ކާމިޔާބު އަހަރެއް,،ވެރިންނަށް ކުރަން ނުކެރުނު އެތައް ކަމެއް 'ރައްޔިތުންގެ ވެރިޔާ" ކޮށްދީފި

ވެރިކަންތަކާއި ރަސްކަންތައް މާޒީވެ ގޮސްފި އެވެ. ޖުމްހޫރީ ވެރިކަމުގެ ނިޒާމު ފެށުނު ފަހުން ދައުރުތަކެއް ދިވެހިން ތަރުޖިބާކޮށްފި އެވެ. 2008 ވަނަ އަހަރު ވުޖޫދުވި ފެހި ގާނޫނުއަސާސީއަށް ފަހު 3 ދައުރަކާއި 4 ވެރިއެއްގެ ވެރިކަން ދިވެހިންނަށް ފެނިއްޖެ އެވެ. ދައުރުތައް ނިމި, އާ ދައުރުތަކަށް ވެރިން އިންތިހާބުވި ނަމަވެސް ނިމުމެއް ނާންނަނީ ރައްޔިތުންގެ ފޮނި އުންމީދުތަކެވެ. ކުލަ ނުވެ އޮތީ ރައްޔިތުންގެ ހުވަފެންތަކެވެ. ފުއްދައި ނުދެވި އޮންނަނީ ރައްޔިތުންނަށް ވެވަޑައިގެންނެވި ވައުދުތަކެވެ. ދައްކާ ވާހަކަފުޅުގައި އޮއްޓަރެއް ނެތި, ވާހަކަތައް ބިލާހަކަށްވުމުގެ ނަތީޖާއަކަށްވީ ރައީސުލްޖުމްހޫރިއްޔާގެ މަގާމަށް އިންތިހާބުވާ ބޭފުޅަކަށް ކުރަމުން ދިޔަ އިތުބާރު ގެއްލުމެވެ. އެހެންނަމަވެސް މި ވެރިކަން ތަފާތެވެ. ތަފާތު ވެރިއެވެ. ޖުމްހޫރީ ވެރިކަމުގެ އާ ބޮޅަކުން މިދިޔަ އަހަރު ނޮވެންބަރު މަހުގެ 17 ވަނަ ދުވަހު ވެރިކަމާ ހަވާލުވެވަޑައިގެންނެވި ރައީސުލްޖުމްހޫރިއްޔާ ޑރ. މުހައްމަދު މުއިއްޒު ފެނިވަޑައިގެންނެވީ ޖެހިލުން ކުޑަ ވެރިއެއްގެ ގޮތުގަ އެވެ. ރައްޔިތުންގެ އުންމީދުތަކާއި ހުވަފެންތަކާއެކު ގައުމު އަމާން އޮމާން އައްސޭރިއަކަށް ގެންދިއުމަށް, ދިވެހިންނަށް "ދިވެހިންގެ ރާއްޖެ" އެއް ހޯދައިދިނުމުގެ އުންމީދުގައި ރައީސް މުއިއްޒު ފެއްޓެވި ދަތުރުފުޅަށް އަހަރުވެގެން ދިޔައިރު, ހުވަފެންތަކުގައި ކުލަ ޖެހެމުންދާ މަންޒަރުތައް އެބަ ފެނެ އެވެ. ވެރިކަމަށް އަންނަ ބޭފުޅުން ދައްކަވާ ވާހަކަތައް ބިލާހަކަށް ނުވާނެ ކަމުގެ ފެހި ސިންގަލް ރައްޔިތުންނަށް ދަނީ ލިބެމުންނެވެ. ފާއިތުވެގެން ދިޔަ 366 ދުވަހަކީ ވެރިއެއްގެ ހައިސިއްޔަތުން ރައީސް މުއިއްޒަށް ގޮންޖެހުން ބޮޑު ދުވަސްތަކެކެވެ. ކޮވިޑް-19 ގެ އާލަމީ ވަބާއާ ގުޅިގެން ބިލިއަން ބިލިއަނުން ދިވެހި ސަރުކާރުން ނެގި ލޯނުތަކާއި ވިއްކި ސުކޫކާއި ބަދަލުކުރި ކަރަންސީ އެއްބަސްވުންތަކާއި ޗާފުކުރި ފައިސާތަކުގެ ސަބަބުން މާލީ ގޮތުން ރާއްޖެ ވެއްޓިފައިވާ އަނދަވަޅުން ސަލާމަތްކުރަން ގިނަ މަސައްކަތްކުރަން ޖެހުނެވެ. އާމްދަނީ އިތުރުކުރަމުން ރައްޔިތުންގެ ކަންކަން ކޮށްދިނުމަށް މަޖުބޫރުކުރަނިވި އަހަރަކަށް މިދިޔަ އަހަރުވެގެން ދިޔަ އެވެ.

ބިދޭސީންގެ މައްސަލައަށް ހީނުކުރާފަދަ ހައްލެއް!

މުޖުތަމައުގެ ހަމަޖެހުމާއި ސުލްހަވެރިކަން ގެއްލި, ދޭދޭ ފަރުދުންގެ މެދުގައި އުފެދިފައިވާ ގުޅުން ހީނަރުވެފައިވުން އަސްލު މައްސަލަ ފެށިގެން އަންނަނީ ކުށުގެ ވެށިންނެވެ. ރާއްޖޭގައި ހިނގާ ކުށްތަކުގެ ބޮޑު އިންސައްތައެއްގައި ބިދޭސީން ޝާމިލުވާއިރު ބިދޭސީންގެ މައްސަލައަށް ހައްލެއް ލިބިގެންދާން ދިވެހިން ބޭނުމެވެ. އެ މަސައްކަތް ހައްލުކުރަން މީގެ ކުރީގެ ދައުރުތަކުންވެސް މަސައްކަތް ކުރި އެވެ. އެކަމަކު ދައުރު ނިމުނުއިރުވެސް އެކަމަށް ހައްލެއް ނުލިބެ އެވެ. [caption id="attachment_252656" align="alignnone" width="690"] އިމިގްރޭޝަނުން ހިންގި ރެއިޑެއްގެ ތެރެއިން[/caption] އޭރު ގާނޫނު ބުނާ ގޮތުން އެއް ގައުމަކުން ދިވެހިރާއްޖެއަށް ގެނެވޭނީ 1 ލައްކަ މަސައްކަތްތެރިން ކަމަށްވާއިރު އެ އަދަދު ހަމަވި ކަމަށް ބުނެ އެ ގައުމުން އިތުރު މަސައްކަތްތެރިއެއް ނުގެނެވޭ ގޮތަށް ފާއިތުވި ސަރުކާރުން ނިންމި އެވެ. އެއީ ރައްޔިތުން އުންމީދުކުރި ހައްލެއް ނޫނެވެ. ނުގަވާއިދުން ރާއްޖޭގައި އުޅޭ ބިދޭސީންނަށް ގާނޫނުގެ ތެރެއިން ފިޔަވަޅު އަޅަން ބޭނުންވި ނަމަވެސް އެ މައްސަލައަށް ހައްލު ހޯދުމުގެ ނަމުގައި ގަލޮޅު ފުޓުބޯޅަ ދަނޑަށް އެ މީހުން އެއްކޮށްގެން މައުލޫމާތު ނެގި ދުވަސް ވެސް މާޒީވެ ދިޔަ އެވެ. ނުފެނުނީ ނަތީޖާއެކެވެ. އެހެންނަމަވެސް ދާހިލީ ސަލާމަތާއި ފަންނިއްޔާތާ ބެހޭ ވުޒާރާއިން އިމިގްރޭޝަނާ ގުޅިގެން އޮޕަރޭޝަން "ކުރަނގީ" ގެ ނަމުގައި ފެށީ ތަފާތު އޮޕަރޭޝަނެކެވެ. އޭގެ ނަތީޖާ ދަނީ ފެންނަމުންނެވެ. ނުގަވާއިދުން އުޅޭ ބިދޭސީންނަށް ފިޔަވަޅު އަޅާ, ޑީޕޯޓްކުރުމުގެ މަސައްކަތް ހުއްޓުމެއް ނެތި ކުރިއަށް އެބަދެ އެވެ. ރައީސްގެ އިރުޝާދުފުޅުގެ މަތިން ވަޒީރު އަލީ އިހުސާނާއި އިމިގްރޭޝަން ކޮންޓްރޯލާ ޖެނެރަލް މުހައްމަދު ޝައްމާން ކުރަމުންދާ މަސައްކަތުން މިހާތަނަށް 5000 އަށް ގިނަ ބިދޭސީން އަނބުރާ އެ މީހުންގެ ގައުމަށް ފޮނުވާލާފައިވެ އެވެ. ފިޔަވަޅުތައް އަޅަން ފެށުމާއެކު ވޯކް ވިސާއާއި އެފަދަ ފީތަކުގެ ގޮތުގައި އަދި ޖޫރިމަނާގެ ގޮތުގައި ދައުލަތަށް ނުދައްކާހުރި 1 ބިލިއަނަށްވުރެ ގިނަ ރުފިޔާ ދައްކާފައިވާކަން ވަޒީރު ފާހަގަކުރައްވަ އެވެ. ބިދޭސީން ގާނޫނުގެ ތެރެއަށް ވެއްދުމަށް ކުރަމުންގެންދާ މަސައްކަތުގެ ތެރެއިން އެ މީހުންގެ މައުލޫމާތު އެއްކޮށް, ޕިންގާ ޕްރިންޓް ނެގުމުގެ މަސައްކަތް ވެސް އެ އޮޕަރޭޝަންގައި ކުރިއަށްގެންދެ އެވެ. އެއާއެކު އެ ހިދުމަތް ޑިޖިޓަލައިޒް ކުރެވިގެންދާނެ އެވެ. މާލެ ސަރަހައްދުގައި ފެށި އެ އޮޕަރޭޝަން އަތޮޅު ތެރެއަށް ވެސް ފުޅާކޮށްފި އެވެ. ޑީޕޯޓްކުރާތީ އަތޮޅު ތެރެއަށް ފިލަން ދިޔަ ބިދޭސީންވެސް އަތުލައިގަނެފި އެވެ. އެ މަސައްކަތް ދިވެހިން ބަލައިގަންނަނީ ނުހަނު އުފާވެރި ހިތަކާއެކު އެވެ. ތައުރީފްކުރަމުންދަނީ ޝުކުރާއެކު އެވެ.

މަސްތުވާތަކެއްޗަށް ހައްލު ލިބިދާނެ ކަމުގެ އުންމީދު ބޮޑު, ސިހޭ ފަދަ ގާނޫނު އަދަބުތަކެއް

ގައުމަށް ދިމާވެފައިވާ އެފަދަ މައްސަލަތަކަށް ބަލާއިރު މަސްތުވާތަކެތީގެ މައްސަލައަކީ ޒުވާނުންގެ ކުރިމަގު ބަނަކޮށް, ގިނަ ބަޔަކު ހަލާކުކޮށްލާ ބޮޑު ވަބާއެކެވެ. އޭގެ ސަބަބުން އިޖުތިމާއީ އެތައް މައްސަލަތަކެއް ނިކުމެ އެވެ. ގްރޫޕްތައް ނުވަތަ ގޭންގްތައް ހަދައިގެން އެ އަމަލު ހިންގަމުންދާއިރު މަގުމަތީގައި ތިބެ ސަލާމް ޖަހައިގެންނާއި ކުނި ބުނި ވިއްކައިގެން ނުވަތަ ވައްކަންކޮށްގެން މަސްތުވަމުންދާ އަދަދު ގިނަ އެވެ. އެ މައްސަލަ ހައްލުކުރުމަކީ މި ސަރުކާރުން ހާއްސަ އިސްކަމެއް ދީގެން ކުރަމުން އަންނަ މަސައްކަތަކަށްވާއިރު މިދިޔަ އަހަރެއްހާ ދުވަހުގެ ތެރޭގައި 100 އަށްވުރެ ކިލޯއަށް ވުރެ ގިނަ މަސްތުވާތަކެއްޗާއި ފުޅިއާއި ދަޅު ހިމެނޭހެން 8000 އަށް ވުރެ ގިނަ ބަނގުރާ އަތުލައިގެންފައިވެ އެވެ. އެތަކެތި އެތެރެކޮށް ވިޔަފާރިކުރާ ފަރާތްތަކާއި އެތަކެތި ބޭނުންކުރާ ފަރާތްތަކަށް ޤާނޫނުން ދެވެން ޖެހޭ ފިޔަވަޅުތައް އެޅުމުގެ މަސައްކަތްތައް ކުރަމުންދާއިރު މަސްތުވާތަކެތީގެ ޤާނޫނާއި ގޭންގު ކުށްތައް ހުއްޓުމުން ފަދަ ޤާނޫނުތައް ހަރުދަނާކޮށް, ހަރުކަށި އަދަބު ދިނުމަށް އަންނަނީ މަސައްކަތްކުރަމުންނެވެ. އެގޮތުން ދެ ބިލެއްގެ ޑްރާފްޓް ބަންޑާރަ ނައިބުގެ އޮފީހަށް ފޮނުވާ ލަފާ ހޯދުމުގެ މަސައްކަތް ފައްޓަވާފައިވާއިރު މަސްތުވާތަކެތީގެ ޑްރާފްޓް ބިލުގައި ބުނާ ގޮތުން ރާއްޖެއަށް މަސްތުވާތަކެތި އެތެރެކުރާ މީހުންނަށް މަރުގެ އަދަބު ދެވިގެންދާނެ އެވެ. އަދި ގޭންގް ބިލުގެ ސަބަބުން ގޭންގު ހަރަކާތެއް ހިންގުމަށް ތައްޔާރުވުމުގެ ގޮތުން ނުވަތަ ގޭންގުގެ މެންބަރުން އެކަކު އަނެކަކަށް ބައްދަލުވެ އުޅުމަށްޓަކައި ވަކި ގެއަކަށް ނުވަތަ ތަނަކަށް އެއްވެ ކުށެއް ކުރަން އުޅޭކަމަށްވާނަމަ އެތަނަކަށް ކޯޓު އަމުރެއް ނެތި ފުލުހުންނަށް ވަދެވިގެންދާނެ އެވެ. އަދި އެ ކުށްތައް ކޮށްގެން ހޯދާ ފައިސާ ދައުލަތަށް ނެގޭ ގޮތަށްވެސް އެ ބިލުތަކުގައި ބުނެފައިވެ އެވެ. އަދަބު ނުދެވި, ނުވަތަ ލުއި އަދަބު ދެވޭތީ މިފަދަ ކުށްތައް އިތުރުވެގެން ދިއުން މި ބިލުތަކާއެކު ނިމުމަކަށް އަންނާނެ ކަމީ ޝައްކެތްވެސް އޮތް ކަމެއް ނޫނެވެ. އޭގެ އިތުރުން މަސްތުވާތަކެތި ބޭނުންކުރާ ފަރާތްތައް ފަރުވާގެ ތެރެއަށް ވެއްދުމަށް ސަރުކާރުން ފަށާފައިވާ އޮޕަރޭޝަންގެ ދަށުން މަގުމަތީގައި ސަލާންޖަހައިގެންނާއި ވައްކަންކޮށްގެން ނުވަތަ ފޭރިގެން މަސްތުވާތަކެތި ބޭނުންކުރާ މީހުންނާއި މަގުމަތީ މަސްތުގެ ހާލަތުގައި އުޅޭ މީހުންގެ އިތުރުން މިސްކިތްތަކުގައި ނިދާ މަގުމަތިވެފައިވާ މީހުންވެސް ގެންދަން ވަނީ ފަށާފަ އެވެ. ދާދިފަހުން ފެށި އެ މަސައްކަތުގެ ތެރެއިން މިހާތަނަށް 47 މީހަކު ފަރުވާއަށް ގެންގޮސްފައިވާ ކަމަށް ނޭޝަނަލް ޑްރަގް އެޖެންސީ (އެންޑީއެމްއޭ) ގެ އެންމެ ފަހުގެ ތަފާސް ހިސާބުން ހާމަވެ އެވެ.

ބަލަބަލަ ތިއްބާ މަނާކޮށްލީ ވޭޕް!

ދުންފަތަކީ މަސްތުވާތަކެއްޗަށް ވަނުމަށް ހުޅުވޭ ދޮރެއް ކަމަށް ގިނަ ބަޔަކު ދެކެ އެވެ. ޅަ އުމުރުގައި ސިނގިރޭޓް ބުއިމަށް ދެވިހިފާފައި ވަނިކޮށް, އޭގެ ބަދަލުގައި ބޭނުންކުރެވޭ ކަމަށް ބުނެ އީ- ސިނގިރޭޓާއި ވޭޕް ފަދަ ތަކެތި އުފެދި އާންމުވީ އެވެ. ކޮންމެ މީހެއްގެ ޖީބުގައި މިފަދަ އެއްޗެއް އޮތުމަކީ ލާޒިމެއް ހެން ހީވާ ހިސާބަށް ދިޔައީއެވެ. ސްކޫލް ދަރިވަރުންގެ މެދުގައި އީ- ސިނގިރޭޓާއި ވޭޕް "ޓެރެންޑް" ވެ, ނަތީޖާއަކަށްވެގެން ދިޔައީ ވޭޕްގެ ކާޓްރޭޖަށް ޒާތް ޒާތުގެ މަސްތުވާތަކެތި އަޅައިގެންވެސް އެތެރެކުރަން ފެށީ އެވެ. އެ މައްސަލަ ބޮޑުވެ, މާ ދިގު ދެންމުމެއް ނެތި ރައީސުލްޖުމްހޫރިއްޔާ ރައްޔިތުންގެ މަޖިލީހަށް ހުށަހަޅުއްވައިގެން ފާސްކޮށް ނިންމާ, ތަސްދީގުކޮށް, ގާނޫނުން އީ- ސިނގިރޭޓާއި ވޭޕް ރާއްޖެއިން މަނާކުރީ އެވެ. މިދިޔަ ހުކުރު ދުވަހުން ފެށިގެން އެތަކެތި ރާއްޖެ އެތެރެކުރުން މަނާކޮށްފައިވާއިރު އަންނަ މަހުގެ 15 ގެ ފަހުން އެތަކެތި ބޭނުންކުރުން އެ ގާނޫނުން މަނާވެގެންވެ އެވެ. ގިނަ ބަޔަކު ސިއްސުވާލި އެ ގާނޫނާއެކު އިމްޕޯޓް ޑިއުޓީގެ ގާނޫނުގެ ދަށުން ސިނގިރޭޓާއި ބިޑީގެ ޓެކްސް ވެސް ބޮޑުކުރެއްވީ އެވެ. އެގޮތުން ސިނގިރޭޓާއި ބިޑިއަށް ނަގާ އިމްޕޯޓް ޑިއުޓީގެ ސްޕެސިފިކް ރޭޓް 3 ރުފިޔާއިން 8 ރުފިޔާއަށް މަތިކުރަން ރައީސް ވަނީ ނިންމަވާފަ އެވެ. ބޮޑެތި އަދަބުތަކާއެކު ގާނޫނަކަށް ވޭޕްގެ ބިލު ވެގެން ދިޔައީ މުޅި ގައުމު ސިއްސުވާލާފަ އެވެ. ރައީސް މުއިއްޒުގެ އެ މަސައްކަތް ފެނި, ގިނަ ބަޔަކު ސިފަކުރެއްވީ ރާއްޖޭގެ ޖުމްހޫރިއްޔާގެ ފުރަތަމަ ރައީސް މުހައްމަދު އަމީން ފަދަ ކެރިވަޑައިގެން ޖެހިލުން ކުޑަ ރައީސްގެ ގޮތުގަ އެވެ.

ޑޮލަރުގެ އަގު ހިފަހައްޓަން މަހުޖަނުނާ ދެކޮޅަށް ނިކުންނެވި

ދިވެހިރާއްޖެ ރަން ބިސް އަޅާ ކުކުޅު, އާމްދަނީ އެންމެ ގިނައިން ވަންނަ ދޮރަކީ ފަތުރުވެރިކަމުގެ ސިނާއަތެވެ. 100 އެތައް ރިސޯޓެއް ރާއްޖޭގައު އޮތް ނަމަވެސް ޑޮލަރުގެ އަގު ދަނީ އަތް ނުޖެހި އެވެ. ޑޮލަރުގެ އަގު ކަޅު ބާޒާރުގައި 20 ރުފިޔާއަށް ވުރެ މައްޗަށް އަރައިގެން ދިޔައިރު އެކަމަށް ހައްލެއް ގެނެސްދޭނެ ވެރިއަކު މި ގައުމަކަށް ނާދެ އެވެ. ހެޔޮ އަގުގައި ޑޮލަރު ހޯދަން ދަތިވެ, ސިއްހީ ހިދުމަތް ހޯދުމަށް ރާއްޖެއިން ބޭރަށް ފުރައިގެންދާ ނިކަމެތި ރައްޔިތު މީހާ ބޮޑު އަގުގައި އެ ޑޮލަރު ގަންނަން މަޖުބޫރުވެދެ އެވެ. ރައްޔިތުންގެ ކަންބޮޑުވުން އިންތިހާއަށް ބޮޑުވެފައިވާ އެ މައްސަލައާ ގުޅިގެން މަރުކަޒީ ބޭންކް, މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން ގަވާއިދު ހަރުކަށި ކުރި އެވެ. ކޮންމެ ރިސޯޓަކުންވެސް ވަކި ވަރަކަށް ޑޮލަރު ރާއްޖޭގެ ބޭންކަކަށް މާރުކުރަން އެ ގަވާއިދުން ލާޒިމުކުރެ އެވެ. ރިސޯޓުތަކުގެ ބޮޑެތި މަހުޖަނުންނާ ދެކޮޅަށް އެ ވަރުގެ ބޮޑު ނިންމުމެއް ނިންމުމުން އެ ގަވާއިދަށް އަމަލުނުކުރާނެ ކަމަށް ދަނީ ބުނަމުންނެވެ. އެ މަހުޖަނުންގެ ވާހަކަ ހުރި ގޮތުން އެއީ އެންމެ ފަގީރު މީހުން ކަމުގައި ވިޔަސް ރައީސް ހުންނެވީ އެ ނިންމުން ބަދަލުކުރާ ވިސްނުންފުޅެއްގައެއް ނޫނެވެ. ބަޔާންތަކާއި ސިޓީތަކާއި މި ނޫން ވެސް ކުރެވެން ހުރި ކަމެއް ރިސޯޓްތަކުގެ ވެރިން ކުރި ނަމަވެސް ރައީސް ހުންނެވީ ޖެހިލުންވެވަޑައިގަންނަވާނެ ގޮތަކަށް ނޫނެވެ. އެ ގަވާއިދު ބުނާ ގޮތުން "އޭ" ކެޓަގަރީގެ ފަތުވެރިކަމުގެ ވިޔަފާރިތަކުން ކޮންމެ މަހެއްގައި އަންނަ ޓޫރިސްޓަކަށް 500 ޑޮލަރުގެ ރޭޓުން އެ މަހަކަށްފަހު ހިނގާ 3 ވަނަ މަހުގެ 28 ވަނަ ދުވަހުގެ ކުރިން މާރުކުރަން ޖެހޭނެ އެވެ. އަދި އެ އުސޫލުގެ މަތިން "ބީ" ކެޓަގަރީގެ ވިޔަފާރިތަކުން ދައްކަން ޖެހެނީ 25 ޑޮލަރުގެ ރޭޓޫން ކަމަށް ބުނެފައިވެ އެވެ. އެ ގަވާއިދު ބުނާ ގޮތުން އެ މާއްދާތަކާ ހިލާފުވާ ވިޔަފާރިތައް 5,000 ރުފިޔާއާއި 1 މިލިއަން ރުފިޔާއާ ދެމެދުގެ އަދަދަކުން އެމްއެމްއޭއިން ޖޫރިމަނާކުރާނެ އެވެ.

އާސަންދައިން ކުރަމުންދާ ވައްކަމަށް ނިމުމަކަށް

ބޭސްފަރުވާއަށް ނިމުމަކަށް ގެނައުމަށް ހަދާފައިވާ ހުސްނުވާ އާސަންދައިގެ ބޭނުން ނަހަމަ ގޮތުގައި ހިފަމުން އައީ ތަންތަނުގެ ވެރިންނެވެ. ނުދޭ ހިދުމަތްތަކަށް ބިލުކޮށް, ދައުލަތުން ވައްކަން ކުރަމުން ދިޔަ އެވެ. އެހެން ގޮސް ވައްކަން ފަޅައަރާ އެފަދަ ތަންތަނުގެ ހިދުމަތްވެސް ސަސްޕެންޑްކުރި އެވެ. އެފަދަ އެތައް މައްސަލައެއް ފެންމަތިވެ, އެ ހިދުމަތައްވެސް ބަދަލުތަކެއް ދާދިފަހުން ވަނީ ގެނެސްފަ އެވެ. އާސަންދައިގެ "އައުޓް ޕޭޝަންޓް" ހިދުމަތްގެ ދަށުން އިންސުއަރެންސްގެ ހިދުމަތް ލިބޭ ފަރާތްތަކަށް އާސަންދައިގެ ހިދުމަތް ލިބޭނީ އިންސުއަރެންސްއިން ކެނޑުމަށްފަހު ކަމަށް ގަވާއިދު ބަދަލުކުރި އެވެ. ދުނިޔޭގެ އެހެން ގައުމުތަކުގައި ވެސް އެފަދަ ހިދުމަތްތައް ދެމުން ގެންދަނީ ހުރިހާ ރައްޔިތުންނަށް ހަމަހަމައިންނެއް ނޫނެވެ. އެ ހިދުމަތަށް އެންމެ ބޭނުންޖެހިފައިވާ, ނިކަމެތިންނަށް އެފަދަ ހިދުމަތްތަކުގައި އިސްކަންދެ އެވެ. ކުރިއަށް އޮތް އަހަރަށް ލަފާކުރާ ދައުލަތުގެ ބަޖެޓު ފާސްކުރެވިގެންދާއިރު އުމުރުން ދުވަސްވީ މީހުންނަށް ދޭ ޕެންޝަނާއި ސަބްސިޓީތައް އެ އުސޫލުން ބަދަލުވެގެންދާނެ އެވެ.

ސިޔާސީ މަގާމުތަކަކަށް ނުސިހޭނެ

ކޮންމެ ވެރިކަމެއްގައިވެސް ސިޔާސީ މަގާމުތަކުގައި ތިއްބަވާ ބޭބޭފުޅުންނަކީ އެންމެ ނުފޫޒު ވަރުގަދަ ފަރާތްތަކެވެ. އެ ބޭބޭފުޅުންނާ ދެކޮޅަށް ވެރިއަކަށް ހުންނަ ބޭފުޅަކަށް ކިރިޔާވެސް ގޮތެއް ނިންމުމަކީ ލާހިކު ކަމެއް ނޫނެވެ. އެހެންނަމަވެސް ރާއްޖެ ވެއްޓިފައިވާ އަނދަޅުން އަރައިގަތުމަށް ސިޔާސީ މަގާމުތަކުގައި ތިބި 228 މީހަކު މަގާމުން ވަކިކުރި މަންޒަރުން ފެނިގެން ދިޔަ އެވެ. އެއަށްފަހު އެ ފަދަ މަގާމުތަކުގައި ދެން ތިބި ބޭފުޅުންގެ މުސާރައިން 10 އިންސައްތަ އުނިކުރަން ނިންމާ އިއުލާނުކުރެއްވި އެވެ. ރައީސް މުއިއްޒުގެ ވެރިކަމުގެ ފުރަތަމަ އަހަރަކީ ގިނަ ގޮންޖެހުންތަކާ ކުރިމަތިލާންޖެހުނު ނަމަވެސް، ރައްޔިތުންނަށްޓަކައި އެ ނޫނަސް ގިނަގުނަ މަސައްކަތްތަކެއް ކުރެވުނު އަހަރެކެވެ. ކުރިއަށް އޮތް އަހަރުތަކުގައިވެސް ރައްޔިތުންގެ ލާބައާއި މަންފާއަށް މަސައްކަތް ކުރައްވާނެކަމުގެ ކަމަށް ރައްޔިތުން އުންމީދުކުރެ އެވެ. ރައީސް މުއިއްޒަކީ ޖެހިލުން ކުޑަ ބޭފުޅެކެވެ. އެއީ ރައްޔިތުންގެ ވެރިޔާ އެވެ. ރައްޔިތުން ޝުކުރުވެރި ހިތަކާއެކު ތިޔަ ވެރިމީހާއަށް ދެނީ "އޭ" ރިޕޯޓެކެވެ.