އާބަން ސެންޓަރުތަކުގެ ގޮތުގައި ކަނޑައެޅި 7 ރަށް އިއުލާންކޮށްފި

އާބަން ސެންޓަރުގެ ގޮތުގައި ކަނޑައެޅި 7 ރަށް ސަރުކާރުން ގާއިމްކުރަން ނިންމަވައިފި އެވެ.

Ads by STELCO

ހައުސިން، ލޭންޑިން އެންޑް އާބަން ޑިވޮލެޕްމެންޓް އިން މިއަދު ނެރުނު ނޫސްބަޔާނެއްގައި ވަނީ ރައީސް ޑރ. މުހައްމަދު މުއިއްޒުގެ ވައުދުފުޅާ އެއްގޮތަށް އާބަން ސެންޓަރު އަޅަން ކަނޑައެޅި 7 ރަށް އިއުލާންކޮށްފަ އެވެ.

އާބަން ސެންޓަރު އަޅަން ކަނޑައަޅުއްވާފައިވާ 7 ރަށަކީ:

1. ރ. އުނގޫފާރު
2. ބ. އޭދަފުށީ
3. ޅ. ނައިފަރު
4. އދ. މަހިބަދޫ
5. ފ. ނިލަންދޫ
6. ދ. ކުޑަހުވަދޫ
7. ލ. ފޮނަދޫ

އާބަން ސެންޓަރުތައް އެޅުމަށް ރައްޔިތުންގެ ބައިވެރިވުން އޮންނަ ގޮތަށް، ހިޔާލާއި މަޝްވަރާ ހޯދައިގެން، އާބަން ސެންޓަރުތައް ކަނޑައެޅުމަށް ކަމާ ގުޅޭ އިދާރާތައް ގުޅިގެން ތަފްސީލީ ދިރާސާއެއް ކުރަން ޖެނުއަރީ މަހުގައި ވަނީ ނިންމާފަ އެވެ.

އެ ދިރާސާ ކުރަން ނިންމާފައިވާކަން ހާމަކޮށް ރައީސް އޮފީހުގެ އޭރުގެ ޕްރިންސިޕަލް ސެކްރެޓަރީ ޓު ދަ ޕްރެޒިޑެންޓް އޮން ޕަބްލިކް ޕޮލިސީ އަބްދުﷲ ނާޒިމް އިބްރާހިމް ވިދާޅުވީ ސިޔާސަތުތައް އެކުލެވިގެންދާއިރު، އާބަން ސެންޓަރަކުން ޓޫރިޒަމާއި ދަނޑުވެރިކަން ފަދަ އިގުތިސޯދީ ނަފާ އިތުރުކުރެވޭނެ ގޮތްތައް ވެސް ހިމެނޭނެ ކަމަށެވެ.

މީގެ އިތުރުން ނާޒިމް ވިދާޅުވީ އާބަން ރީޖަންއެއްގެ ގޮތުގައި ކަނޑައެޅޭނީ  އެ ސަރަހައްދެއްގައި ހިމެނޭ ރަށްތަކުގައި ދިރިއުޅޭ ރައްޔިތުންގެ އާބާދީ 50،000 އަށް ވުރެ ދަށް ނުވާނެ ގޮތަކަށް ބަލައިގެން ކަމަށެވެ.

ރައީސް މުއިއްޒު ވިދާޅުވެފައިވާ ގޮތުން އާބަން ސެންޓަރުގައި ސިއްހީ ނިޒާމުގެ ތެރެއިން އެންމެ މުހިންމު ހުރިހާ ދާއިރާއަކުން ހިދުމަތް ދެވެން ހުންނާނެ ކަމަށެވެ. އެގޮތުން އެކިކަހަލަ ތެރެޕީތައްވެސް ދެވޭނެކަމަށްވެސް ރައީސް ފާހަގަކުރެއްވި އެވެ. އަދި ތައުލީމީ ނިޒާމުވެސް އެންމެ މަތީ ފެންވަރުގައި ގާއިމުކުރައްވާނެކަމަށާއި، މަގުތައްވެސް އެންމެ ރަނގަޅަށް ހަދައި އަދި ދެންހުރި ކަންކަން ވެސް އެންމެ ރަނގަޅަށް ގާއިމުކުރެވިފައި ހުންނާނެކަމަށްވެސް ރައީސް ވަނީ ވިދާޅުވެފަ އެވެ.