ސުޕްރީމް ކޯޓާއި ހައިކޯޓު ރިސެސްއަށް
ސުޕްރީމް ކޯޓާއި ހައިކޯޓު ރިސެސްއަށް ގޮސްފި އެވެ.
ރިސެސްއަށްދާކަން އިއުލާނުކޮށް ސުޕްރީމް ކޯޓުން ކުރި އިއުލާނުގައި ބުނީ ކޯޓުތަކުގެ ގާނޫނުގެ 7 ވަނަ މާއްދާގައިވާ ގޮތުގެމަތިން ނޮވެންބަރު މަހުގެ އެންމެ ފަހު ރަސްމީ މަސައްކަތު ދުވަހުން ފެށިގެން ޖެނުއަރީ 1 ވަނަ ދުވަހާ ހަމައަށް އެ ކޯޓު އޮންނަނީ ރިސެސްގައި ކަމަށެވެ.
ސުޕްރީމް ކޯޓުން ބުނީ ކޯޓުތަކުގެ ގާނޫނު ގައި ބަޔާންކޮށްފައިވާ ހާލަތުގެ އިތުރަށް، ގާނޫނުއަސާސީ ނުވަތަ ގާނޫނެއްގެ ދަށުން ވަކި ކަމެއް ވަކި މުއްދަތެއްގެ ތެރޭގައި ނިންމަންޖެހޭކަމަށް ބަޔާންކޮށްފައިވާ ހާލަތްތައް ފިޔަވައި، ރިސެސްގެ މުއްދަތުގައި ސުޕްރީމް ކޯޓުގެ ޝަރީއަތުގެ އެއްވެސް އަޑުއެހުމެއް ނޯންނާނެ ކަމަށެވެ.
- ކޯޓުތަކުގެ ގާނޫނުގެ 7 ވަނަ މާއްދާގެ (ނ) - އެކަށީގެންވާ ހަލުވިމިނެއްގައި ސުޕްރީމްކޯޓުން ބަލަމުންދާ މައްސަލަތައް ނިންމުމުގެ ބޭނުމުގައި، ސުޕްރީމް ކޯޓުގެ އަގުލަބިއްޔަތު ލިބިގެން ކަނޑައަޅާ ކަނޑައެޅުމެއްގެ މައްޗަށް، އެ އަހަރެއްގެ ދައުރު ނިމުމަށްފަހު އަނެއް އަހަރުގެ ދައުރު ފެށުމާދެމެދުގެ ރިސެސްގައި، ސުޕްރީމް ކޯޓުގެ ޝަރީއަތުގެ އަޑުއެހުންތައް ބޭއްވުމަށް މި މާއްދާ ހުރަހެއް ނާޅަ އެވެ.
- އެ ގާނޫނުގެ (ރ) - ސުޕްރީމްކޯޓު ރިސެސްގައި ވަނިކޮށް ގާނޫނުއަސާސީގެ 253 ވަނަ މާއްދާގެ ދަށުން ކުއްލި ނުރައްކަލުގެ ހާލަތު އިއުލާން ކުރެވިއްޖެނަމަ، އެ ހިނދުން ފެށިގެން ސުޕްރީމްކޯޓުގެ ރިސެސް ނިމުމަކަށް އައިސް، އެ ރިސެސްގެ ކުރިން ހިނގަމުންއައި ދައުރު އަލުން ހިނގަން ފަށާނެ އެވެ.
ސުޕްރީމް ކޯޓުން އިތުރަށް ބުނީ ރިސެސްގެ މުއްދަތުގައި މައްސަލަތަކުގެ ޝަރީއަތުގެ އަޑުއެހުން ނުބޭއްވި ކަމުގައިވީ ނަމަވެސް ކޯޓަށް މައްސަލަތައް ބަލައިގަތުމާއި އެނޫންވެސް އިދާރީ މަސައްކަތްތައް މެދުކެނޑުމެއްނެތި ކުރިއަށްދާނެ ކަމަށެވެ.
ހައިކޯޓުން ބުނީ އިއްޔެއިން ފެށިގެން މި ޑިސެންބަރު މަހުގެ ނިޔަލަށް ހައިކޯޓު އޮންނާނީ ރިސެސްގައި ކަމަށެވެ.
އެހެން ނަމަވެސް ރިސެސް މުއްދަތުގެ ތެރޭގައި ސެކްޝަނުން ބީ12 ގައި ބަލާ މައްސަލަތަކާއި މޮނިކޮން އަމުރުތަކާއި އަވަސް ތަބީއަތުގެ އަމުރުތަކާއި ހުކުމް ތަންފީޒުކުރުން ފަސްކުރުމުގެ އަމުރުތަކާއި އިޖުރާއީ އިއުތިރާޒާ ގުޅޭ ނިންމުންތަކުގެ ތެރެެއިން މުއްދަތު ހަމަވާ މާއްސަލަތައް ކުރިއަށް ގެންދިއުމަށް ފަނޑިޔާރުންގެ އާންމު މަޖިލީހުން ނިންމާފައިވާ ކަމަށެވެ.
އެ ނިންމުމުގެ އިތުރުން ރިސެސްގެ މުއްދަތުގައި ހުކުމްކުރަން ބާއްވާ ޝަރީއަތުގެ މަޖިލީސް ބޭއްވޭނެ ކަމަށް ވެސް ފަނޑިޔާރުންގެ އާންމު މަޖިލީހުން ނިންމާފައިވެ އެވެ.
ސިވިލް ކޯޓު ވެސް މިއަދުން ފެށިގެން މި މަހުގެ 20 ވަނަ ދުވަހާ ހިސާބަށް އޮންނަނީ ރިސެސްގަ އެވެ.
ހައިކޯޓާއި ސްޕްރީމް ކޯޓު އަދި ސިވިލް ކޯޓު ރިސެސްއަށް ގޮސްފައިވާއިރު ކްރިމިނަލް ކޯޓު ރިސެސްއަށް ދަނީ ކޮންމެ އަހަރަކު ޑިސެންބަރު މަހުގެ 15 އިން އެ މަސް ނިމުމުގެ ނިޔަލަށެވެ.
