ސިޔާސީ މަގާމުތަކުން ވަކިކުރި ފަރާތްތަކުގެ މައުލޫމާތު ހާމައެއް ނުކުރި
ސިޔާސީ މަގާމުތަކަށް އައްޔަން ކޮށްފައި ތިބި މީހުންގެ ތެރެއިން، ވަޒީފާއިން ވަކިކުރި މީހުންގެ މައުލޫމާތު ހޯދަން އެދުމުން އެ މައުލޫމާތު ދޭން ރައީސް އޮފީހުން ދެކޮޅު ހަދައިފި އެވެ.
ސަރުކާރުގެ އިކޮނޮމިކް ރިފޯމް އެޖެންޑާގެ ދަށުން 228 ސިޔާސީ މުވައްޒަފުން ވަކިކުރަން ނިންމަވާފައިވާކަން ރައީސް ޑރ މުހައްމަދު މުއިއްޒު ވަނީ އޮކްޓޫބަރު މަހު 15 ގައި 'އެކްސް' ގައި ކުރެއްވި ޕޯސްޓެއް މެދުވެރިކޮށް ވިދާޅުވެފަ އެވެ.
އޭގެ ތެރޭގައި 7 ސްޓޭޓް މިނިސްޓަރުންނާއި، 43 ޑެޕިއުޓީ މިނިސްޓަރުންނާއި، 69 ޕޮލިޓިކަލް ޑިރެކްޓަރުން އަދި 109 ސީނިއާ ޕޮލިޓިކަލް ޑިރެކްޓަރުން ހިމެނޭ ކަމަށް ރައީސްގެ ޓްވީޓުގައި ވިދާޅުވި އެވެ.
މައުލޫމާތު ހޯދައި ލިބިގަތުމުގެ ހައްގުގެ ގާނޫނު, ރައިޓް ޓު އިންފޮމޭޝަން (އާރްޓީއައި) ދަށުން އަފްރާހު އިސްމާއިލް ރައީސް އޮފީހުގައި އެދުނީ ރައީސްގެ ޓްވީޓުގައި ވިދާޅުވެފައިވާ ސިޔާސީ މަގާމުތަކުގެ ތަފްސީލު ހިއްސާކޮށް ދިނުމަށެވެ. އެ މީހުންގެ ނަމާއި، މުސާރައާއި މަގާމު އަދި އައްޔަންކޮށްފައި ތިބި އިދާރާތަކުގެ މައުލޫމާތު ދިނުމަށް އޭނާ އެދުނެވެ.
އެކްސްގައި އަފްރާހު ހިއްސާކުރި އާރްޓީއައިގެ ޖަވާބުގައި ރައީސް އޮފީހުން ބުނީ އެ މައުލޫމާތު ހިއްސާކުރެވެން ނެތް ކަމަށެވެ.
"ސިޔާސީ މުވައްޒަފުންގެ ނަމަކީ ޒާތީ މައުލޫމާތަކަށް ވެފައި، އެ ފަރާތްތައް މަސައްކަތްކުރެއްވި ވުޒާރާތަކުގެ ނަންތައް ހާމަކޮށްފިނަމަ، ޒާތީ މައުލޫމާތު ހާމަވެދާނެ ކަމަށް ގަބޫލުކުރެވޭތީ، އެ މުވައްޒަފުންގެ ނަމާއި، އެ ވުޒާރާތަކުގެ ނަންތަކުގެ މައުލޫމާތަކީ މައުލޫމާތު ހޯދައި ލިބިގަތުމުގެ ހައްގުގެ ގާނޫނުގެ ދަށުން ދޫކުރެވޭނެ މައުލޫމާތެއް ނޫން ކަމުގައި ދަންނަވަމެވެ" އާރްޓީއައިގެ ޖަވާބުގައި ބުންޏެވެ.
