ބޭރު ފައިސާއާ ބެހޭ ބިލު ބަލައިގަނެ ކޮމިޓީއަށް
ރާއްޖެއަށް ވަންނަ ބޭރު ފައިސާ މާރުކުރުމަށް ސަރުކާރުން ސްޕޮންސާކޮށްގެން ހުށަހެޅި "ބޭރު ފައިސާގެ ބިލު" ރައްޔިތުންގެ މަޖިލީހުގެ ތަޅުމުން ބަލައިގަނެ މަޖިލީހުގެ ކޮމިޓީއަށް ފޮނުވައިފި އެވެ.
ރާއްޖޭގައި ބޭރު ފައިސާއިން ކުރެވޭނެ މުއާމަލާތްތައް ކަނޑައަޅާ, ބޭރު ފައިސާ ރާއްޖެއަށް އެތެރެކުރުމާއި ބޭރުކުރުމާއި ގެންގުޅުމާއި ޖަމާކުރުމާއި މާރުކުރުމާ ބެހޭ އުސޫލުތަކާއި އެނޫންވެސް ބޭރު ފައިސާާ އާއި ބޭރު ފައިސާ އާ ބެހޭ މުއާމަލާތްތަކާ ގުޅޭ ހަމަތަކާއި އުސޫލުތައް ކަނޑައަޅައި ހިންގުމަށް ބޭނުންވާނޭ ކަމާ ބެހޭ ހަރުދަނާ އޮނިގަނޑެއް އެކުލަވާލުމުގެ މަގުސަދުގައި އިނގުރައިދޫ ދާއިރާގެ މެންބަރު އިބްރާހިމް ފަލާހު ހުށަހެޅުއްވި ބިލު މަޖިލީހަށް ހުށަހެޅީ މި މަހުގެ ނުވަ ވަނަ ދުވަހު އެވެ.
އަދި އެ ބިލުގެ ބަހުސް ނިންމައި ބިލު ބަލައިގަތުމާމެދު މަޖިލީހުގެ ތަޅުމުގައި މިއަދު ވަނީ ވޯޓަށް އަހައިފަ އެވެ.
އެ ބިލު ބަލައިގަތުމަށް މަޖިލީހުގެ ތަޅުމުން މިއަދު ފާސްކުރީ 51 މެމްބަރުންގެ ވޯޓާއެކު އެވެ.
އެ ބިލު ބަލައިނުގަތުމަށް ހަތަރު މެމްބަރަކު ވޯޓު ދެއްވި އެވެ.
އެއާއެކު އެ ބިލު އިތުރަށް ދިރާސާ ކުރުމަށް މިއަދު ވަނީ މަޖިލީހުގެ މާލިއްޔަތު ކޮމިޓީއަށް ވެސް ފޮނުވައިފަ އެވެ.
އެ ބިލުގައި ބުނެފައިވަނީ ޓޫރިޒަމް ދާއިރާގެ މުދާ ވިއްކާ ފަރާތްތަކާއި ހިދުމަތް ފޯރުކޮށްދޭ ފަރާތްތައް ކޮންމެ މަހެއްގެ ތެރޭގައި އާމްދަނީގެ ގޮތުގައި ލިބޭ ބޭރު ފައިސާ އެ މަހަށް ފަހު ހިނގާ މަހުގެ ތިންވަނަ މަހުގެ 28 ވަނަ ދުވަހުގެ ކުރިން ބޭންކެއްގައި ހުޅުވާފައިވާ ބޭރު ފައިސާގެ އެކައުންޓަކަށް ޖަމާކުރަންވާނެ ކަމަށެވެ.
އޭގެ އިތުރުން ޓޫރިޒަމް ދާއިރާ އާއި މާލީ އިދާރާތައް ފިޔަވާ އެހެން ފަރާތަކުން ވިއްކާ ނުވަތަ ފޯރުކޮށްދޭ މުދަލާއި ހިދުމަތަށް ކޮންމެ އަހަރެއްގެ ތެރޭގައި ބޭރު ފައިސާއިން މަދުވެގެން 15 މިލިއަން ޑޮލަރު ލިބޭ ފަރާތްތަކުން ވެސް އެފަދައިން އަމަލުކުރަން ޖެހޭނެ ކަމަށް ބުނެފައިވެ އެވެ.
އެ ބިލުގައި ޓޫރިޒަމް ދާއިރާގެ މުދާ ވިއްކާ ނުވަތަ ހިދުމަތް ފޯރުކޮށްދޭ ފަރާތްތަކުގެ ތަފްސީލުތައް މޯލްޑިވްސް އިންލެންޑް ރެވެނިއު އޮތޯރިޓީ (މީރާ) މެދުވެރިކޮށް މޯލްޑިވްސް މަނިޓަރީ އޮތޯރިޓީ (އެމްއެމްއޭ) އަށް ހޯދުމުގެ ބާރު އެ އޮތޯރިޓީއަށް ވަނީ ލިބިދީފަ އެވެ.
ކެޓަގަރީ އޭ ގައި ޓޫރިސްޓް ރިސޯޓްތަކާއި އިންޓަގްރޭޓަޑް ޓޫރިސްޓް ރިސޯޓްތަކާއި ފްރައިވެޓް އައިލެންޑްތަކާއި ރިސޯޓް ހޮޓާތަކާއި އެނޫންވެސް އެފަދަ ތަންތަން ހިމެނޭއިރު، ކެޓަގަރީ ބީ ގައި ހިމެނެނީ ޓޫރިސްޓް އުޅަނދުތަކާއި ޓޫރިސްޓް ހޮޓާތަކާއި ޓޫރިސްޓް ގެސްޓްހައުސްތަކެވެ.
ކެޓަގަރީ އޭއަށް ލިބޭ ފައިސާ މާރުކުރެވޭނެ ދެ ގޮތެއް ބިލުގައި ބުނެފައިވެ އެވެ. އެއް ގޮތަކީ އެ ތަންތަނަށް އަންނަ ކޮންމެ ޓޫރިސްޓަކަށް 500 ޑޮލަރުގެ ރޭޓުން މާރުކުރުމާއި ކޮންމެ މަހެއްގެ ތެރޭގައި ލިބޭ ބޭރު ފައިސާގެ އާމްދަނީން 20 އިންސައްތަ މާރުކުރުމެވެ.
ކެޓަގަރީ ބީއަށް ލިބޭ ފައިސާ މާރުކުރެވޭނީ ކޮންމެ ޓޫރިސްޓަކަށް 25 ޑޮލަރުގެ ރޭޓުން ނުވަތަ ކޮންމެ މަހެެއްގެ ބޭރު ފައިސާގެ އާމްދަނީގެ 20 އިންސައްތައިން މާރުކުރަން ޖެހޭނެ ކަމަށް ބުނެފައިވެ އެވެ.
އޭގެ އިތުރުން ޓޫރިޒަމް ދާއިރާ އާއި މާލީ އިދާރާތައް ފިޔަވާ އެހެން ފަރާތަކުން ވިއްކާ ނުވަތަ ފޯރުކޮށްދޭ މުދަލާއި ހިދުމަތަކުން ލިބޭ ފައިސާގެ ތެރެއިން ކޮންމެ އަހަރަކު ލިބޭ އާމްދަނީގެ 20 އިންސައްތަ ބޭންކަށް މާރުކުރަން ޖެހެ އެވެ.
ކެޓަގަރީ އޭ އަދި ބީ ގައި ނުހިމެނޭ ޓޫރިސްޓުން:
- 24 ގަޑިއިރު ހޭދަކޮށްފައި ނުވާ ޓޫރިސްޓުން
- 10 އަހަރު ނުފުރޭ ކުޑަކުދިން
- ހިލޭ ނުވަތް ކޮމްޕްލިމެންޓަރީކޮށް ތިބޭ ފަރާތްތައް
- ސަރުކާރުން ހާއްސަ އިމްތިޔާޒް ދީފައިވާ މެހެމާނުން
ބޭންކެއްގައި ހުޅުވާފައިވާ ބޭރު ފައިސާ އެކައުންޓަކަށް ބޭރު ފައިސާ ޖަމާނުކުރާ ފަރާތްތައް އެ މަހަކަށް ޖަމާކުރަން ޖެހޭ ބޭރު ފައިސާގެ 0.25 އިންސައްތައަށް ވުރެ އިތުރުނުވާ އަދަދަކުން ޖޫރިމަނާކުރެވޭނެ އެވެ. އަދި ބޭރު ފައިސާ މާރުނުކުރާނަމަ އެ މަހަކު މާރުކުރަން ޖެހޭ ފައިސާގެ 0.5 އިންސައްތައަށް ވުރެ އިތުރުނުވާ އަދަދަކުން ޖޫރިމަނާކުރުމުގެ ބާރު އޮތޯރިޓީއަށް ލިބިގެންވެ އެވެ.
އެ ބިލުގެ އެހެން ކަމަކާ ހިލާފުވެއްޖެ ނަމަ އެ ފަރާތެއް 10,000 ރުފިޔާ އާއި އެއް މިލިއަނާ ދެމެދުގެ އަދަދަކުން ޖޫރިމަނާ ކުރުމުގެ ބާރު އޮތޯރިޓީއަށް ލިބިގެންވާ ކަމަށް ބިލުގައި ބުނެފައިވެ އެވެ.
ޖޫރިމަނާގެ ފައިސާ ނުދައްކާ ފަރާތްތަކުން ޖޫރިމަނާ ދެއްކުމަށް އޮތޯރިޓިން އެންގި ތާރީހުން ފެށިގެން 90 ދުވަހުގެ ތެރޭގައި އެ ޖޫރިމަނާ ދައްކާފައިނުވާނަމަ ވިޔަފާރީގެ ހުއްދަތައް ވަކި މުއްދަތަކަށް ހިފަހައްޓުމަށް ދައުލަތުގެ އިދާރާތަކަށް އެނގުމުގެ ބާރު އޮތޯރިޓީން ލިބިގެންވެ އެވެ. އަދި ޝަރީއަތަށް ހުށަހަޅައިގެން ޖޫރިމަނާ ފައިސާ ހޯދުމުގެ ބާރު ވެސް އޮތޯރިޓީއަށް ލިބިގެންވެ އެވެ.
އެ ގާނޫނަށް އަމަލުކުރަން ފަށާނެ ކަމަށް ބިލުގައި ބުނެފައިވަނީ 1 ޖެނުއަރީ 2025 އެވެ.
Ads by STO
