ބަޖެޓުގައި ސިއްހީ ދާއިރާއަށް 8.3 ބިލިއަން، އޯގަން ޓްރާންސްޕްލާންޓު ހިދުމަތް ފެށުން ހިމެނޭ
އަންނަ އަހަރަށް ލަފާކުރާ ދައުލަތުގެ ބަޖެޓުގައި ސިއްހީ ހިދުމަތުގެ ގޮތުގައި އޯގަން ޓްރާންސްޕްލާންޓްގެ ހިދުމަތް ރާއްޖޭގައި ފެށުމަށް ހިމަނައިފި އެވެ.
އަންނަ އަހަރަށް ލަފާކުރާ ބަޖެޓުގައި 56.6 ބިލިއަން ރުފިޔާ ހިމަނާފައިވާއިރު ސިއްހީ ހިދުމަތުގެ ގޮތުގައި ހިމަނާފައިވަނީ 8.3 ބިލިއަން ރުފިޔާ އެވެ.
ސިއްހީ ހިދުމަތްތަކުގެ ތެރޭގައި ހިމެނޭ 8.3 ބިލިއަން:
- ބޭސްފަރުވާގެ އެހީއާއި ސިއްހީ އާލާތްތައް - 1.1 ބިލިއަން
- އައުޓްޕޭޝަންޓް ހިދުމަތް - 1.8 ބިލިއަން
- ހޮސްޕިޓަލުގެ ހިދުމަތް - 4.9 ބިލިއަން
- އާންމު ސިއްހީ ހިދުމަތް - 247.1 މިލިއަން
- ސިއްހީ ދާއިރާގެ ރިސާޗާއި ޑިވެލޮޕްމަންޓް - 8.0 މިލިއަން
- އެހެނިހެން ސިއްހަތު - 180.7 މިލިއަން
ބަޖެޓުގައިވާ ގޮތުން ސިއްހީ ހިދުމަތް ހޯދުމަށް އޮތް ތަކުލީފު ނައްތާލުމަށް ހާއްސަ 5 ހޮސްޕިޓަލް ގާއިމުކުރެވިގެންދާނެ އެވެ. އަދި ރާއްޖޭގެ އެކި ސަރަހައްދުތަކުގައި ސަރަހައްދީ ފެންވަރެއްގައި ސިއްހީ ހިދުމަތް ފުޅާކުރެވިގެން ދިއުމާއެކު މަދު ހާލަތެއްގައި ނޫނީ މާލެ އަންނަ ނުޖެހި ފަރުވާ ހޯދޭނެ ނިޒާމުގެ ބިންގާއެޅޭނެ ކަމަށް ބަޖެޓުގައި ފާހަގަކުރެ އެވެ.
އަންނަ އަހަރަށް ލަފާކުރާ ބަޖެޓުގައި ހިމެނޭ ސިއްހީ ހިދުމަތުގެ ބަޖެޓުން އޯގަން ޓްރާންސްޕްލާންޓްގެ އިތުރުން ކެންސަރު ބަލީގެ ފަރުވާއާއި ބޯންމެރޯ ޓްރާންސްޕްލާންޓްކުރުން ފަދަ ހާއްސަ ސިއްހީ ހިދުމަތް ރާއްޖެއިން ލިބޭނެ މަގު ފަހިވެގެންދާނެ ކަމަށް ބުނެފައިވެ އެވެ.
އޭގެ އިތުރުން ބަލިވުމުގެ ކުރިން އާބާދީގެ ދުޅަހެޔޮކަމަށް އިސްވެ މަސައްކަތްކުރާނެ ޕްރައިމަރީ ހެލްތް ކެއާގެ ނިޒާމު މުޅި ރާއްޖެއަށް ފުޅާކުރުމުގެ މަސައްކަތް ކުރުމަށް ބެޖެޓުގައި ހިމަނާފައިވެ އެވެ.
ބޯންމެރޯ ޓްރާންސްޕްލާންޓާއި ކެންސަރު ހޮސްޕިޓަލަކީ ރައީސް ޑރ. މުހައްމަދު މުއިއްޒުގެ ރިޔާސީ ވައުދުފުޅެކެވެ. އެގޮތުން ބޯންމެރޯ ޓްރާންޕްލާންޓް ކުރެވޭ ގޮތަށް ހުޅުމާލޭގައި އިމާރާތްކުރަން ނިންމާފައިވާ ހޮސްޕިޓަލް ތަރައްގީކުރުމުގެ އެމްއޯޔޫއެއްގައި މިދިޔަ މަހު ސޮއިކޮށްފައިވެ އެވެ.
އެ ހޮސްޕިޓަލް އެޅުމަށް ހުޅުމާލެ ދެވަނަ ފިޔަވަހިން ސަރުކާރުން ވަނީ 72,000 ބިމެއް ހަމަޖައްސައިދެއްވާފަ އެވެ.
އޭގެ އިތުރުން ކެންސަރު ހޮސްޕިޓަލް ތަރައްގީކުރަން ނިންމާފައިވަނީ ދަރުމަވަންތަ ހޮސްޕިޓަލް ފުރަގަހުގައި އޮންނަ ހުސްބިމުގައި ކަމަށް ސަރުކާރުން މީގެ ކުރިން ވަނީ އިއުލާނުކޮށްފަ އެވެ. އެ ހޮސްޕިޓަލް ތަރައްގީކުރަން ނިންމާފައިވަނީ 25 ބުރިއަށެވެ.
