ނުގަވައިދުން މާލޭގެ ބައެއް މަގުތަކުގައި ޕާކުކުރާ އުޅަނދުތައް ޓޯ ކުރަން ފަށައިފި
ނުގަވައިދުން މާލޭގެ ބައެއް މަގުތަކުގައި ޕާކުކުރާ އުޅަނދުތައް ޓޯ ކުރަން ފުލުހުން ފަށައިފި އެވެ.
އެކްސްގައި މިއަދު ކުރި ޕޯސްޓެއްގައި ފުލުހުން ބުނީ މާލޭގައި ކާރޫބާރު ބޮޑު 6 މަހެއްގައި އާންމު ދަތުރުފަތުރަށާއި ޕަބްލިކް ޓްރާންސްޕޯޓަށް ދަތިވާ ގޮތަށް ގަވައިދާ ހިލާފަށް ޕާކުކޮށްފައި ހުންނަ އުޅަނދުތައް ޓޯ ކުރުމުގެ މަސައްކަތް ކުރަމުންދާނެ ކަމަށެވެ.
އެ މަގުތަކުގެ ތެރޭގައި އަމީނީ މަގާއި، ބޮޑުތަކުރުފާނު މަގު، ސޯސަން މަގު، މަޖީދީ މަގު، އޯކިޑް މަގު، އަމީރު އަހުމަދު މަގު ހިމެެނޭ ކަމަށް ފުލުހުން ބުންޏެވެ.
މީގެ ކުރިން ވެސް ނުގަވައިދުން މަގުތަކުގައި ޕާކުކޮށްފައި ހުންނަ އުޅަނދުތައް ޓޯކުރި އެވެ.
އެހެން ނަމަވެސް އެފަދަ އުޅަނދުތައް ޓޯކުރުން ހުއްޓާލައިފައި އޮންނަތާ މިހާރު ގިނަ މަސްތަކެއް ވަނީ ވެފަ އެވެ. ގަވައިދާ ހިލާފަށް އާންމުކޮށް ޕާކުކުރާ މަގުތަކުގެ ތެރޭގައި ބޮޑުތަކުރުފާނު މަގާއި އަމީނީ މަގު ހިމެނެ އެވެ.
އަމީނީ މަގު އަލުން ހަދައި ހުޅުވިތާ ކުޑަދުވަސްކޮޅެއްގައި އެ މަގު އެއްކޮށްހެން މިހާރު ވެހިކަލްތައް އޮންނަނީ ޕާކުކޮށްފަ އެވެ. މާލޭގެ އިތުރުން ހުޅުމާލޭގައި ވެސް މި ފަހަކަށް އައިސް ގޮތެއް ފޮތެއް ނެތި ޕާކުކުރާ މައްސަލަ ވަނީ ބޮޑުވެފަ އެވެ.
ޕާކިންގެ މައްސަލަައަށް ހައްލެއް ހޯދަން މި ސަރުކާރުން ވަނީ ހުޅުމާލޭގައި ޕާކިން ބިލްޑިންތަކެއް ވެސް އަޅަން ނިންމައިފަ އެވެ.
