ޓެކްސީ ޑްރައިވަރުނާއި ޓޯކުރި ކާރުތައް ދޫކޮށްލަން އެސޯސިއޭޝަނުން ގޮވާލައިފި
މިދިޔަ ހަފްތާގެ ބުދަ ދުވަހު ޓެކްސީ ޑްރައިވަރުން އިސްނަގައިގެން ކުރިއަށް ގެންދިޔަ އިހުތިޖާޖުގެ ތެރެއިން ހައްޔަރުކުރި ޑްރައިވަރުންނާއި ޓޯ ކުރި ކާރުތައް ދޫކޮށްލަން ޑްރައިވާސް އެސޯސިއޭޝަން އޮފް މޯލްޑިވްސްއިން ގޮވާލައިފި އެވެ.
އެ އެސޯސިއޭޝަންގެ ނައިބު ރައީސް, އަހުމަދު ހަބީބް ސޮއިކޮށް އިއްްޔެ ނެރުނު ބަޔާނުގައި ބުނީ ސަރުކާރުން ފަށަން އުޅޭ ޓެކްސީ ފްލީޓް ހުއްޓުވުމަށް ގޮވާލާ, މިދިޔަ ދެ ދުވަހު ހަވީރު 4 ޖަހާއިރު ފެށި ސުލްހަވެރި އިހުތިޖާޖު އެ ރޭ 8:30 ގައި ނިންމާލާފައިވާ ކަމަށެވެ.
އެހެންނަމަވެސް އިހުތިޖާޖު ނިންމާލުމަށްފަހު ޓެކްސީ ޑްރައިވަރުން ގެއަށް އަދި ދަތުރުކުރަން ދިޔަ މަގުމަތީގައި ފުލުހުން އަމަލުކޮށްފައިވާ ގޮތުން ހައިވޭއާ ދިމާލުން ޓްރެފިކް ބާރު ބޮޑުވިކަން އެ ބަޔާނުގައި ފާހަގަކޮށްފައިވެ އެވެ.
އެ އެސޯސިއޭޝަނުން ބުނީ ފުލުހުން ތުހުމަތުކުރާ ގޮތަށް އާންމުންނަށް ދަތިކޮށް, މަގުތައް ބަންދުކުރުމަކީ އެ ޖަމިއްޔާއިން އެއްވެސް ވަރަކަށް ތަރުހީބުދީ, ހިތްވަރުދޭނެ ކަމެއް ނޫން ކަމަށާއި އެފަދަ އަމަލެއް އެ މުޒާހަރާގައި ހިނގާފައި ނުވާ ކަމަށެވެ.
ނަމަވެސް އެ ރޭ އާންމު ރައްޔިތުންނަށް ދިމާވި ދަތިތަކަށް އެ ޖަމިއްޔާއިން މާފށް އެދިފައިވެ އެވެ. އަދި އެފަދަ އެއްވެސް ކަމެއް ތަކުރާރު ނުވާނެ ގޮތަށް ކުރިއަށް އޮތްތަނުގައި އަމަލުކުރުމަށް އެ ދާއިރާއާއި ގުޅުން ހުރި ފަރާތްތަކަށް އެސޯސިއޭޝަނުން އިލްތިމާސްކޮށްފައިވެ އެވެ.
އެ އިހުތިޖާޖާ ގުޅިގެން ތިން ޑްރައިވަރުން ހައްޔަރުކޮށް ގިނަ އަދަދެއްގެ ޓެކްސީ 30 ދުވަހުގެ މުއްދަތަކަށް ހިފަހައްޓާފައިވާތީ އެސޯސިއޭޝަނުން އެކަން ކުށްވެރިކޮށްފައިވެ އެވެ. އަދި އެއީ ތަހުޒީބު ޑިމޮކްރަސީއެއްގައި ކޮށްގެން ވާނެ އަމަލެއް ނޫން ކަމަށް ވެސް ބުނެފައިވެ އެވެ.
"މި އަނިޔާވެރި އަމަލު ވަގުތުން ވަގުތަށް ހުއްޓާލާ ހައްޔަރުގައިވާ ފަރާތްތަކާއި ޓޯ ކޮށްފައިވާ ކާރުތައް މިހިނދު މިހިނދަށް ދޫކޮށްލުމަށް ގޮވާލަމެވެ."
އެސޯސިއޭޝަނުން ބުނީ މިއަދާ ހަމައަށްވެސް ބައެއް ކާރުތައް ހިފެހެއްޓި ސަބަބު ޓެކްސީ ޑްރައިވަރުންނަށް އަންގާފައި ނުވާ ކަމަށެވެ. އަދި ޓެކްސީ ހިދުމަތް އޭގެ އެންމެ ފުރިހަމަ ގޮތުގައި ދިނުމަށް ޑްރައިވަރުންގެ ފަރާތުން ހުށަހަޅާފައިވާ ކަންކަމަށް މިހާތަނަށް ސަރުކާރުން ފުރިހަމައަށް އިޖާބަދީފައި ނުވާ ކަން ފާހަގަކުރި އެވެ.
ޑްރައިވާސް އެސޯސިއޭޝަނުން އިތުރަށް ބުނީ ސުލްހަވެރިކަމާއެކީ ގޮވާލާ ގޮވާލުންތަކަށް ސަރުކާރުގެ އިދާރާތަކުން އިޖާބަދީ އެކަމުގައި އެދެވޭ ޖަވާބެއް ހޯދައިދިނުމަކީ އެ ޖަމިއްޔާގެ ފަރާތުން އެދޭ ވަރަށް ބޮޑު އެދުމެއް ކަމަށެވެ.
އެ އިހުތިޖާޖާ ގުޅިގެން ހައްޔަރުކޮށްފައިވާ ޑްރައިވަރުންނަކީ މއ. ވިރާހު، މުހައްމަދު ޝާމިން (39އ) އާއި ލ.ދަނބިދޫ, ސަންރޭ އަހުމަދު ޝަބީން (33އ) ގެ އިތުރުން ހދ. ކުމުންދޫ، ހޮލިޑޭވިލެޖް، ނުއޫމާން އަހުމަދު(36އ) އާއި މާލެ ސިޓީ, މއ. ނަހީދީމަންޒިލް, މިސްބާހު ޝަރީފް (31އ) އެވެ.
އެ މީހުންގެ ބަންދާމެދު ގޮތެއް ނިންމުމަށް ކޯޓަށް ހާޒިރުކުރުމުން ޝާމިންއާއި ޝަބީން އަދި މިސްބާހު 5 ދުވަހަށް ބަންދުކުރަން އަމުރުކޮށްފައިވާއިރު ޝަރުތުތަކާއެކު ނުއުމާން ދޫކޮށްލާފައިވެ އެވެ.
