އަމީނަށް ހެދިގޮތް ރައީސަށް ހަދަން ޖެހޭ ކަމަށް ބުނި މައްސަލަ މަޖިލީހަށް
ރައީސް ޑރ. މުހައްމަދު މުއިއްޒަށް ރާއްޖޭގެ ފުރަތަމަ ރައީސް މުހައްމަދު އަމީން ދީދީއަށް ހެދި ގޮތް ހަދަން ޖެހޭ ކަމަށް ބުނެ އިދިކޮޅު މައި ޕާޓީ، އެމްޑީޕީއަށް ނިސްބަތްވާ ބައެއް ފަރާތްތަކުން ދައްކަމުން އަންނަ ވާހަކަތަކާ ގުޅޭ މައްސަލަ ރައްޔިތުންގެ މަޖިލީހަށް ހުށަހަޅައިފި އެވެ.
ކުޅުދުއްފުށި ސިޓީގައި އެމްޑީޕީގެ މެންބަރަކު ދެއްކި ވާހަކަ އާ ގުޅުވައި އިއްޔެ ބޭއްވި ނޫސްވެރިންގެ ބައްދަލުވުމުގައި ސުވާލު ކުރުމުން އެ މީހާގެ ވާހަކަ އެމްޑީޕީގެ ޗެއާޕާސަން ފައްޔާޒު އިސްމާއިލް ވަނީ ދިފާއުކުރައްވާފަ އެވެ.
ސީދާ ރައީސްގެ ނަން ނުގެންނެވިޔަސް ފައްޔާޒު ވާހަކަ ދެއްކެވީ ރައީސް "ހަވަރަށް" ދޭ މޭރުމަކުން ކަމަށް ބުނެ، ސަރުކާރަށް ތާއިދުކުރާ ފަރާތްތަކުންނާއި ސަރުކާރުގެ މިނިސްޓަރުން ވަނީ އެކަން ކުށްވެރިކޮށްފަ އެވެ. އަދި ރައްޔިތުންގެ މަޖިލީހުގެ ރައީސް، އަބްދުއްރަހީމް އަބްދުﷲ ވަނީ އެ މައްސަލަ ބެލުމަށް ކަމާ ބެހޭ މުއައްސަސާތަކަށް ގޮވާލައްވާފަ އެވެ.
ފައްޔާޒު އެހެން ވިދާޅުވާ ވީޑިއޯ ރޭ "އެކްސް" ގައި ހިއްސާކުރައްވާ އަބްދުއްރަހީމް ވިދާޅުވެފައި ވަނީ އިދިކޮޅު ޕާޓީއެއްގެ އެންމެ އިސް މަގާމުގައި ހުންނެވި ބޭފުޅަކު އެފަދަ ވާހަކައެއް ދެއްކުމަކީ އާދައިގެ ކަމެއް ކަމަށް ބަލައިގެން ނުވާނެ ކަމަށެވެ. އެއީ ޓެރަރިޒަމަށް ހިތްވަރުދިނުން ކަމަށާ އަދި ކަމަކީ ކަމާ ގުޅޭ މުއައްސަސާތަކުން ވަރަށް ސީރިއަސްކަމާ އެކު ވަގުތުން ބަލަން ޖެހޭ ކަމެއް ކަމުގައި ފާހަގަކުރެއްވި އެވެ.
ކުއްލި މައްސަލައެއްގެ ގޮތުގައި އެ މައްސަލަ މަޖިލީހަށް ހުށަހެޅުއްވީ މިލަންދޫ ދާއިރާގެ ޕީއެންސީގެ މެންބަރު, ހަސަން މުފީދު އަބްދުލްގާދިރެވެ.
އެ ކުއްލި މައްސަލާގައި ބުނެފައިވަނީ އެމްޑީޕީގެ އެކި ޕޯޑިއަމްތަކުގައި ޓެރަރިޒަމްގެ އަމަލަކަށް ހިތްވަރުދީ, ވާހަކަ ދައްކާފައިވާ ކަމަށެވެ. އަދި އެކަން ތަހުގީގު ކުރުމަށް ކުއްލި މައްސަލާގައި ގޮވާލާފައިވެ އެވެ.
ޓެރަރިޒަމް މަނާކުރުމުގެ ގާނޫނުގައި ސީދާ ގޮތުން އަދި ނުސީދާ ގޮތުން ވިޔަސް ޓެރަރިޒަމްގެ އަމަލެއް ކުރުމަށް ހިތްވަރު ދިނުމަކީ ކުށެއް ކަމަށް ބަޔާންކޮށްފައިވާކަން ފާހަގަކުރައްވާ މުފީދު ވިދާޅުވީ އެމްޑީޕީން ޕޯޑިއަމްތަކުގައި ދައްކާފައިވާ ވާހަކަތަަކަކީ ވަކި ސިޔާސީ ފިކުރެއް ކުރިއެރުވުމަށާއި އާންމުންގެ މެދުގައި ބިރުވެރިކަން އުފެއްދުމާއި އެެހެން މީހެއްގެ ފުރާނައަށް ނުރައްކަލެއް ކުރިމަތިކުރުވުމުގެ މަގުސަދުގައި ޓެރަރިޒަމްގެ އަމަލެއް ކުރުމަށް ހިތްވަރު ދިނުމަށް ދައްކާފައިވާ ވާހަކަތަކެއް ކަމަށެވެ.
އެ މައްސަލަ މަޖިލީހަށް ބަލަައިގެންފައިވަނީ 44 މެންބަރުންގެ ވޯޓުންނެވެ. މައްސަލަ ބަލައިގަތުމާ ދެކޮޅަށް 8 މެންބަރުން ވޯޓު ދެއްވިއިރު، ވަކި ގޮތަކަށް ވޯޓު ނުދެއްވާ މެންބަރަކު އިންނެވި އެވެ.
ރައީސަށް އިންޒާރުދޭ މޭރުމަކުން މީހަކު ވާހަކަ ދައްކާފައިވަނީ "ގާނޫނު އަސާސީގެ ދިފާއުގައި" ގެ ނަމުގައި ކުޅުދުއްފުށި ސިޓީގައި މިދިޔަ ހުކުރު ދުވަހުގެ ރޭ އެމްޑީޕީން ބޭއްވި ޖަލްސާއެއްގަ އެވެ. އެ މައްސަލަ ފުލުހުން ބަލަމުންދާ ކަަމަށް މިދިޔަ ހޮނިހިރު ދުވަހު ބުނެފައިވެ އެވެ.
