ރައީސް ގޮވާލެއްވީ މާނަހުރި ބަދަލުތަކާއެކު ފަލަސްތީނުގެ މައްސަލައިގައި ފިޔަވަޅުއަޅަން
ފަލަސްތީނުގެ ހައްގުގައި މާނަހުރި ބަދަލުތަކެއް ގެނެސް، އަޅަންޖެހޭ ފިޔަވަޅެއް އަޅައި ނިންމުމަށް ރައީސް ޑރ. މުހައްމަދު މުއިއްޒު އިލްތިމާސްކުރައްވައިފި އެވެ.
ރައީސް މިކަމަށް ގޮވާލެއްވީ، ސައުދީ އަރަބިއްޔާގައި ކުރިއަށްދިޔަ ޖޮއިންޓް އަރަބް-އިސްލާމިކް ސަމިޓްގައި ތަގުރީރުކުރައްވަމުން ނެވެ.
އެ ތަގުރީރުގައި މުސްލިމް އަދި އަރަބި ގައުމުތަކުން ފަލަސްތީނަށް ތާއީދުކުރަނިވި އުސޫލަކުން ފިޔަވަޅުތައް އެޅުމަށް ރައީސް ވަނީ އިލްތިމާސް ކުރައްވައިފަ އެވެ.
"އަޅުގަނޑުމެން އުއްމަތެއްގެ ގޮތުގައި، މިހާރުން މިހާރަށް ފިޔަވަޅެއް ނާޅައިފިނަމަ، ތާރީހުން އަޅުގަނޑުމެންގެ މައްޗަށް ހަރުކަށި ހުކުމް ކުރާނެ،" އެއްބައިވަންތަކަމާއި މާނަހުރި ބަދަލަކަށް މި ސަމިޓް ބަދަލުކުރުމަށް ގޮވާލައްވަމުން ރައީސް ވިދާޅުވި އެވެ.
ފަލަސްތީނުގެ ރައްޔިތުންނާ ދެކޮޅަށް، އެތައް ޒަމާންތަކެއް ވަންދެން ދިގުލައި ގޮސްފައިވާ އަނިޔާވެރިކަން ނިމުމަކަށް އަންނަންޖެހޭކަން ފާހަގަކުރައްވައި، "ފުދިއްޖެ" ކަމަށާއި، "ދެން އިތުރަށް އެކަން ބަރުދާސްތުކުރުމެއް ނެތް" ކަމަށް ވެސް އެ ތަގުރީރުގައި ރައީސް ވިދާޅުވި އެވެ.
އިސްރާއިލުގެ އުދުވާނީ އަމަލުތައް ކުށްވެރި ކުރަމުން ދިޔަ ކަމުގައި ވީ ނަމަވެސް، އާރާއި ބާރު ލިބިފައިވާ ވެރިންގެ ކިބައިން، އެކަށީގެންވާ ފިޔަވަޅުތަކެއް އަޅުއްވާ މަންޒަރު ފެނިގެންނުދާކަން ވެސް ރައީސް ވަނީ ފާހަގަކުރައްވައިފަ އެވެ.
ފާއިތުވި 75 އަހަރު، ފަލަސްތީނުގެ ރެފިއުޖީންނަށް އެހީތެރިކަން ފޯރުކޮށްދެމުންދިޔަ އދގެ ޖަމިއްޔާ (ޔޫއެންއާރްޑަބްލިއުއޭ)، އިޒްރޭލުން ރޫޅާލިރޫޅާލުންވެސް ވަނީ ކުށްވެރިކުރައްވާފަ އެވެ.
ރައީސް ވިދާޅުވީ އެ ޖަމިއްޔާއަކީ އިންތިހާއަށް މުހިންމު ޖަމިއްޔާއެއް ކަމަށާއި އެ ޖަމިއްޔާއަށް ބޭނުންވާ އެހީ ދިނުމުގައި ދެމިތިބުމަށްވެސް އެމަނިކުފާނު ވަނީ ބައިނަލްއަގުވާމީ މުޖުތަމައުއަށް ގޮވާލައްވާފަ އެވެ.
ރައީސް ވިދާޅުވީ އެ މައްސަލައިގައި ބައިނަލްއަގުވާމީ މުޖުތަމައުގެ ހަރަކާތްތެރިކަމާއި އަޅާލުންކުޑަކަމާއި، ވަކިން ހާއްސަކޮށް އދ.ގެ ސަލާމަތީ މަޖިލީހުގެ އަމަލުތައް ފާހަގަކުރައްވައި، ވީޓޯގެ ބާރުބޭނުންކުރުމުގެ ސަބަބުން މާނަހުރި ފިޔަވަޅުތަކަށް ހުރަސްއެޅި، ހަނގުރާމައިގެ ޖަރީމާތަކާއި ހަތިޔާރު ފޯރުކޮށްދިނުމުގެ މަގު ފަހިވެގެން ގޮސްފައިވާކަން އެމަނިކުފާނު ފާހަގަކުރެއްވި އެވެ.
