އައްޑޫ ކައުންސިލާ މިނިސްޓްރީއާ މި ފަހަރު ތޮޅުނީ ވެލިތަކެއްގެ މައްސަލާގައި
އައްޑޫ ސިޓީ ހަންކެޑެ ބްރިޖުން ވެލި ނެގި މައްސަލައެއް ގައި އެ ކައުންސިލާ ސަރުކާރާ ދެމެދު ދެބަސްވުންތަކެއް އުފެދިއްޖެ އެވެ.
އެކަން ސޯޝަލް މީޑިއާގައި ތިލަކުރައްވައި އައްޑޫ ސިޓީގެ މޭޔަރު އަލީ ނިޒާރު ވިދާޅުވީ ހަންކެޑެ ބްރިޖް އެޅުމަށް ހެދިފައިވާ ވަގުތީ ފަސްގަޑުގައި ހުރި ވެލި ރައްޔިތުންގެ ބޭނުން ކުރުމަށް ކައުންސިލުން ނެގި ކަމަށެވެ.
ނަމަވެސް ކައުންސިލާ މަޝްވަރާ ކުރުމެއްނެތި ކަމަށް ބުނެ އެ ވެލިތައް ކޮންސްޓްރަކްޝަން އެންޑް އިންފްރާސްޓްރަކްޗާ މިނިސްޓްރީގެ ބެލުމުގެ ދަށަށް ގެންދިޔަ ކަމަށް ނިޒާރު 'އެކްސް' ގައި ވިދާޅުވި އެވެ.
"ކުރިން އެއްވެސް މަޝްވަރާއެއް ކުރުމެއްނެތި ކޮންސްޓްރަކްޝަން މިނިސްޓްރީގެ އިންޖިނިއަރުން ލައްވާ ސޮއިކުރުވައި އެވެލި މިނިސްޓްރީގެ ބެލުމުގެ ދަށަށް ގެންދެވިފައިވާ ކަމަށް އެންގެވުމަކީ ދައުލަތް ހިންގަން ހެދިފަހުރި ގާނޫނުތަކާއި ފުށުއަރާ ޖާހިލު ނިންމުމެއް،" ނިޒާރު ވިދާޅުވި އެވެ.
ނިޒާރު ވިދާޅުވީ މިނިސްޓްރީން އެންގި އެންގުމަކީ ދައުލަތް ހިންގަން ހެދިފައި ހުރި ގާނޫނުތަކާއި ފުށުއަރާ ޖާހިލު ނިންމުމެއް ކަމަށާއި ރައްޔިތުންނާއި ''ތޮޅެން'' މަގު ފަހިކުރަން ހިންގާ އަމަލެއް ކަމަށެވެ.
މޭޔަރު ސިފަކުރެއްވި ގޮތުގައި އެއީ ލާމަރުކަޒީ ގާނޫނު ފުނޑާލަން އިތުރު ކުރި ބޮޅެކެވެ. ގާނޫނާއި، ހަމައާއި އުސޫލުން ބޭރުން އަންގާ އެންގުންތަކަށް އައްޑޫ ކައުންސިލުން އަމަލު ނުކުރާނެ ކަމަށް އިދިކޮޅު އެމްޑީޕީއަށް ނިސްބަތްވެ ވަޑައިގަންނަވާ ނިޒާރު ވިދާޅުވި އެވެ.
ނިޒާރުގެ ޕޯސްޓަށް ރިޕްލައި ކުރައްވައި ކޮންސްޓްރަކްޝަން މިނިސްޓަރު އަބްދުﷲ މުއްތޮލިބު ވިދާޅުވީ، އައްޑޫ ލިންކް ރޯޑް ހެދުމަށް ވުރެ މުހިންމު ބޭނުމަކު އެ ވެލި ހޯދަން ކައުންސިލުން އެދިއްޖެ ނަމަ، އެ ވެލި ދޫކުރާނެ ކަމަށެވެ.
"އައްޑޫ ސިޓީގެ ލިންކު ރޯޑު އަލުން ހެދުމަށްވުރެ އައްޑޫ ސިޓީގެ ރައްޔިތުންނަށް އެވެލި ބޭނުންކުރަން ޖެހޭ އެހެން މުހިއްމު ކަމެއްވާނަމަ ކައުންސިލުން އެދުމުން އެވެލި ދޫކުރުމަށް މިނިސްޓްރީ އިން ދެކޮޅެއް ނުހަދާނެ،" މުއްތަލިބު ވިދާޅުވި އެވެ.
މިނިސްޓްރީގެ ހުއްދަ ނެތި އެ ވެލި ބޭނުން ނުކުރުމަށް އެދުނީ އައްޑޫ އަކީ ފަސޭހައިން ވެލި ނެގެން އޮތް ތަނަކަށް ނުވެފައި، އެ ސިޓީގެ ލިންކު ރޯޑު އަލުން ހެދުމަށް ގިނަ އަދަދަކަށް ވެލި ބޭނުން ވެދާނެ ކަމަށް ފެންނާތީ ކަމަށް މިނިސްޓަރު ވިދާޅުވި އެވެ.
ކުރީގެ ރައީސް އިބްރާހިމް މުހައްމަދު ސޯލިހު ސަރުކާރުގައި ހިންގި ހަންކެޑެ ބްރިޖުގެ މަސައްކަތް ނިންމައި އެތަން ދިވެހި ސަރުކާރާ ރަސްމީކޮށް ހަވާލުކޮށްފައިވަނީ އޮގަސްޓު މަހުގެ 12 ވަނަ ދުވަހު އެވެ.
އެ މަޝްރޫއު އަކީ އިންޑިއާގެ އެގްޒިމް ބޭންކުން ދިން 800 މިލިއަން ޑޮލަރުގެ ލައިން އޮފް ކްރެޑިޓުގެ ދަށުން ހިންގި މަޝްރޫއެކެވެ.
