ރައްޔިތުންނަށް ފައިދާވާން ނޭދޭ ސިޔާސީ ވެރިން ފެންނާނެ، ސަރުކާރު އޮންނާނީ ރައްޔިތުންގެ ފަޅީގައި: ރައީސް
ރައްޔިތުންނަށް ފައިދާވާން ނޭދޭ ސިޔާސީވެރިން ފެންނަ އަދަދު އިތުރުވާނެ ކަމަށާއި، ސަރުކާރު އޮންނާނީ ރައްޔިތުންގެ ފަޅީގައި ކަމަށް ރައީސް ޑރ. މުހައްމަދު މުއިއްޒު މިއަދު ވިދާޅުވެއްޖެ އެވެ.
"އެކްސް" ގައި ކުރެއްވި ޕޯސްޓެއްގައި ރައީސް ވިދާޅުވީ މި ސަރުކާރު ކުރިއަށްދާނީ ރައްޔިތުންގެ ފަޅީގައި އޮވެ ހުރިހާ ރައްޔިތުންނަށް އިންސާފުވެރިކަމާއެކު ތަނަވަސްކަން ހޯދައިދިނުމުގައި ކަމަށެވެ.
"ތަނަވަސްކަން ނެތް ރައްޔިތުންނަށް ފައިދާއެއް ވާން ނޭދޭ ސިޔާސީ ވެރީން ރައްޔިތުންނަށް ވަރަށް ސާފުވާތަން ކުރިއަށް އޮތްތާނގައި އިތުރަށް ފެންނާނެ" ރައީސް ލިޔުއްވި އެވެ.
ރައީސް މިފަދައިން ވިދާޅުވީ ރާއްޖެ އަންނަ ކޮންމެ ޓޫރިސްޓަކަށް ވަކި ރޭޓެއްގެ ދަށުން ޑޮލަރު މާާރުކުރަން މަޖުބޫރުވާ ގޮތަށް މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން އެކުލަވާލާފައިވާ އާ ގަވާއިދާ ގުޅިގެން ޓޫރިޒަމް ދާއިރާގެ ފަރާތްތައް ކަންބޮޑުވުން ފާޅުކުރަމުންދާ ދަނޑިވަޅެއްގަ އެވެ.
މިކަމާ ގުޅިގެން ގިނަ ރިސޯޓުތަކެއް ހިންގަމުންދާ މަހުޖަނު ޗަމްޕާ މުހައްމަދު މޫސާ (އުއްޗު) ވަނީ އެގޮތަށް އަމަލު ނުކުރާނެ ކަމަށް ބުނެ އެމްއެމްއޭއަށް ސިޓީ އެއް ފޮނުވާފައި ވެއެވެ. އަދި އިތުރު ރިސޯޓުތަކުގެ ވެރިންވެސް ގަވައިދާ އެއްގޮތައް އަމަލު ނުކުރާނެކަމަށް ބުނެފައިވީނަމަވެސް ރޭ މީޑިއާތަކަށް އެމްއެމްއޭއިން ފޮނުވި މެސެޖުގައި ބުނީ ރާއްޖޭގައި ހިންގަމުން އަންނަ 174 ރިސޯޓުގެ ތެރެއިން 173 ރިސޯޓު އެ ގަވައިދުގެ ދަށުން އެމްއެމްއޭގައި ރެޖިސްޓާވެފައިވާ ކަމަށެވެ.
މި މައްސަލަ ރައްޔިތުންގެ މަޖިލީހުގެ އިގްތިސޯދީ ކޮމެޓީން ބަލައިދިނުމަށް އެދި ގަލޮޅު އުތުރު ދާއިރާގެ އެމްޑީޕީ މެންބަރު މުހައްމަދު އިބްރާހިމް (ކުޑޫ) ވަނީ މަޖިލީހަށް ސިޓީއެއް ހުށަހަޅާފަ އެވެ.
އެ ސިޓީގައި ފަތުރުވެރިކަމުގެ ދާއިރާގެ ފަރާތްތަކުން ކަންބޮޑުވުން ހާމަކުރަމުންދާއިރު އެކަމަކީ މަޖިލީހުން ނުބަލާ ދޫކޮށްލާގެންވާނެ ކަމެއް ނޫން ކަމަށް ބުނެފައި ވެއެވެ.
އެހެންކަމުން އެ ގަވާއިދާ ގުޅިގެން މިހާތަނަށް ކަންހިންގާފައިވާ ގޮތް ސާފުކުރުމަށާއި ޓޫރިޒަމް ސިނާއަތުގެ ކަންބޮޑުވުންތައް މަޖިލީހުން ދެނެގަތުމަށްޓަކައި އެ ދާއިރާގައި ހަރަކާތްތެރިވާ ވިޔަަފާރިތަކާއި ވިޔަފާރިވެރިންނާ ބައްދަލުކޮށް, އާންމުކޮށް ހުޅުވާލައިގެން މަޖިލީހުގެ އިގްތިސޯދީ ކޮމިޓީން އެ ފަރާތްތަކުގެ އަޑު އެހުމުގެ ބައްދަލުވުމެއް ވަރަށް އަވަހަށް އިންތިޒާމުކޮށްދެއްވުން މެންބަރު އެދިވަޑައިގެންނެވި އެވެ.
އާ ގަވާއިދާ އެކު ކެޓަގަރީ އޭ ޓޫރިސްޓު ވިޔަފާރިތަކުން މީލާދީ މަހެއްގައި އަންނަ ކޮންމެ ޓޫރިސްޓަކަށް 500 އެމެރިކާ ޑޮލަރުގެ ރޭޓުން، އެ މަހަަށް ފަހު ހިނގާ ތިންވަނަ މަހުގެ 28 ވަނަ ދުވަހުގެ ކުރިން ދައްކަން ޖެހޭނެ އެވެ. އެ އުސޫލުން ކެޓަގަރީ ބީން ދައްކަން ޖެހޭނީ 25 ޑޮލަރުގެ ރޭޓުންނެވެ.
ކެޓަގަރީ އޭ ގެ ޓޫރިސްޓު ވިޔަފާރިއަކަށް އެ އަދަދަށް ފައިސާ ނުލިބޭނަމަ މީރާއަށް ހުށަހެޅުމަށް ގަވާއިދުގައި ބުނެފައިވެ އެވެ. އެގޮތުން ބަލަން ޖެހޭ ކަންކަން ބެލުމަށް ފަހު ގަވާއިދުގައި ބުނާ އަދަށް ވުރެ ދަށް އަދަދެއް އެ ވިޔަފާރިއަކަށް ކަނޑައެޅުމުގެ ބާރު އެމްއެމްއޭއަށް ލިބިގެންވާ ކަމަށް ވެސް ގަވާއިދުގައި ބުނެފައިވެ އެވެ.
ގަވާއިދުގައި ބަޔާންކުރާ މި މާއްދާތަކާ ހިލާފުވާ ވިޔަފާރިތައް 5،000 ރުފިޔާއާއި 1 މިލިއަން ރުފިޔާއާ ދެމެދުގެ އަދަދަކުން އެމްއެމްއޭއިން ޖޫރިމަނާ ކުރެވޭނެ ކަމަށް ވެސް ބުނެފައިވެ އެވެ.
