އިންޓެގްރިޓީ ކޮމިޝަންގެ މެންބަރު އައްޔަންކުރަން މަޖިލީހަށް
ނޭޝަނަލް އިންޓެގްރިޓީ ކޮމިޝަން (އެންއައިސީ) އަށް މެންބަރަކު އައްޔަންކުރަން ރައްޔިތުންގެ މަޖިލީހަށް ފޮނުވައިފި އެވެ.
މަޖިލީހުގެ މިއަދުގެ ޖަލްސާގައި އިދާރީ މޭޒުން ވަނީ ރައީސް ޑރ. މުހައްމަދު މުއިއްޒު, މަޖިލީހުގެ ރައީސް, އަބްދުއްރަހީމް އަބްދުالله އަށް ފޮނުއްވި ސިޓީފުޅު އިއްވައިދެއްވާފަ އެވެ.
އެ މަގާމަށް ކުރިމަަތިލުމުގެ ފުރުސަތު މި މަހު 13 އިން 20 އަށް ރައީސް އޮފީހުން ހުޅުވާލި އެވެ. މަގާމުގެ ޝަރުތުތަކުގެ ތެރޭގައި ފުރަތަމަ ޑިގްރީއެއް ހާސިލުކޮށްފައިވުމާ އެކު، މަދުވެގެން 7 އަހަރުގެ މަސައްކަތުގެ ތަޖުރިބާ ލިބިފައިވުން ހިމެނެ އެވެ. އަދި އިންތިހާބުކުރެވޭ ނުވަތަ އައްޔަންކުރެވޭ މަގާމެއްގައި ހުރި މީހަކަށް ނުވުމާއި ސިޔާސީ ޕާޓީއެއްގެ މީހަކަށް ނުވުމަކީ ވެސް އެ މަގާމުގެ ޝަރުތެއް ކަމަށް ބަޔާންކޮށްފައިވެ އެވެ.
ރައީސްގެ ސިޓީފުޅުގައި ވިދާޅުވެފައިވަނީ އެ މަގާމަށް ކުރިމަތިލުމަށް ހުޅުވާލި ފުރުސަތުގައި ކުރިމަތިލެއްވި ބޭފުޅުންގެ ތެރެއިން މަގާމަށް ގ. ނޫރަންފިނި, މަރިޔަމް އިންޝާ ފައިސަލް އައްޔަންކުރުމާ ގުޅޭގޮތުން މަޖިލީހުގެ މެންބަރުންނަށް ފެނިވަޑައިގަންނަވާ ގޮތެއް އަންގަވައިދެއްވުމަށެވެ.
އެ މައްސަލަ ދިރާސާ ކުރުމަށް މިނިވަން މުއައްސަސާތަކުގެ ކޮމިޓީއަށް ވަނީ ފޮނުވާފަ އެވެ.
ފަސް މެންބަރުންގެ މައްޗަށް އެކުލެވޭ އެންއައިސީގެ މެންބަރުކަމުގެ ދައުރުގެ މުއްދަތަކީ 5 އަހަރެވެ. ކޮމިޝަނަށް މެންބަރަކު އައްޔަންކުރުމުގެ މައްސަލަ މަޖިލީހަށް ފޮނުވާފައިވަނީ އެ ކޮމިޝަނުގެ މެންބަރު, ކާނަލް (ރޓ) އަހްމަދު ޖިހާދުގެ މަގާމުގެ މުއްދަތު މި މަހުގެ 24 އަށް ހަމަވެފައިވާތީ އެވެ.
Ads by STO
