ފުލުހުންގެ ވެލްފެއާ ނިޒާމު ބަދަލުކުރިޔަސް އެލަވަންސް އުނި ނުކުރާނެކަމަށް ބުނެފި
ފުލުހުންގެ ވެލްފެއާ ނިޒާމު ބަދަލުކުރިޔަސް އެލަވަންސް އުނި ނުކުރާނެކަމުގެ ޔަގީންކަން ދީފި އެވެ.
ސިފައިންނާއި ފުލުހުންގެ މެޑިކަލް ވެލްފެއާ ސްކީމް އުވާލައި، ޕްރައިވެޑް އިންސުއަރަންސް ހަމަޖައްސަން ސަރުކާރުން ނިންމިކަން ހާމަވީ އަންނަ އަހަރަށް ލަފާކޮށް ހުށަހަޅާފައިވާ ބަޖެޓުގެ ތަފްސީލު ރިޕޯޓުން ނެވެ.
ނަމަވެސް ޕްރައިވެޓް އިންޝުއަރެންސް ހަމަވުމަށްފަހު އާސަންދަ ނިޒާމުގެ ތެރެއިން ސިއްހީ ފަރުވާ ލިބޭނެ ކަމަށް ވެސް ބުނެފައި ވެއެވެ.
އެކަމަށް އިޝާރާތްކޮށް ފުލުހުންގެ ސާވިސް ޑިވަލޮޕްމަންޓްގެ ވެރިއާ އެސިސްޓެންޓް ކޮމިޝަނާ އޮފް ޕޮލިސް އަހުމަދު ޝިފާން އެކްސްގައި މިއަދު ވިދާޅުވީ ފުލުހުންގެ މެޑިކަލް ސްކީމުގެ އިސްރާފުކުޑަކޮށް ހަރަދުތައް ޒިންމާދާރު ކުރުމަށް ވަރަށް ފުރިހަމަ ރިވިއުއެއް ހަދާނެ ކަމަށެވެ.
ހަމަ އެހެންމެ ޒިންމާދާރު ކަމާއެކު އެ ސްކީމު ރަނގަޅަށް ކުރިއަށް ގެންދިއުމަށް ކުރެވޭ މަސައްކަތުން ފުލުހުންނަށް މިހާރަށް ވުރެ ރަނގަޅަން ކަންކަން ހަމަޖެހިގެން ދާނެ ކަމަށާއި އަދި އެއްވެސް އެލަވަންސްއެއް ނުކަނޑާނެ ކަމަށް ވެސް އޭނާ ވިދާޅުވި އެވެ.
އޮޑިޓް ރިޕޯޓުގައި ދައްކާގޮތުގައި ސިފައިންނާއި ފުލުހުންގެ އިންޝުއަރެންސަށް މިދިޔަ އަހަރަށް ކަނޑައެޅި ބަޖެޓަށް ވުރެން 35 ޕަސެންޓް އިތުރަށް ހޭދަކޮށްފައިވެ އެވެ.
އެއީ ބަޖެޓުގައި އިތުރު އިންޝުއަރެންސްތަކަށް 179 މިލިއަން ރުފިޔާ ކަނޑައަޅާފައިވާއިރު، އަހަރު ނިމުނު އިރު އެ އަދަދު ހުރީ 241 މިލިއަން ރުފިޔާގައި ކަމަށް އޮޑިޓް ރިޕޯޓުން ދައްކަ އެވެ.
