ފްލެޓްތަކުގެ ރީ އިވެލުއޭޝަންއަށް އެއްވެސް ނުފޫޒެއް ނާދޭ: ހައުސިން މިނިސްޓްރީ
ކުރީގެ ރައީސް އިބްރާހިމް މުހައްމަދު ސޯލިހުގެ ވެރިކަމުގެ ފަހުކޮޅު "ގެދޮރުވެރިޔާ" ސްކީމުގެ ދަށުން ހުޅުމާލޭގައި އަޅާ ފްލެޓް ލިބޭ މީހުންގެ ލިސްޓު އަލުން ރީ އިވެލުއޭޝަން ހަދަމުންދާ އިރު އެއްވެސް ނުފޫޒެއް ނާންނަ ކަމަށް ނެޝަނަލް ޕްލޭނިން، ހައުސިން އެންޑް އިންފްރާސްޓްރަކްޗާ މިނިސްޓްރީން ބުނެފި އެވެ.
ފްލެޓް ލިސްޓު މިދިޔަ މަސް ނިމުމުުގެ ކުރިން ވެސް އާންމުކުރާނެ ކަމަށް އޮތީ ބުނެފަ އެވެ.
އެ މުއްދަތަށް އެ ލިސްޓު އާންމު ނުކުރެވުނު އިރު ދެން ހައުސިން މިނިސްޓްރީން ބުނީ މި މަހުގެ ދެވަނަ ހަފްތާ ނިމުމުގެ ކުރިން ލިސްޓު އާންމުކުރާނެ ކަމަށެވެ. ނަމަވެސް އެ މުއްދަތަށް ވެސް އާންމެއް ނުކުރެ އެވެ.
އޭގެ ފަހުން ހައުސިން މިނިސްޓްރީން ބުނީ ކުރިން އާންމު ކޮށްފައިވާ "ގެދޮރުވެރިޔާ" ސްކީމުގެ އުސޫލުގެ ދަށުން ކަށަވަރުކުރަން ޖެހޭ ގިނަ ކަންކަން ހުރުމާއި ގުޅިގެން އިތުރު މުއްދަތު ބޭނުންވާ ކަމަށެވެ. އެހެންވެ އަނެއްކާވެސް މުއްދަތެއް ނެތް ގޮތަށް ލިސްޓު ނެރުނު ފަސްކޮށްފައިވާ ކަމަށެވެ.
ލިސްޓު ރީ އިވެލުއޭޝަނަށް ރައްޔިތުންގެ މަޖިލީހުގެ މެމްބަރުންނާއި ސިޔާސީ ފަރާތްތަކުގެ ނުފޫޒު ފޯރުވަމުންދާ ކަމުގެ އަޑުތަކެއް ވަނީ ފެތުރިފަ އެވެ.
ނަމަވެސް ހައުސިން މިނިސްޓްރީން މިއަދު ބުނީ ނުފޫޒު ފޯރުވަމުންދާކަމަށް ބުނެ ދައްކަމުންދާ ވާހަކަތަކަކީ ރައްޔިތުންގެ ހިތްތަކުގައި ނުތަނަވަސްކަން ފެތުރޭގޮތަށް ކަނޑައެޅިގެން ހަގީގަތާ ހިލާފަށް ފަތުރާ ހަބަރުތަކެއް ކަމަށެވެ.
އަދި މިނިސްޓްރީގެ ރަސްމީ ބަހެއް ނެތި ސިޔާސީ ބޭނުމަށް އެއްވެސް ފަރާތަކުން އެފަދަ ހަބަރުތައް ނުފެތުރުމަށް ވަނީ އިލްތިމާސްކޮށްފަ އެވެ.
"މި ސްކީމާ ގުޅިގެން ކުރިއަށްދާ ރީ-އިވެލުއޭޝަންގެ މަސައްކަތްތައް އެއްވެސް ފަރާތަކުން ނުފޫޒު ނުފޯރުވޭނެކަމުގެ ފުރިހަމަ ޔަގީންކަން އެންމެހާ ރައްޔިތުންނަށް އަރުވަމެވެ. މި މިނިސްޓްރީގެ މަގުސަދަކީ މި ސްކީމްގެ ދަށުން ފްލެޓްތައް ލިބިގެންދާނީ އެންމެ ހައްގުވެރި ފަރާތްތައް ކަމުގައި ކަނޑައެޅިގެން ދިއުމެވެ" މިނިސްޓްރީގެ ބަޔާނުގައިވެ އެވެ.
