ރިޓަޔާކުރާ މުވައްޒަފުންނަށް އެލަވެންސް ނުދޭން ނިންމި ނިންމުން އުވާލައިފި
ޖެނުއަރީ 1 އިން ފެށިގެން ސަރުކާރު ވަޒީފާއިން ރިޓަޔާކުރާ މުވައްޒަފުންނަށް އެލަވެންސް ނުދޭން ނިންމި ނިންމުން ފިނޭންސް މިނިސްޓްރީން އުވާލައިފި އެވެ.
އެގޮތަށް ނިންމާފައިވާކަން އިތުބާރުހުރި މަސްދަރަކުން "ދެން" އަށް ކަށަވަރުކޮށްދީފައިވެ އެވެ.
ޖެނުއަރީ 1 އިން ފެށިގެން ވަޒީފާއިން ރިޓަޔާކުރާ މުވައްޒަފުންނަށް އެލަވެންސް ނުދޭން ނިންމާ ނޭޝަނަލް ޕޭ ކޮމިޝަންގެ ރައީސް އަދި ފިނޭންސް މިނިސްޓަރު, މޫސާ ޒަމީރު ސޮއިކުރައްވާ މިދިޔަ އަންގާރަ ދުވަހު ސަރުކާރު އޮފީސްތަކަށް ސިޓީއަކުން އަންގާފައިވެ އެވެ.
އެ ސިޓީގައި ބުނެފައިވަނީ ސަރުކާރުގެ އިކޮނޮމިކް ރިފޯމް އެޖެންޑާގެ ހަރަދު ކުޑަ ކުރުމުގެ ސިޔާސަތުތަކުގެ ތެރެއިން މާލީ ނިޒާމް ހަރުދަނާކުރުމަށްޓަކައި މިހާރު އަމަލުކުރަމުންދާ ގޮތަށް ބައެއް އިސްލާހުތައް ގެނައުމަށް ނިންމާފައިވާ ކަމަށެވެ.
ގެންނަ މައިގަނޑު އިސްލާހުތަކުގެ ތެރޭގައި ދައުލަތުގެ ވަޒީފާތަކުން މުސްކުޅި ކުރާ މުވައްޒަފުންނަށް މަހުން މަހަށް ދޭ އެލަވެންސް ޖެނުއަރީ 1 އިން ފެށިގެން އަލަށް ވަޒީފާއިން މުސްކުޅި ކުރާ މުވައްޒަފުންނަށް ދިނުން ހުއްޓާލުމަށް ނިންމާފައިވާ ކަމަށް ވެސް އެ ސިޓީގައި ބުންޏެވެ.
ނަމަވެސް މި އަހަރު ޑިސެންބަރު 31 ގެ ނިޔަލަށް ވަޒީފާއިން މުސްކުޅިވެ މަހުން މަހަށް އެލަވެންސް ލިބެމުންދާ މުވައްޒަފުންނަށް އެއްވެސް ބަދަލެއް ނާންނާނެ ކަމަށާއި މަހުން މަހަށް ލިބެމުންދާ އެލެވެންސް ލިބެމުންދާ ކަމަށް ސިޓީގައި ބަޔާންކޮށްފައިވެ އެވެ.
އެ ސިޓީގައި އިތުރަށް ބުނީ އިދާރާތަކުން އެ އެލަވެންސް ދިނުމުގައި އަމަލުކުރާ ގަވާއިދަށް ގެންނަންޖެހޭ އިސްލާހުތައް ގެނެސް, ޖެނުއަރީ 1 ފެށިގެން ތަންފީޒުކުރުމުގެ ގޮތުން ގަވާއިދަށް ގެންނަ ބަދަލުތަކާއެކު ގެޒެޓްކުރުމުގެ ހުއްދައަށް އެދި ފިނޭންސް މިނިސްޓްރީއަށް ހުށަހަޅާ, އަންނަ މަހުގެ 15 ގެ ކުރިން އެ އިސްލާހު ގެޒެޓްކޮށް ނިންމަންވާނެ ކަމަށެވެ.
އެ ނިންމުން ބާތިލުކުރަން ރައީސް ޑރ. މުހައްމަދު މުއިއްޒު ނިންމަވާފައިވާކަން ރައީސް އޮފީހުންވެސް އިއުލާނުކޮށްފައިވެ އެވެ. އަދި އެގޮތަށް ނިންމެވީ ވަޒީރުންގެ މަޖިލީހުގެ ޖަލްސާގައި މަޝްވަރާކުރެއްވުމަށްފަހު ކަމަށް ރައީސް އޮފީހުން ބުނެ އެވެ.
އެ ނިންމުން ބަދަލުކުރަން ނިންމާފައިވަނީ ގިނަ ބަޔަކު ކަންބޮޑުވުން ފާޅުކޮށްފައި ވަނިކޮށެވެ.
