ރަސްމާލޭގެ ބިން ހިއްކުމުގެ މަސައްކަތް އަލުން ފަށައިފި
މި ސަރުކާރުން މިހާތަނަށް ފެށި އެންމެ ބިޔަ އެއް މަޝްރޫއު ކަމަށްވާ ރަސްމާލެ، ފުށިދިއްގަރުފަޅުގެ ބިން ހިއްކުމުގެ މަސައްކަތް އަލުން ފަށައިފި އެވެ.
ހައުސިން ޑިވެލޮޕްމެންޓް ކޯޕަރޭޝަން، (އެޗްޑީސީ) އިން ބުނީ، ފިޔަވަހިތަކަކަށް ބަހާލައިގެން ހިއްކާ ގޮތަށް ހިންގަމުންދިޔަ ފުށިދިއްގަރު ފަޅުން ބިން ހިއްކުމުގެ މަސައްކަތް މިއަދު އަލުން ފަށާފައި ވަނީ ސަރަހައްދު އެފް އިން ކަމަަަށެވެ. އެ މަސައްކަތް އަލުން ފަށާފައި ވަނީ މަސައްކަތް މެދުކެނޑި ދުވަސްތަކެއް ދިއުމަށް ފަހު އެވެ.
ބިން ހިއްކުމުގެ މަސައްކަތް މަޑުޖެހިފައި އޮތުމުން މީގެކުރިން ގިނަ ބަޔަކު ވަނީ އެ މަސައްކަތް ހުއްޓާލީ ކަމަށް ބުނެ ވާހަކަ ދައްކާފަ އެވެ. ކަމާ ގުޅިގެން އޭރު ކޮންސްޓްރަކްޝަން މިނިސްޓަރު ޑރ. އަބްދުﷲ މުއްތޮލިބު ވިދާޅުވީ، ރަސްމާލެ މަޝްރޫގެ ދަށުން ވެލި ނަގައި ހިއްކުމުގެ މަސައްކަތް ކުރިއަށް ނުދިޔަ ނަމަވެސް އެ މަޝްރޫއުގެ މަސައްކަތް ނުހުއްޓޭ ކަމަށެވެ.
އެތަން ހިއްކުމުގެ މަސައްކަތް ކުރިއަށް ނުދަނީ ހަރަދު ކުޑަކުރުމަށް ބޮސްކާލިސްއިން ގުޅީފަޅު ހިއްކަން ބޭނުންކުރާ ޑްރެޖަރުން ރަސްމާލެ ވެސް ހިއްކުމުގެ ވިސްނުން ގެންގުޅޭތީ ކަމަށް މިނިސްޓަރު ވިދާޅުވި އެވެ.
ރަސްމާލެ މަޝްރޫއުގެ ދަށުން 1،153 ހެކްޓަރުގެ ބިން އަށް މަސް ދުވަހުގެ ތެރޭގައި ހިއްކަން ހަމަޖެހިފައިވެ އެވެ.
ރަސްމާލެ ހިއްކުމުގެ މަސައްކަތް 70 ހެކްޓަރުގެ ބިން ދިގުމުއްދަތަކަށް ދޭގޮތަށް ފުރަތަމަ ހަވާލުކުރީ ސްރީލަންކާގެ ކެޕިޓަލް މެރިން އެންޑް ސިވިލް ކޮންސްޓްރަކްޝަން ކޮމްޕެނީ (ސީއެމްސީސީ) އާ އެވެ. އެ މަސައްކަތް މިދިޔަ އަހަރުގެ ޑިސެމްބަރު މަހުގެ 18 ވަނަ ދުވަހު ފެށީ އަށް މަސް ދުވަހުގެ ތެރޭގައި ނިންމާ ގޮތަށެވެ. އެހެންނަމަވެސް އެ ކުންފުންޏަށް ބިން ދޫކޮށްގެން މަޝްރޫއުގެ މަސައްކަތް ކުރިއަށް ގެންދިއުމަށް ބޭނުންނުވާތީ އެ އެއްބަސްވުން ސަރުކާރުން ވަނީ އުވާލާފަ އެވެ.
