މަޖިލީހުގެ ރައީސަށް އެންޑްރޫ ނުކިޔަން އެދިއްޖެ
ރައްޔިތުންގެ މަޖިލީހުގެ ރައީސަށް މަޖިލީހުގެ ތަޅުމުގައި އިނގިރޭސި ނަންނަމުން ނުގޮވަން މަޖިލީހުގެ ރިޔާސަތުން އިލްތިމާސްކޮށްފި އެވެ.
މަޖިލީހުގެ މިއަދުގެ ޖަލްސާއަށް ކެންދޫ ދާއިރާގެ އެމްޑީޕީ މެންބަރު މައުރޫފް ޒަކީރު (މަޓޭ)، ދައުލަތުގެ މީޑިއާ ޕީއެސްއެމްއިން ގުރުއާންގެ އާޔަތްތައް ބަދަލުކުރި ކަމަށް ބުނެ ކުއްލި މައްސަލައެއް ހުށަހެޅުއްވި އެވެ.
އެ މައްސަލަ މަޖިލީހުގެ ސުޕަ މެޖޯރިޓީ އޮންނަ ޕީއެންސީގެ މެންބަރުން ބަލައިގަނެފައިވެ އެވެ.
"އަޅުގަނޑުމެންގެ ރައީސް އެންޑުރޫ، މާފު ކުރައްވާތީ" މައްސަލަ ބަލައިގަތުމުން ޝުކުރު އަދާކޮށް ވާހަކަ ދައްކަވަމުން މަޓޭއަށް ވިދާޅުވެވުނެވެ. މަޓޭގެ ވާހަކަ ހުއްޓުވައި މަޖިލީހުގެ ރިޔާސަތުން ވަނީ މަޖިލީހުގެ ގަވާއިދަށް ހުރުމަތްތެރިކޮށް ހިތުމަށް އިލްތިމާސްކުރައްވާފަ އެވެ.
"މަޖިލީހުގެ ތަޅުމުގައި ވާހަކަފުޅު ދައްކަވާއިރު މަޖިލީހުގެ ގަވާއިދާ އެއްގޮތަށް ވާހަކަ ދައްކަވަންވީ" އަބްދުއްރަހީމް ވިދާޅުވި އެވެ.
ރިޔާސަތުން ވާހަކަ ދައްކަވަމުން ގެންދަވަނިކޮށް ގަލޮޅު އުތުރު ދާއިރާގެ އެމްޑީޕީ މެންބަރު މުހައްމަދު އިބްރާހިމް (ކުޑޫ) ނިޒާމީ ނުކުތާއެއް ނަންގެވި އެވެ.
"ރައްޔިތުންގެ މަޖިލީހުގެ ރައީސަށް އިނގިރޭސި ބަހުން މުހާތަބު ކޮށްގެން ނުވާނެ، ވަރަށް އަދަބު ކުޑަކަމެއް އެއީ" ކުޑޫގެ ނިޒާމު ނުކުތާ ރިޔާސަތުން ބަލައިގަތެވެ.
"އަޅުގަނޑަށް އާއްމުކޮށް ރައީސްއާ އެގޮތަށް [އެންޑްރޫ] މުހާތަބު ކުރެވޭތީ ކިޔުނީ, މާފުކުރައްވާ" މަޓޭ، ރިޔާސަތުން މާފަށް އެދިވަޑައިގެންނެވި އެވެ.
