އަނިޔާވެރި އަމަލުތަކަށް ހިތްވަރު ލިބޭފަދަ އެއްވެސް ކަމެއް ނުކުރަން އެޗްއާރުސީއެމުން ގޮވާލައިފި
އަނިޔާވެރި އަމަލުތަކަށް ހިތްވަރު ލިބޭފަދަ އެއްވެސް ކަމެއް ނުކުރަން ހިއުމަން ރައިޓްސް ކޮމިޝަން އޮފް ދަ މޯލްޑިވްސް (އެޗްއާރުސީއެމް)އިން ގޮވާލައިފި އެވެ.
ރައީސް ޑރ މުހައްމަދު މުއިއްޒަށް، ރާއްޖޭގެ ފުރަތަމަ ރައީސް އަމީން ދީދީއަށް ހެދިގޮތް ހަދަން ޖެހޭ ކަމަށް ބުނެ އެމްޑީޕީގެ ޗެއާޕާސަން ފައްޔާޒް އިސްމާއިލް ދެއްކެވި ވާހަކަތަކާ ގުޅިގެން އެޗްއާރުސީއެމްއިން ކަންބޮޑުވުން ފާޅުކޮށް މިރޭ ވަނީ ބަޔާނެއް ނެރެފަ އެވެ.
އެ ބަޔާނުގައި ބުނީ އިސްލާމްދީނުގެ އަސްލަކާއި ހިލާފުނުވާ ގޮތެއްގެ މަތިން އެމީހެއްގެ ބުއްދިއަށް ފެންނަ ގޮތްތައް އެކި ގޮތްގޮތަށް ފާޅުކުރުމުގެ މިނިވަންކަމަކީ ރާއްޖޭގެ ގާނޫނު އަސާސީން ކަށަވަރުކޮށްފައިވާ ހައްގެއް ކަމަށެވެ.
އެހެން ނަމަވެސް އެ ހައްގުތައް ބޭނުން ކުރަން ވާނީ ވަކި ހުދޫދެއްގެ ތެރެއިން، އަނެކާގެ ހައްގުތަކަށް އިހުތިރާމް ކުޑަނުވާނެ ގޮތަށް ކަމަށްވެސް އެ ކޮމިޝަނުން ބުނެފައިވެ އެވެ.
ސިޔާސީ ޕާޓީތަކުން ބާއްވާ ޖަލްސާތަކާއި އެއްވުންތަކާއި މީޑިއާ އަދި ސޯޝަލް މީޑިއާގެ ޒަރިއްޔާއިން ފާޅުކުރެވޭ ހިޔާލުތަކުގައިވެސް، މީހުންގެ މެދުގައި ނަފްރަތު އުފެއްދުމަަށާއި، މުޖުތަމައުގެ ހަމަޖެހުމާއި މަސްލަހަތު ނަގާލުމަށް ގޮވާލުމުގެ އިތުރުން، އަނިޔާވެރި އަމަލުތައް ކުރުމަށް ހިތްވަރު ލިބޭ ގޮތަށް ފާޅުކުރެވޭ ހިޔާލުތަކަކީ، ހިޔާލުފާޅު ކުރުމުގެ މިނިވަންކަމުގެ ހައްގުގެ ރޫހާ ހިިލާފު އަމަލެއް ކަންވެސް އެޗްއާރުސީއެމްގެ ބަޔާނުގައ ފާހަގަކޮށްފައިވެެ އެވެ.
"ސިޔާސީ ހަރަކާތްތަކުގެ ތެރެއިން ހިޔާލާއި ޝުއޫރު ފާޅު ކުރުމުގައި އަނެކާގެ އަބުރާއި ނަފްސަށް ގެއްލުންވާފަދަ އަދި ނަފްރަތު އުފެދޭ ފަދައެއްވެސް އަމަލެއް ނުކުރުމަށާއި، ސިޔާސީ ޕާޓީތަކުން އިންތިޒާމް ކުރާ ހަރަކާތްތަކުގައި އާންމު މަސްލަހަތު އިސްކޮށް، މިފަދަ ކަންކަން ނުހިނގާނެ ގޮތަށް ސިޔާސީ ހަރަކާތްތައް ރޭއްވުމަށް އިސްކަންދެއްވުމަށް ހުރިހާ ސިޔާސީ ޕާޓީތަކަށް ގޮވާލަމެވެ،" އެޗްއާރުސީއެމްގެ ބަޔާނުގައިވެ އެވެ.
