ޑޮލަރު މާރުކުރަން މަޖުބޫރުވާ ބިލުގައި ލުއިތަކެއް ހިމަނައި މަޖިލީހުން ފާސްކޮށްފި 

ލުއިތަކާއެކު ޑޮލަރު މާރުކުރަން މަޖުބޫރުކުރާ, ބޭރު ފައިސާގެ ބިލު ރައްޔިތުންގެ މަޖިލީހުން މިއަދު ފާސްކޮށްފި އެވެ. މިދިޔަ ހޯމަ ދުވަހު އެ ބިލު މަޖިލިހަށް ހުށަހެޅުއްވީ ސަރުކާރުގެ ފަރާތުން މެޖޯރިޓީ ލީޑަރު، ކޮންގްރެސް ޕާޓީގެ ޕީޖީ ގްރޫޕުގެ ލީޑަރު އިނގުރައިދޫ ދާއިރާގެ މެމްބަރު އިބްރާހިމް ފަލާހެވެ. އެ ބިލު ފާސްކޮށްފައިވަނީ 56 މެންބަރުންގެ ވޯޓާ އެކު އެވެ. އެ ބިލާ ދެކޮޅަށް ވޯޓު ދެއްވީ 11 މެންބަރެކެވެ.

މާލިއްޔަތު ކޮމިޓީން ބިލު ފާސްކުރިއިރު ހިމެނި ބަދަލުތަކަކީ:

• ޑޮލަރު މާރުކުރުމުން އިސްތިސްނާވާ އުމުރު 10 އަހަރުން 12 އަހަރަށް ބަދަލުކުރުން
• ރިސޯޓުތަކުގެ މާލީ ދަތިކަން ހުރި ނަމަ، ބޮލަކަށް 500 ޑޮލަރު މާރުކުރަން ބޭނުން ނުވަތަ ރިސޯޓުގެ ކޮންމެ މަހެއްގެ ޖުމްލަ އާމްދަނީގެ 20 އިންސައްތަ މާރު ކުރެވޭ ގޮތަށް އޮތްއޮތުން، އެ އަދަދަށް ވުރެ މަދުން ދައްކަން އެދުމުގެ އިހުތިޔާރު ދިނުން. މި ލުއި ދޭނީ މާލީ ދަތިކަން ކުރިމަތިވެފައިވާކަން އެ ރިސޯޓަކުން އެމްއެމްއޭއަށް ސާބިތުކޮށްދިނުމުން

ބޭރު ފައިސާ އާ ބެހޭ ގަވާއިދާ ހިލާފަށް, އެ ބިލުގައި ވަނީ ރިސޯޓު، ގެސްޓް ހައުސް، ހޮޓާ އަދި ސަފާރީތަކަށް އަންނަ ކޮންމެ ފަތުރުވެރިއަކަށް 500 ޑޮލަރު މާރުކުރަން ޖެހޭ ގޮތަށް އޮތް އޮތުން އިހުތިޔާރީ ކަމަކަށް ހަދާފަ އެވެ. އޭގެ އިތުރުން ފަތުރުވެރިކަމުގެ ދާއިރާ އާއި މާލީ އިދާރާތައް ފިޔަވާ އެހެން ފަރާތަކުން ވިއްކާ ނުވަތަ ފޯރުކޮށްދޭ މުދަލާއި ހިދުމަތަށް އަހަރެއްގެ ތެރޭގައި ބޭރު ފައިސާއިން މަދުވެގެން 15 މިލިއަން ޑޮލަރު ލިބޭ ފަރާތްތަކުން އެ އާމްދަނީގެ 20 އިންސައްތަ މާރުކުރަން މަޖުބޫރުވެ އެވެ. މީހުން ދިރިއުޅޭ ރަށްރަށުގައި ހުންނަ ގެސްޓް ހައުސްތަކާއި ސަފާރީ އުޅަނދުތަކުން ކޮންމެ ފަތުރުވެރިއަކަށް 25 ޑޮލަރުގެ ރޭޓުން ނުވަތަ ކޮންމެ މަހެެއްގެ ބޭރު ފައިސާގެ އާމްދަނީގެ 20 އިންސައްތައިން މާރުކުރަން ޖެހޭނެ ކަމަށް ބިލުގައި ބަޔާންކޮށްފައިވެ އެވެ. ޖުމްލަ އާމްދަނީގެ އަދަދު ބަދަލުކުރަން ގަލޮޅު އުތުރު ދާއިރާގެ އެމްޑީޕީ މެންބަރު މުހައްމަދު އިބްރާހިމް ހުށަހެޅުއްވި އެވެ.