އިޒްރޭލު ޕާސްޕޯޓް މަނާކުރުމާ ނާޒިމް ދެކޮޅު
އިޒްރޭލް ޕާސްޕޯޓުގައި ރާއްޖެ އެތެރެވުން މަނާކުރުމަކީ އަވަސް އަރުވާލައިގެން ކުރަން ޖެހޭ ކަމެއް ނޫން ކަމަށާއި، ވަކި ގައުމެއްގެ ޕާސްޕޯޓް މަނާކުރުމަކީ ގަބޫލުކުރައްވާ ކަމެއް ނޫން ކަމަށް ވިދާޅުވެ ރައްޔިތުންގެ މަޖިލީހުގެ މާފަންނު އުތުރު ދާއިރާގެ މެމްބަރު މުހައްމަދު ނާޒިމް އިޒްރޭލު ޕާސްޕޯޓް މަނާކުރުމާ ދެކޮޅަށް ވާހަކަ ދައްކަވައިފި އެވެ.
ނާޒިމް އެގޮތަށް ވާހަކަ ދެއްކެވީ އިޒްރޭލު ޕާސްޕޯޓް މަނާކުރުމާ ގުޅޭ ގޮތުން މަޖިލީހުގެ ސަލާމަތީ ހިދުމަތްތަކާބެހޭ ކޮމިޓީ (241 ކޮމިޓީ) ގައި މިއަދު ކުރިއަށް ގެންދިޔަ ބައްދަލުވުމުގަ އެވެ. އިޒްރޭލު ޕާސްޕޯޓުގައި ރާއްޖެ އެތެރެނުވެވޭ ގޮތަށް އިމިގްރޭޝަންގެ ގާނޫނު އިސްލާހު ކުރަން މަޖިލީހަށް ހުށަހެޅުއްވީ ގަލޮޅު ދެކުނު ދާއިރާގެ އެމްޑީޕީ މެންބަރު މެންބަރު މީކާއިލް އަހުމަދު ނަސީމެވެ.
ރާއްޖެ އަކީ އިގްތިސާދީ ގޮތުން އެހެން ގައުމުތަކަށް ބަރޯސާ ވެފައިވާ ގައުމަކަށް ވާތީ، ވަކި ގައުމެއްގެ ޕާސްޕޯޓް މަނާކުރަން އުޅުމަކީ ރަނގަޅު ކަމެއް ކަމަށް ގަބޫލު ނުކުރައްވާކަން ފާހަގަކުރައްވާ ނާޒިމް ވިދާޅުވީ، އިޒްރޭލު ޕާސްޕޯޓް މަނާކުރުމުގެ ކުރިން ވިސްނާލަން ޖެހޭ ކަމަށެވެ.
"އަޅުގަނޑުމެން ކުއްލި ކުއްލިއަށް މިހެން ކަންކަން ނިންމާލުމަކީ ރަނގަޅު ކަމަކަށް ނުވާނެ. އަދި ހާއްސަ ގޮތެއްގައި މިހާރު ހިނގަމުންދާ މައްސަލައިގެ ތެރޭގައި އަޅުގަނޑުމެން ހަމަ ކޮންމެހެން ވަކި ގައުމެއްގެ ޕާސްޕޯޓް މަނާކުރަން އުޅުމަކީ ރަނގަޅު ކަމެއްގެ ގޮތުގައި އަޅުގަނޑެއް ނުދެކެން،" ނާޒިމް ވިދާޅުވި އެވެ.
ކުރީގެ ޑިފެންސް މިނިސްޓަރުކަން ވެސް ކުރެއްވި ނާޒިމް ވިދާޅުވީ، ރަނގަޅު ގޮތަކަށް ވާނީ ފުޅާ ދާއިރާއެއްގައި މަޝްވަރާ ކުރެވިގެން، އެ މަޝްވަރާތަކުގެ އަލީގައި އިޒްރޭލް ޕާސްޕޯޓް މަނާކުރުން ކަމަށެވެ. އަދި އެކަން އަވަސް އަރުވާލައިގެން ކޮންމެހެން ކުރަން ޖެހޭ ކަމެއް ކަމަށް ގަބޫލު ނުކުރައްވާ ކަމަށް ވެސް މެންބަރު ވިދާޅުވި އެވެ.
އިޒްރޭލުން ހިންގާ ގަތުލްއާއްމާއި ދެކޮޅަށް ތިބި ނަމަވެސް، އިޒްރޭލް ޕާސްޕޯޓް މަނާކުރުމުގެ ކުރިން އެކަމުގެ ސަބަބުން ރާއްޖެއަށް ލިބޭނީ ކޮންކަހަލަ ގެއްލުމެއްތޯ ބަލަން ޖެހޭ ކަމަށް ނާޒިމް ވިދާޅުވި އެވެ. އޭނާ ވިދާޅުވީ، އެހެން ކަމެއްގެ ވާހަކަ ދެކެވެންވާނީ ވެސް ފުރަތަމަ ރާއްޖޭގެ ރައްޔިތުން ސަލާމަތުން ތިބެފައި ކަމަށެވެ.
އިގްތިސާދީ ގޮތުން ބަލާއިރު ރާއްޖޭގައި އޮތީ ފަތުރުވެރިކަން އެކަނި ކަމަށާއި، އެ ސިނާއަތަށް އަސަރުކުރާނެ ފަދަ އެއްވެސް ކަމެއް ކޮށްގެން ނުވާނެ ކަމަށް ނާޒިމް ވިދާޅުވި އެވެ. އެހެންކަމުން، އިޒްރޭލް ޕާސްޕޯޓް މަނާކުރުމާމެދު ގޮތެއް ނިންމުމަށް ވަގުތުދީ، އެންމެންގެ ރައުޔު ވެސް ހޯދުމަށް ނާޒިމް ގޮވާލެއްވި އެވެ.
"ރާއްޖޭގައި އޮތީ ފަތުރުވެރިކަން އެކަނި. ފަތުރުވެރިކަމަށް އަސަރު ކުރާނެ އެއްވެސް ކަމެއް އަޅުގަނޑުމެން ކުރާކަށް ނުވާނެ،" ނާޒިމް ވިދާޅުވި އެވެ.
އެ ބިލަށް ސިޔާސީ ޕާޓީތަކުގެ އިތުރު އެޓާނީ ޖެނެރަލް (އޭޖ)، އިކޮނޮމިކް މިނިސްޓްރީ, ޓޫރިޒަމް މިނިސްޓްރީ, ފޮރިން މިނިސްޓްރީ އަދި މޯލްޑިވްސް އެސޯސިއޭޝަން އޮފް ޓޫރިޒަމް އިންޑަސްޓްރީ (މަޓީ) ފަދަ ތަންތަނުގެ ބަހެއް ހޯދުމަށް ނިންމާއި ސިޓީ ފޮނުވާފައިވެ އެވެ. މިއަދުގެ ބައްދަލުވުމުގައި ފާހަގަކުރެއްވި ގޮތުން މަޝްވަރާގެ މޭޒަށް މަޓީ ގެނައުމަށް މަސައްކަތް ކުރި ނަމަވެސް އެކަން އަދި ކާމިޔާބު ވެފައެއް ނުވެ އެވެ.
