ރާއްޖޭގައި ވޭޕް މަނާވެއްޖެ
މިއަދުން ފެށިގެން ދިވެހިރާއްޖޭ ގައި ވޭޕް ބޭނުންކުރުމާއި ވިއްކުމާއި ގެންގުޅުން މަނާވެއްޖެ އެވެ.
ދުންފަތް ކޮންޓްރޯލު ކުރުމާ ބެހޭ ގާނޫނަށް ގެނައި އިސްލާހާ ގުޅިގެން މިރޭ 12 އިން ފެށިގެން މަނާވެފައިވަނީ އީ-ސިނގިރޭޓާއި ވޭފްކުރުމަށް ބޭނުންކުރާ އާލާތްތަކާއި އެ އެއްޗެއްސާއެކު ބޭނުން ކުރުމަށް ތައްޔާރުކޮށްފައިވާ އުފެއްދުންތައް ރާއްޖޭގައި ވިއްކުމާއި ހިލޭ ބެހުމާއި ބޭނުން ކުރުމެވެ.
އަދަބުތައް:
- އީ- ސިނގިރޭޓާއި ވޭފްކުރުމަށް ބޭނުންކުރާ އާލާތްތަކާއި އެ އެއްޗެއްސާއެކު ބޭނުންކުރުމަށް ތައްޔާރުކޮށްފައިވާ އުފެއްދުންތައް ރާއްޖޭގައި ވިއްކުން - 20,000ރ ޖޫރިމާކޮށް, ވިއްކި ކޮންމެ އީ-ސިނގިރޭޓް ނުވަތަ ވޭޕްކުރުމަށް ބޭނުންކުރާ އާލާތަކަށް 10,000ރ މަގުން ޖޫރިމަނާކުރުން.
- އީ- ސިނގިރޭޓާއި ވޭފްކުރުމަށް ބޭނުންކުރާ އާލާތްތަކާއި އެ އެއްޗެއްސާއެކު ބޭނުންކުރުމަށް ތައްޔާރުކޮށްފައިވާ އުފެއްދުންތައް ރާއްޖޭގައި ހިލޭ ބެހުން - 10,000ރ ޖޫރިމަނާކުރުން.
- އީ- ސިނގިރޭޓާއި ވޭފްކުރުމަށް ބޭނުންކުރާ އާލާތްތަކާއި އެ އެއްޗެއްސާއެކު ބޭނުންކުރުމަށް ތައްޔާރުކޮށްފައިވާ އުފެއްދުންތައް ރާއްޖޭގައި ބޭނުންކުރުން - 5000ރ ޖޫރިމަނާކުރުން.
- އެފަދަ އެއްޗެއް ވިއްކީ ނުވަތަ ހިލޭ ބެހީ ކުޑަކުއްޖަކަށް ނަމަ - 10,000ރ ޖޫރިމަނާކުރުމުގެ އިތުރުން އެ ފަރާތެއް 50,000ރ ޖޫރިމަނާކުރުން.
އީ- ސިނގިރޭޓާއި ވޭފްކުރުމަށް ބޭނުންކުރާ އާލާތްތަކާއި އެ އެއްޗެއްސާއެކު ބޭނުންކުރުމަށް ތައްޔާރުކޮށްފައިވާ އުފެއްދުންތައް ރާއްޖޭ އެތެރެކުރުން މަނާކޮށްފައިވަނީ މިދިޔަ މަހުގެ 15 ދުވަހެވެ. އެފަދަ އަމަލެއް ހިނގައިފިނަމަ 50,000ރ ޖޫރިމަނާކޮށް, ކޮންމެ އީ-ސިނގިރޭޓަކުން ނުވަތަ ވޭޕްގެ އާލާތަކަށް 10,000ރ މަގުން ޖޫރިމަނާ ކުރާނެ ކަމަށް އެ ގާނޫނުގައި ބުނެފައިވެ އެވެ.
އެ ގާނޫނުގެ ދަށުން މިދިޔަ މަހު 15 ގައި މަނާކޮށްފައިވާ އިތުރުކަންކަން:
- ދައުލަތުގެ އެންމެހާ އިދާރާތައް ހިންގާ އިމާރާތްތަކާއި އެ ތަންތަނުގެ ގޯތިތެރޭގައި ދުންފަތުގެ އިސްތިއުމާލުކުރުން.
- 21 އަހަރުން ދަށުގެ މީހުންނާއި ކުޑަކުދީންނަށް ދުންފަތުގެ އެއްވެސް ބާވަތެއް ނުވަތަ ދުންފަތުން އުފައްދައިފައި ހުރި އެއްވެސް އެއްޗެއް ވިއްކުން ނުވަތަ ވިއްކުމުގެ މުއާމަލާތެއްގައި ބައިވެރިކުރުން.
ރައީސް އޮފީހުގައި ބޭއްވި ނޫސްވެރިންގެ ބައްދަލުވުމެއްގައި ސަރުކާރުން ވޭޕް މަނާކުރަން ނިންމި ނިންމުމާ ގުޅޭގޮތުން ވާހަކަ ދައްކަވަމުން ހޯމްލޭންޑް ސެކިއުރިޓީ އެންޑް ޓެކްނޯލޮޖީ މިނިސްޓަރު އަލީ އިހްސާން ވިދާޅުވެފައި ވަނީ ސްކޫލުތަކުގައި ކިޔަވަމުން އަންނަ ދަރިވަރުންގެ ތެރެއިން ގްރޭޑް ތިނެއްގައި އުޅޭ ދަރިވަރުންގެ ތެރޭގައި ވޭޕަށް ދެވި ހިފާފައިވާ ދަރިވަރުން އުޅޭ ކަމަށެވެ. އެއީ ގާތްގަނޑަކަށް އުމުރުން އެންމެ 9 އަހަރުގެ ކުދިން ކަމަށާއި ސަރުކާރުގެ އޮތް ކަންބޮޑުވުމަކީ އެފަދަ ތަކެތީގެ ތެރެއަށް ލާފައި އޮޅުވާލައިގެން އެ ކުދިންނަށް މަސްތުވާތަކެތި ދެމުން އަންނަ އައުން ކަމަށެވެ.
މިއީ މަސްތުވާތަކެތި ބޭނުންކުރާ އާންމު އުސޫލުގެ ތެރެއިން ނުފެންނަ ޓްރެންޑެއް ކަމަށެވެ. އުމުރުން 9 އަހަރުން ފެށިގެން 11 އަހަރާ ދެމެދުގެ ކުދިން އެފަދަ ތަކެތި ބޭނުންކުރާތަން މިހާތަނަށް ފެނިފައިނުވާ ކަމަށެވެ. ކަމުގައި އޮތް ބިރަކީ މި ނިޒާމުގެ ތެރެއިން މަސްތުވާތަކެތި ބޭނުންކުރަމުން އަންނަ ޖީލެއް ރާއްޖެ އުފެދިދާނެ ކަމުގެ ބިރު ކަމަށް ވެސް އިހުސާން ވިދާޅުވި އެވެ.
މިނިސްޓަރު ވިދާޅުވި ގޮތުގައި ރާއްޖެ ހިމެނޭ ސަރަހައްދުގައި 11 ގައުމެއް އޮންނައިރު، އޭގެ ތެރެއިން 8 ގައުމަކުން ވޭޕް ބޭނުންކުރުން މަނާކޮށްފައިވާ ކަމުގަ އެވެ. އެ ގައުމުތަކުން މަސްތުވާތަކެތީގެ މައްސަލައަށް ގޮތް ނިންމުމުގައި ވެސް "އެޓޭކް" ކުރީ ވޭޕަށް ކަމުގައި ފާހަގަކުރެއްވި އެވެ.
