ބިންވެރިޔާ ސްކީމުން ހުޅުމާލެއިން ހިލޭ ދޫކުރި ގޯތިތަކަށް 5.4 ބިލިއަން އަރާ: ފަޒުލް

ނިމިދިޔަ ރައީސް އިބްރާހިމް މުހައްމަދު ސޯލިހުގެ ސަރުކާރުގައި ކުރިއަށް ގެންދިޔަ ބިންވެރިޔާ ސްކީމުގެ ދަށުން ހުޅުމާލެއިން ހިލޭ ދޫކުރި ގޯތިތަކުގެ އަގު 5.4 ބިލިއަން ރުފިޔާއަށް އަރާ ކަމަށް ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) ގެ މެނޭޖިން ޑިރެކްޓަރު އިބްރާހިމް ފަޒުލް ރަޝީދު މިއަދު ވިދާޅުވެއްޖެ އެވެ.

Ads by Sosun Fihaara

ބިންވެރިޔާ ސްކީމުގެ ދަށުން ޝަރުތު ހަމަވި 18،955 މީހުންނަށް ހުޅުމާލެ ދެ ވަނަ އަދި ތިން ވަނަ ފިޔަވަހިންނާއި ގުޅިފަޅު އަދި ގިރާވަރުފަޅުން ފުރަތަމަ ބުރުގައި 9،001 ގޯތި ދޫކުރުމަށް ނިންމައި، ގޯތި ލިބުނު މީހުންނަށް ރަޖިސްޓްރީ ދޫކުރި އެވެ. އެއީ ހުޅުމާލެއިން ދޫކުރި 1،351 ގޯއްޗާއި ގުޅިފަޅުން ދޫކުރި 2،218 ގޯތި އަދި ގިރާވަރުފަޅުން ދޫކުރި 5،432 ގޯއްޗެވެ.

އެޗްޑީސީން ދޫކޮށްފައިވާ ބިންތަކަށް ކުލި ނުލިބޭ މައްސަލައިގައި މައުލޫމާތު ސާފުކުރުމަށް ރައްޔިތުންގެ މަޖިލިހުގެ މާލިއްޔަތު ކޮމިޓީއަށް އެ ކޯޕަރޭޝަނުގެ ބޭފުޅުން މިއަދު ވަނީ ހާޒިރުކޮށްފަ އެވެ.

ބައްދަލުވުމުގައި ހަނިމާދޫ ދާއިރާގެ އެމްޑީޕީ މެމްބަރުގެ އަބްދުލްޣަފޫރު މޫސާ (ގަޕޯ) ކުރެއްވި ސުވާލަކަށް ޖަވާބު ދެއްވަމުން ފަޒުލް ވިދާޅުވީ ބިންވެރިޔާ ސްކީމުގެ ދަށުން 5.4 ބިލިއަން ރުފިޔާ އެޗްޑީސީއަށް ލިބެން ޖެހޭއިރު މިހާތަނަށް އެކަމާ ގުޅުންހުރި އެއްވެސް މުއާމަލާތެއް ހިނގާފައިނުވާ ކަމަށެވެ. އެކަންކަން މި ސަރުކާރުން ކުރަމުން ގެންދާ ކަމަށެވެ.

"އަޅުގަނޑުމެން 5.4 ބިލިއަން ރުފިޔާ، ބިންވެރިޔާ ލޭންޑް ކޮމްޕެންސޭޝަނެއްގެ ގޮތުގައި ރިކުއެސްޓްކޮށްގެން އުޅޭ އަދަދެއް،" ފަޒުލް ވިދާޅުވި އެވެ.

އެޗްޑީސީގެ މެނޭޖިން ޑިރެކްޓަރު ވިދާޅުވި ގޮތުގައި ހުޅުމާލޭގެ 2 ވަނަ ފިޔަވަހިން އޭރުގެ ސަރުކާރުން ބިން ދޫކުރިއިރު، 3 ވަނަ ފިޔަވަހި ހިއްކުމުގެ މަސައްކަތް ވެސް ކުރިއަށް ގެންދަން ޖެހޭ ކަމުގަ އެވެ. ބިން ނެތް ތަނެއްގައި ބިން ދޫކުރާ ނަމަ ޖެހެނީ ބިން އުފައްދަން ކަމުގަ އެވެ. އެ "ކޮމްޕެންސޭޝަން" ކުރިއަށް އޮތްތަނުގައި އަންނާނެ ކަމަށް ގަބޫލު ކުރެއްވޭކަން ފަޒުލް ފާހަގަކުރެއްވި އެެވެ.

އެމްޑީޕީގެ ސަރުކާރުން ހިލޭ ދޫކުރި ގޯތިތަކުގެ ތެރެއިން އެ ކޯޕަރޭޝަނުގެ އިހުތިސޯސުގައި ހިމެނޭ ބިންތަކުން ދޫކުރި ގޯތިތަކުގެ ބަދަލުގައި އެޗްޑީސީއަށް 2 ފަޅު ދިނުމަށާ އަދި އިތުރަށް 7.9 މިލިއަން ރުފިޔާ ދިނުމަށް މީގެ ކުރިން އެއްބަސްވެފައިވެ އެވެ.