ދިވެހި ޕްރިމިއާ ލީގުގައި ވާދަކުރާ ކޮންމެ ކުލަބަކަށް އެޕާޓްމެންޓަކާއި ފުޑްކޯޓެއް
ކުރިއަށް އޮތް އައު ސީޒަނުގައި ދިވެހި ޕްރިމިއާ ލީގުގައި ވާދަކުރާ ކޮންމެ ކުލަބަކަށް ދެ ކޮޓަރީގެ އެޕާރޓްމަންޓަކާއި ފުޑް ކޯޓެއް ދިނުމަށް ނިންމާފައިވާ ކަމަށް އެފްއޭއެމްގެ ރައީސް ބައްސާމް އަދީލް ޖަލީލް ވިދާޅުވެއްޖެއެވެ.
ބައްސާމް މިހެން ވިދާޅުވެފައި ވަނީ ރާއްޖެ ޓީވީގެ "ކުޅިވަރު ފައިލް" ޕްރޮގްރާމްގައި ވާހަކަ ދައްކަވަމުންނެވެ. އަދި ހަމައެހެންމެ ކުލަބުތަކަށް އިތުރު އެހީތެރިކަން ވެސް ފޯރުކޮށްދޭން ނިންމާފައިވާކަމަށް ބައްސާމް ވިދާޅުވިއެވެ. އެގޮތުން ވިލިމާލޭގައި އެފްއޭއެމުން ތަރައްގީ ކުރަމުންދާ ޓާފް ދަނޑުގެ މަސައްކަތް ނިމޭއިރު އެ ދަނޑުގައި އެކޮމެޑޭޝަން ބްލޮކެއް ޤާއިމް ކުރެވިފައި ހުންނާނެ ކަމަށާއި އެ އެކޮމެޑޭޝަން ބްލޮކުން ޕްރިމިއާ ލީގުގައި ވާދަކުރާ ކޮންމެ ކުލަބަކަށް ދެ ކޮޓަރީގެ އެޕާޓްމަންޓެއް ވެސް ދެވޭނެ ކަމުގައި ބައްސާމް ވިދާޅުވިއެވެ.
މީގެ އިތުރުން ބައްސާމް ވިދާޅުވީ ދުނިޔޭގެ އެހެން ގައުމުތަކުގައިވެސް ކުލަބުތައް ހިންގާ ގޮތަށް ރާއްޖޭގައި ވެސް ވިޔަފާރި މޮޑެލަކަށް ބަދަލު ކުރުމަށް ވިސްނުން ގެންގުޅުއްވާ ކަމަށެވެ. ބައްސާމް ވިދާޅުވީ ކޮންމެ ވިލިމާލޭ ހިއްކި ބިމުގައި ހެދިގެންދާ ހަތަރުބުރީގެ އިމާރާތުގެ އެންމެ މަތިން ކުލަބަކަށް ވެސް ފުޑްކޯޓެއް ދެއްވާނެ ކަމަށެވެ. އަދި އެތަނުގައި ކޮންމެ ކުލަބަކަށްވެސް ރެސްޓޯރެންޓެއް ނުވަތަ ކެފޭއެއްް ހިންގުމުގެ ފުރުސަތު ލިބިގެންދާނެ ކަމަށް ބައްސާމް ވިދާޅުވިއެވެ. ހަމައެހެންމެ އެ އިމާރާތުގެ އެންމެ ތިރީގައި 2،000 އަކަފޫޓުގެ ކުޅިވަރު ޝޮޕެއް ހުންނާނެ ކަމަށާއި އެ ޝޮޕުގައި ކުލަބުތަކުގެ ޖާޒީއާއި ތަފާތު ތަކެތި ވިއްކުމުގެ ފުރުސަތު ލިބިގެންދާނެ ކަމަށް ބައްސާމް ފާހަގަ ކުރެެއްވިއެވެ.
އެފްއޭއެމްގެ ރައީސްކަމުގެ މަގާމަށް ދެވަނަ ދައުރަކަށް އިންތިހާބުވުމަށް ފަހު ބައްސާމް އަންނަނީ ކުލަބުތަކަށް މާލީ ގޮތުން އެހީތެރިކަން ފޯރު ކޮށްދިނުމަށް މަސައްކަތްތަކެއް ކުރައްވަމުންކަން ފާހަގަ ކުރެވެއެެވެ.
