އަޒަރުބައިޖާންގެ ރައީސްއާ ރައީސް މުއިއްޒު ބައްދަލުކުރައްވައިފި
ރައީސް ޑރ. މުހައްމަދު މުއިއްޒު އަޒަރްބައިޖާންގެ ރައީސް އިލްހާމް އަލިޔޭވްއާ ބައްދަލުކުރައްވައިފި އެވެ.
އެ ބައްދަލުވުން ކުރިއަށް ދިޔައީ މިހާރު އަޒަރުބައިޖާންގައި ކުރިއަށްދާ މޫސުމީ ބަދަލުތަކާ ގުޅޭ ކޮޕް ސަމިޓުގެ ހަވާސާގެ ތެރެއިން ކަމަށް ރައީސް އޮފީހުން ބުނެފައިވެ އެވެ.
އެ ބައްދަލުވުމުގައި ރައީސް މުއިއްޒުވަނީ ކޮޕް ސަމިޓު ކާމިޔާބު ސަމިޓަކަށް ހެއްދެވުމަށް އަޒަރުބައިޖާނުން ކުރައްވާފައިވާ މަސައްކަތްތަކަށާއި، ދިވެހި ވަފުދަށް ދެއްވި މެހުމާންދާރީއަށްޓަކައި، ރައީސް އަލިޔޭވްއަށް ޝުކުރު އަދާކުރައްވާފަ އެވެ.
އަދި ދާދި ފަހުން ދެ ގައުމުގެ ދެމެދުގައި ސީދާ ވައިގެ ދަތުރުތައް ފަށާފައިވާކަން ފާހަގަކުރައްވައި އަޒަރުބައިޖާނުން ރާއްޖޭގައި ކުރާ އިންވެސްޓްމަންޓްތައް އިތުރުކުރުމަށް ވެސް އެމަނިކުފާނު ވަނީ އެދިވަޑައިގެންފަ އެވެ.
އ ބައްދަލުކުރެއްވުމުގައި ރައީސް އަލިޔޭވް ވަނީ ރާއްޖެއާއި އަޒަރުބައިޖާންއާ ދެމެދު އިގުތިސާދީ ގުޅުން ބަދަހިކުރެއްވުމަށް ޝައުގުވެރިކަން ފާޅުކުރެއްވައިފަ އެވެ.
އަދި މޫސުމަށް އަންނަ ބަދަލުތަކާ ގުޅޭ ކަންކަމުގައި ރާއްޖެއިން ދައްކަމުންދާ ލީޑާޝިޕަށް ތައުރީފު ކުރައްވައި، ކޮޕް ސަމިޓުގައި ބައިވެރިވެވަޑައިގެންނެވީތީ ރައީސް މުއިއްޒުއަށް ވަނީ ޝުކުރުވެސް އަދާކުރައްވައިފަ އެވެ.
އޭގެ އިތުރުން ކޮޕް ސަމިޓަކީ ދުނިޔޭގެ މޫސުމަށް އަންނަ ބަދަލުތަކާ ގުޅޭ ކަންކަމުގައި އެއްބާރުލުން އިތުރުކުރުމަށް ކާމިޔާބު މަންސައަކަށް ހެދުމާމެދު ދެބޭފުޅުން މަޝްވަރާކުރެއްވި އެވެ.
