ ގުޅޭގޮތުން އާންމުންގެ ހިޔާލު ހޯދުމަށް މިއަދުން ފެށިގެން މި މަހުގެ 12 ވަނަ ދުވަހާ ހަމައަށް ހުޅުވާލާފައިވާ ކަމަށެވެ. ހިޔާލެއް އޮތްނަމަ އެކަން މަޖިލީހުގެ އިދާރާއަށް ލިއުމުން ހުށަހެޅުމަށެވެ.
އިސްލާހުތައް ގެންނަނީ މުސްތަގިއްލު ކޮމިޝަންތަކުގެ ހިންގުން ހަރުދަނާކޮށް، ކޮމިޝަންތަކަށް އައްޔަނުކުރާ މެންބަރުންގެ ތެރެއިން އެ ކޮމިޝަންގެ ރައީސް އާއި ނައިބު ރައީސްގެ މަގާމަށް މެންބަރުން އައްޔަނުކުރުމުގައި އަމަލުކުރަމުން އަންނަ އުސޫލު އެއްހަމަ ކުރުމަަށް ކަމަށް ދެ ބިލުގަައި ބުނެފައިވެ އެވެ.
ގެންނަން ނިންމާފައިވާ އިސްލާހުތަކުގެ ދަށުން އެ ދެ ކޮމިޝަންގެ ރައީސް އާއި ނައިބު ރައީސްއަށް އައްޔަނުކުރައްވަން ރައީސުލްޖުމްހޫރިއްޔާއަށް ފެނިވަޑައިގަންނަވާ ބޭފުޅެއްގެ ނަން މަޖިލީހަށް ހުށަހެޅުއްވުމަށްފަހު މަޖިލީހުގެ އަގުލަބިއްޔަތުން ފާސްކުރުމަށްފަހު އެވެ.
މިހާރު ގާނޫނުގައިވާ ގޮތުން ދެ ކޮމިޝަންގެ ރައީސް އާއި ނައިބު ރައީސް ހޮވަނީ ދެ ކޮމިޝަންގެ މެމްބަރުންގެ މެދުގައި ނަގާ ވޯޓަކުންނެވެ.
